জামুগুৰিহাটৰ ঐতিহ্যমণ্ডিত বাৰেচহৰীয়া ভাওনালৈ মাজত মাত্ৰ ৩টা দিন৷ সম্পূৰ্ণ হৈ উঠিছে মূল মণ্ডপৰ কাম৷ ভাওনাক লৈ ব্যস্ত শিল্পী, ভকত-বৈষ্ণৱ৷ শোণিতপুৰ জিলাৰ জামুগুৰিহাটৰ ঐতিহ্যমণ্ডিত বাৰেচহৰীয়া ভাওনা মহোৎসৱলৈ মাঁথো ৩টা দিন বাকী৷ এই তিনিটা দিন বাকী থকা অৱস্থাত ইতিমধ্যে সম্পূৰ্ণ হৈ উঠিছে পদ্মপুষ্পসদৃশ মূল মণ্ডপৰ কাম। পদ্মপুষ্প সাদৃশ মূল মণ্ডপৰ চূড়াত আজি সোণবৰণীয়া কলচি স্থাপন কৰা হয়৷ ইয়াৰ লগে লগে ২১ খন খলাৰে নিৰ্মাণ হোৱা আকৰ্ষণীয় মূল মণ্ডপৰ ১০০ শতাংশ কাম সম্পূৰ্ণ হৈ উঠে৷ আজি দিনত আয়তীৰ উৰুলি, খোল-তাল বাদনেৰে এই সোণবৰণীয়া কলচি জামুগুৰিহাটৰ টলকাবাৰীৰ পৰা প্ৰায় ৪ কিলোমিটাৰ দূৰৰ পৰা ৰাইজে কান্ধত কঢ়িয়াই আনে৷ প্ৰস্ফূটিত পদুম ফুলৰ আৰ্হিত নিৰ্মিত বাৰেচহৰীয়া ভাওনাৰ মূল মণ্ডপত কলচি স্থাপনৰ লগে লগেই এতিয়া মূল মণ্ডপৰ দৃষ্টিনন্দন শোভাই সকলোকে মুগ্ধ কৰিছে। ঐতিহ্যমণ্ডিত ভাওনাখন আৰম্ভ হোৱাৰ প্ৰাকক্ষণত শিল্পীৰ হাতত প্ৰাণ পাই উঠিছে শৰাই, বঁটা আদি৷ জামুগুৰিহাটৰ শিল্পী গোপাল কোঁচৰ হাতত প্ৰাণ পাই উঠিছে এইসমূহ শিল্পকৰ্মই৷ বাৰেচহৰীয়া ভাওনা মহোৎসৱৰ প্ৰদৰ্শনী বিভাগৰ আমন্ত্ৰণমৰ্মে এইসমূহ সৃষ্টি নিৰ্মাণ কৰি উলিয়াইছে শিল্পীগৰাকীয়ে৷ বাঁহ আৰু কাঠেৰে শিল্পী গোপাল কোঁচে নিৰ্মাণ কৰি উলিয়াইছে দৃষ্টিনন্দন শিল্পকৰ্ম৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
