অসম লাইভ২৪ঃ দেশত কমেডিয়ানৰ নাম ল’লেই মনত ভাঁহি উঠে ভাৰতী সিং৷ ভাৰতী সিঙ এতিয়া বলীউডৰ প্ৰায়সমূহ শ্ব’তেই এগৰাকী এংকৰ হিচাপে ভাগ লোৱা দেখা যায়৷ বিগত বৰ্ষত মাতৃও হৈছে ভাৰতী৷ কিছুদিন পূৰ্বে দেশৰ আগশাৰীৰ ৰিয়েলিটি শ্ব’ত ভাৰতীৰ পূত্ৰ গোলাক দেখা গৈছিল৷ অৱশ্যে ভাৰতীয় ইউটিউব চেনেলত প্ৰায় প্ৰতিদিনেই দেখা যায় ভাৰতীৰ পূত্ৰ গোলা ওৰফে লক্ষ্য সিং লিম্বাচিয়াক৷ শেহতীয়াকৈ ভাৰতীয়ে শ্বেয়াৰ কৰা এটা ভিডিঅ’ই সামাজিক মাধ্যমত তোলপাৰ লগাইছে৷ সদায়ে মানুহৰ প্ৰশংসাকেই কৰা ভাৰতীয়ে কিন্তু শেহতীয়া ব্লগটোত আক্ষেপ প্ৰকাশ কৰা দেখা গৈছে৷
ভিডিঅ’টোত ভাৰতীয়ে বিমান যাত্ৰাৰ সময়ত কিছু যাত্ৰীৰ ব্যৱহাৰ সন্দৰ্ভত মন্তব্য কৰিছে৷ সন্তানক লৈ বিমান যাত্ৰাত বিপাঙত পৰা ভাৰতীয়ে সহযাত্ৰীৰ পৰা সহায় বিচাৰিও বিমুখ হৈছিল৷ কি হৈছিল বিমান যাত্ৰাত ভাৰতীৰ সৈতে?
ভাৰতীয়ে কৈছে, ‘মই আৰু গোলা প্ৰথম চীটত আছিলো৷ গোলাৰ পৰিচৰ্যাৰ বাবে ৰখা কৰ্মী দুগৰাকী আছিল চতুৰ্থ শাৰীত৷ আমাৰ কাষতেই এহাল দম্পতী আছিল৷ মই তেওঁলোকক অনুৰোধ কৰিছিলো যে গোলাৰ পৰিচৰ্যাকাৰীকেইগৰাকীৰ বাবে মই চীটটো সলাব নেকি বুলি সুধিছিলো৷ তেওঁলোকে কিন্তু পোনচাটেই কঁকালৰ বিষৰ দোহাই দি চীট নসলাও বুলি জনাই৷ আচলতে হঠাতেই মিছাকৈ কি ক’ব ভাৱি নাপায়েই তেওঁ তেনেকৈ কৈ উঠিল৷ অৱশ্যে সেয়া তেওঁলোকৰ ব্যক্তিগত কথা৷’
ইয়াৰোপৰি ভাৰতীয়ে সকলোকে আহ্বান জনাই কয়, কণমানি সন্তান লগত থাকিলে বহু অসুবিধাও থাকে৷ কণমানি সন্তান থকা কোনো মাতৃ দেখিলে আপোনালোকেই অনুগ্ৰহ কৰি সহায় কৰিব৷ এনেকৈ সাহায্য বিচাৰিলে বিমুখ নকৰিব৷ এই যাত্ৰাতেই মই দুই যুৱককো লগ পালো৷ তেওঁলোকৰ সৈতে চীট সালসলনি কৰিলো৷ কোৱা মাত্ৰকেই তেওঁলোকে চীটটো সলাই ল’লে৷ তেওঁলোকক মই কেইবাবাৰো ধন্যবাদ দিছো৷ ভাল মানুহ এই পৃথিৱীত আছে৷ মই যুৱক দুজনক কি বুলি ধন্যবাদ জনাম ভাৱিয়েই পোৱা নাই৷’
ভাৰতীৰ এই ভিডিঅ’ দেখা মাত্ৰকেই ভাৰতীৰ অনুৰাগীসকলে সামাজিক মাধ্যমত লিখিছে, সঁচাকৈয়ে পৃথিৱীত মানৱীয়তাৰ অভাৱ ঘটিছে৷ কিন্তু এটা কথাও নিশ্চয় ক’ব লাগিব যে এমুঠিমান ভাল মানুহ আছে বাবেই শৃংখলাবদ্ধভাৱে আমাৰ সমাজখন চলি আছে৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
