দৈনিক দাম বাঢ়িছে, ১ ইউনিট বিটকয়েন থাকিলে আপুনি কিমান টকাৰ মালিক জানেনে?

মাৰ্কিন প্ৰেছিডেণ্ট নিৰ্বাচনত ড’নাল্ড ট্ৰাম্পৰ জয়ক প্ৰভাৱ পৰিছে বিশ্বৰ বজাৰত৷ আমেৰিকাৰ শ্বেয়াৰ বজাৰ যেনেকৈ হোৰাহোৰে উঠিছে তেনেকৈ বিশ্ব বিভিন্ন ক্ৰিপ্টকাৰেন্সিৰো দৰ বাঢ়িছে৷ বিটকয়েন হৈছে বিশ্বৰ সকলোতকৈ উল্লেখযোগ্য ক্ৰিপ্টকাৰেন্সি৷ ট্ৰাম্পৰ জয়ৰ দিনাই ইয়াৰ দামত নতুন ৰেকৰ্ড তৈয়াৰ হৈছিল৷ সেই ধাৰা এতিয়াও অব্যাহত আছে৷ বিটকয়েনৰ দাম দৈনিক বাঢ়িব ধৰিছে৷ যাৰ ফলত এই ক্ৰিপ্টকাৰেন্সিত যিসকলে বিনিয়োগ কৰিছে তেওঁলোকৰো সম্পত্তিৰ পৰিমান বাঢ়িব ধৰিছে৷

ট্ৰাম্পৰ জয়ৰ পাছৰ দিনাই বিটকয়েনৰ দাম ৭৫ ডলাৰ পাৰ হৈছে৷ এইবছৰ মাৰ্চ মাহত ইয়াৰ দাম উঠিছিল ৭৩হাজাৰ ৭৯৭ ডলাৰ৷ সেই ৰেকৰ্ড ভাঙিছে ৬ নৱেম্বৰত৷ ১০ নৱেম্বৰত বিটকয়েনে ৮০ হাজাৰ ডলাৰৰ গাণ্ডি পাৰ কৰিছে৷ ১১ নৱেম্বৰত বিটকয়েনৰ দাম হৈছেগৈ ৮১ হাজাৰ ডলাৰৰ ওপৰত৷ ১১ নৱেম্বৰৰ পুৱা ৯ বজাত বিটকয়েনৰ দাম আছিল ৮১ হাজাৰ ১৫৬ ডলাৰ৷ যি ভাৰতীয় মুদ্ৰাত প্ৰায় ৬৮ লাখ ৪৮ হাজাৰ ৪০৫ টকা৷ বিগত ৫দিনত ৫লাখ টকাৰো বেছি বাঢ়িছে বিটকয়েনৰ দাম৷ ২০২৪ চনত বিটকয়েনৰ দাম প্ৰায় ৯৩শতাংশ বাঢ়িছে৷

ভাৰতীয় মুদ্ৰাৰ দাম দেখি বুজিব পাৰিব বিশ্বৰ বৃহৎ ডিজিটেল কাৰেন্সি কিমান মূল্যবান৷ কিন্তু সকলোৰে পক্ষে এই পৰিমাণৰ ধন বিনিয়োগ কৰা সম্ভৱ নহয়৷ ১ ইউনিট বিটকয়েন কিনিবলৈ ৬৮ লাখতকৈয়ো বেছি ধন লাগিব৷ আপুনি বিচাৰিলে সৰু অংকৰ বিনিয়োগ কৰিব পাৰে বিটকয়েনত৷ অৰ্থাৎ ১ বিটকয়েনেই আপুনি কিনিব লাগিব তাৰ কোনো বাধ্যবাধকতা নাই৷ উদাহৰণ হিচাপে যদি কওঁ তেন্তে আপুনি ০.০০১ বা ০.০৫ বিটকয়েন কিনিব পাৰে৷ ক্ৰিপ্টকাৰেন্সি ট্ৰেডিং কৰি এই ধৰণৰ সংস্থাৰ এপ বা চাইটত হৈ আপুনি এই বিটকয়েন ক্ৰয় কৰিব পাৰে৷

ট্ৰাম্পৰ জয়ত কিয় বিটকয়েনৰ দাম বাঢ়িছে?

এই প্ৰশ্ন বহুতেই কৰিছে৷ বিশেষজ্ঞসকলে ইয়াৰ কাৰণ ইতিমধ্যেই জনাইছে৷ হংকঙৰ এটা মাৰ্কেট সংস্থাৰ বিশেষজ্ঞই জনাইছে যে, ‘ক্ৰিপ্টকাৰেন্সিক লৈ ট্ৰাম্পৰ মনোভাৱৰ বাবেই এই পৰিবৰ্তন৷ ট্ৰাম্পৰ প্ৰ-ক্ৰিপ্টো অৱস্থানে বিটকয়েনৰ দাম বঢ়োৱাত সহায় কৰিছে৷’ ক্ৰিপ্টো সংক্ৰান্ত বিনিয়োগ সংস্থা ডি এছি এমৰ প্ৰতিষ্ঠাতা ৰিচাৰ্ড গালভিনে কৈছে, ট্ৰাম্পৰ পৰা আৰম্ভ কৰি ক্ৰিপ্টোকাৰেন্সিৰ বৃদ্ধিৰ পক্ষে নীতি অনাৰ কথা কৈছে৷ তেওঁ মাৰ্কিন নিৰ্বাচনত বিপুল সংখ্যাগৰিষ্ঠতা পাইচে৷ সেয়ে আগন্তুক দিনত ক্ৰিপ্টোকাৰেন্সিৰ ব্যৱহাৰ বাঢ়িব বুলি আশা কৰা হৈছে৷ তাৰ বাবে ইয়াৰ চাহিদা বাঢ়িছে৷ ক্ৰিপ্টকাৰেন্সিক লৈ ট্ৰাম্পৰ মনোভাৱ অতীতত পৃথক আছিল৷ তেওঁ যেতিয়া প্ৰথমবাৰ প্ৰেছিডেণ্ট হৈছিল, তেতিয়া ক্ৰিপ্টকাৰেন্সিক স্কেম আখ্যা দিছিল৷ কিন্তু এই বাৰৰ নিৰ্বাচনী প্ৰচাৰত ট্ৰাম্প ক্ৰিপ্টকাৰেন্সিপন্থী৷ আমেৰিকাক ক্ৰিপ্টকাৰেন্সিৰ কেপিটেল বনোৱাৰ কথাও কৈছে ট্ৰাম্পে৷