বিহাৰৰ ভাগলপুৰ জিলাৰ চুলতানগঞ্জৰ ষ্টেচন ৰোডত বুধবাৰে বিয়লি প্ৰায় ৩:৩০ বজাত এক ভয়ংকৰ ঘটনা সংঘটিত হয়। কোচিং চেণ্টাৰলৈ গৈ থকা দশম শ্ৰেণীৰ এগৰাকী ছাত্ৰীক এজন যুৱকে পি*ষ্টল দেখুৱাই বাইকত উঠাই লৈ যোৱাৰ অভিযোগ উঠিছে। ছাত্ৰীগৰাকীৰ অভিযোগ অনুসৰি, টিউচনলৈ যোৱাৰ পথত কমলেশ নামৰ যুৱকজনে পি*ষ্টল দেখুৱাই জোৰকৈ তেওঁক বাইকত উঠাই লৈ যায়। পিছত তেওঁক এটা কোঠালৈ লৈ গৈ ধ*ৰ্ষণৰ অপচেষ্টা চলোৱাৰ অভিযোগো উত্থাপন হৈছে।
ঘটনাৰ কিছু সময় পিছত ছাত্ৰীগৰাকীৰ চেতনা ঘূৰি আহি নিজকে মুৰাৰ্কা কলেজৰ ওচৰৰ ৰেলৱে ক্ৰছিঙৰ সমীপত পৰি থকা অৱস্থাত উদ্ধাৰ। তাৰ পৰা কোনোমতে নিজৰ ঘৰলৈ গৈ পৰিয়ালৰ লোকক সমগ্ৰ ঘটনাটো জনায়। ঘটনাৰ পিছতে পৰিয়ালৰ লোক আৰু স্থানীয় বাসিন্দাসকলে অভিযুক্তৰ ঘৰত উপস্থিত হয়। সেই সময়ত অভিযুক্তৰ জ্যেষ্ঠ ভাতৃ দুৰ্গেশে ঘৰৰ ছাদৰ পৰা অ*স্ত্ৰ দেখুৱাই ভাবুকি দিয়াৰ অভিযোগ উঠিছে।
ইফালে, আৰক্ষীৰ তদন্তত পোহৰলৈ অহা মতে, অভিযুক্ত দুজনৰ পিতৃ উদয় যাদৱ সমস্তিপুৰত উপ-পৰিদৰ্শক হিচাপে কৰ্মৰত। তেওঁৰ মূল ঘৰ কথৰাত যদিও কেইবছৰমান পূৰ্বে চুলতানগঞ্জত এটা ঘৰ নিৰ্মাণ কৰিছিল আৰু বৰ্তমান তেওঁৰ পৰিয়াল তাতেই থাকে। পুত্ৰক আৰক্ষীয়ে আটক কৰাৰ খবৰ পোৱাৰ পিছত উদয় যাদৱে আৰক্ষীক ফোন কৰা বুলি জানিব পৰা গৈছে।
ষ্টেচন হাউছৰ বিষয়া ধনঞ্জয় কুমাৰে জনোৱা মতে, আটক কৰা অভিযুক্তসকলক সোধা-পোছা কৰি থকা হৈছে। আনহাতে, আইন-শৃংখলা সদৰৰ DSP নৱনীত কুমাৰে কয় যে এই ঘটনাৰ সন্দৰ্ভত FIR ৰুজু কৰি কঠোৰ আইনী ব্যৱস্থা গ্ৰহণ কৰা হ’ব। আৰক্ষীৰ মতে, অভিযুক্তসকলৰ বিৰুদ্ধে পূৰ্বেও অপৰাধমূলক গোচৰ থকাৰ তথ্য পোহৰলৈ আহিছে। প্ৰায় দুবছৰ পূৰ্বে কমলেশক কোনো লোকে ডিঙিত আঘাত কৰি ঘৰৰ সন্মুখত পেলাই থৈ গৈছিল বুলি জানিব পৰা গৈছে। চিকিৎসাৰ পিছত তেওঁ সুস্থ হৈ উঠে। সেই ঘটনাৰ সন্দৰ্ভতো তেওঁৰ জ্যেষ্ঠ ভাতৃ দুৰ্গেশৰ বিৰুদ্ধে অপৰাধমূলক গোচৰ ৰুজু হৈছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
