এখন ধুনীয়া বিৱাহৰ পৰিৱেশ কল্পনা কৰক। চাৰিওফালে সংগীত বাজি আছে, বিৱাহত উপস্থিত অতিথিসকলে আনন্দত নাচি আছে। এই পৰিৱেশৰ মাজতে যি চহৰত এই বিৱাহ সম্পন্ন হৈছে সেই চহৰৰ মেয়ৰজনে দৰাৰ সাজত নিজৰ হ’বলগীয়া কইনাৰ অপেক্ষাত ৰৈ আছে। দৰাৰ অধীৰ অপেক্ষাৰ অন্ত পেলায় এসময়ত ৰভাথলীৰ সেই নিৰ্দিষ্টস্থানলৈ অনা হ’ল কইনাক। চহৰখনৰ মেয়ৰৰ নতুন কইনাজনীৰ আঁৰ কাপোৰ আঁতৰাই অতিথিসকলে দেখিলে কইনাৰ ৰূপত সেয়া এটা ঘঁৰিয়াল। শুনিবলৈ অদ্ভুত লাগিলেও, এয়া একেবাৰে সত্য ঘটনা। মেক্সিকোৰ ওআছাকাৰ এখন সৰু চহৰ ছান পেদ্ৰো হুৱামেলুলাৰ ঘটনা। দৰাচলতে প্ৰতি বছৰে এনে এক অনন্য বিৱাহ পৰম্পৰাগতভাবে পালন কৰা হয়, যাৰ ভিডিঅ’বৰ্তমান ছ’চিয়েল মিডিয়াত ভাইৰেল হৈ পৰিছে। কিন্তু স্বাভাৱিকতে আপোনাৰ মনতো প্ৰশ্ন উঠিব চহৰখনৰ মেয়ৰে কিয় এনেকৈ ঘঁৰিয়ালৰ সৈতে বিয়াত বহে?
ঘঁৰিয়ালৰ সৈতে বিৱাহপাশত আৱদ্ধ হোৱাৰ কাৰণ কি?
এই অদ্ভুত বিৱাহখন ভাইৰেল হ’লেও এয়া কোনো প্ৰচাৰ কৌশলৰ বাবে কৰা কাহিনী বা ঘটনা নহয়, বৰং অঞ্চলটোৰ ২৩০ বছৰৰো অধিক পুৰণি এক পৱিত্ৰ আদিবাসী পৰম্পৰা। চলিত বছৰত চহৰখনৰ মেয়ৰ ডেনিয়েল গুটিয়েৰেজে এনা চিন্থিয়া ৰামিৰেজ আহুমাদা নামৰ এটা ঘঁৰিয়ালৰ সৈতে সম্পূৰ্ণ ৰীতি-নীতি অনুসৰি এই বিৱাহ সম্পন্ন কৰে। স্থানীয় বিশ্বাস অনুসৰি এই বিৱাহৰ উদ্দেশ্য হৈছে প্ৰকৃতি আৰু ধৰিত্ৰী মাতাৰ প্ৰতি সন্মান প্ৰদৰ্শন কৰা। তেওঁলোকৰ ধাৰণা মতে এই প্ৰতীকী বিৱাহৰ ফলত প্ৰকৃতি সন্তুষ্ট হয়, ভাল বৰষুণ হয়, খেতি-শস্য ভাল হয় আৰু মাছমৰীয়াসকলে সাগৰৰ পৰা প্ৰচুৰ মাছ পায়। অৰ্থাৎ এই পৰম্পৰা মানৱ আৰু প্ৰকৃতিৰ মাজত সমন্বয় স্থাপন কৰি সমৃদ্ধি আনি দিয়া এক অনন্য সাংস্কৃতিক বিশ্বাস।
এই নিয়মৰ আঁৰত আছে পুৰণি লোককথা
এই ৰীতিটোৰ আঁৰত আছে এটা পুৰণি লোককথা। প্ৰবাদ অনুসৰি বহু শতিকা আগতে চণ্টাল আৰু হুৱাভে নামৰ দুটা আদিবাসী গোষ্ঠীৰ মাজত ভয়ংকৰ শত্রুতা আছিল। সেই সংঘাত শেষ কৰিবলৈ চণ্টাল ৰজা আৰু হুৱাভে ৰাজকুমাৰীৰ বিবাহ সম্পন্ন হৈছিল, যাৰ ফলত দুয়ো গোষ্ঠীৰ মাজত শান্তি স্থাপন হয়। বৰ্তমান সময়ত মেয়ৰজন চণ্টাল ৰজাৰ প্ৰতিনিধি হিচাপে গণ্য হয় আৰু ঘঁৰিয়াল কইনাক হুৱাভে ৰাজকুমাৰীৰ প্ৰতীক হিচাপে গণ্য কৰে। সেইবাবে এই বিৱাহ কেৱল এক ৰীতি নহয়, বৰং দুই সংস্কৃতিৰ ঐক্য আৰু শান্তিৰো প্ৰতীক।
এই পৰম্পৰাগত বিৱাহৰ নিয়ম
বিৱাহৰ দিনটোত এই ঘঁৰিয়াল কইনাক ৰাজকুমাৰীৰ দৰে সজোৱা হয়। বিৱাহৰ বগা পোছাক পিন্ধোৱা হয়, ফুল আৰু ৰঙীন ফিতা লগাই সাজ-পৰাই তোলা হয়। বেণ্ড-বাজানাৰ সৈতে সমগ্ৰ চহৰ ঘূৰাই অনা হয় আৰু লোকসকলে আনন্দমনে নাচি-গাই বিৱাহৰ দিনটো উদযাপন কৰে। জন্তুটোৰ সুৰক্ষাৰ বাবে ইয়াৰ মুখ অংশত সাৱধানে ৰছীৰে বন্ধোৱা হয় যাতে কোনো দুৰ্ঘটনা নহয়। এই বিৱাহৰ আটাইতকৈ আকৰ্ষণীয় মুহূৰ্তটো হয় শেষৰ অংশত, যেতিয়া চহৰখনৰ মেয়ৰে তেওঁৰ কইনাক চুমা দিয়ে। সামাজিক মাধ্যমত এই দৃশ্যৰ ছবি আৰু ভিডিঅ’ বহুলভাৱে ভাইৰেল হৈছে। স্থানীয় লোকসকলৰ বাবে এই চুমা কেৱল এক ৰীতি নহয়, বৰং প্ৰকৃতিৰ সুৰক্ষা আৰু সংৰক্ষণৰ প্ৰতিজ্ঞাৰ প্ৰতীক।
এই প্ৰতিবেদনটো যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
