অসম লাইভ২৪ঃ বিগত ৬ বছৰত গুগল আৰু ইউটিউবত প্ৰদান কৰা বিজ্ঞাপনৰ নামত খৰছ কৰা ধনেৰে নজিৰ গঢ়িছে ভাৰতীয় জনতা পাৰ্টিয়ে। বিগত ৬ বছৰত ১০০ কোটিৰো অধিক টকা কেৱল গুগল, ইউটিউবৰ বিজ্ঞাপনৰ নামতে ব্যয় কৰি ভাৰতীয় ৰাজনৈতিক ইতিহাসত বিজ্ঞাপনৰ নামত ইমান ধন খৰছ কৰা প্ৰথমটো দল হিচাপে পৰিগণিত হৈছে বিজেপি।
উল্লেখ্য যে, ২০১৮ চনৰ মে’ মাহৰ পৰা গুগলে বিজ্ঞাপনৰ ‘স্বচ্ছতা প্ৰতিবেদন’ প্ৰকাশ কৰি আহিছে। এই প্ৰতিবেদন অনুসৰি গুগলত ২০১৮ চনৰ মে’ মাহৰ পৰা ২০২৪ৰ ২৫ এপ্ৰিললৈকে কংগ্ৰেছ, ডি এম কে, ৰাজনৈতিক পৰামৰ্শদাতা সংস্থা ইণ্ডিয়ান পলিটিকেল একচন কমিটি (আই-পিএচি)য়ে সৰ্বমুঠ ব্যয় কৰা ধনতকৈও অধিক ধন অকলেই ব্যয় কৰিছে বিজেপিয়ে।
বাতৰি অনুসৰি, বিগত ছয়বছৰত গুগলৰ ৰাজনৈতিক বিজ্ঞাপনৰ নামত ব্যয় হোৱা সৰ্বমুঠ ধনৰ পৰিমাম হৈছে ৩৯০ কোটি টকা। আনহাতে ইয়াৰে ২৬ শতাংশ অৰ্থাৎ ১০১ কোটি টকা ব্যয় কৰিছে কেৱল বিজেপিয়ে। মন কৰিবলগীয়া যে, গুগলৰ ক্ষেত্ৰত ‘ৰাজনৈতিক’ বিজ্ঞাপনৰ অৰ্থ কেৱল ৰাজনৈতিক দলৰ বিজ্ঞাপন নহয়। ৰাজনৈতিক বিজ্ঞাপনৰ তালিকাত সংবাদ মাধ্যম, চৰকাৰী প্ৰচাৰ বিভাগ, ৰাজনীতিবিদ আৰু অভিনেতাসকলৰ বিজ্ঞাপনও সন্নিবিষ্ট।
গুগলৰ পৰিসংখ্যা অনুসৰি ছবছৰত ২ লাখ ১৭ হাজাৰ ৯৯২টা ‘ৰাজনৈতিক বিজ্ঞাপন’ দিয়া হৈছে। তাৰ ভিতৰত ১ লাখ ৬১ হাজাৰ বিজ্ঞাপন বিজেপিৰ। ইয়াৰ ভিতৰত দলটোৰ সৰ্বাধিক বিজ্ঞাপন আছিল কৰ্ণাটকৰ বাসিন্দাক লক্ষ্য কৰি। কৰ্ণাটকৰ বাসিন্দাসকলৰ বাবে গুগলত ১ কোটি ৮ লাখ টকাৰ বিজ্ঞাপন প্ৰকাশ পাইছিল। ইয়াৰ পিছতে আছে উত্তৰ প্ৰদেশ। ১০ কোটি ৩০ লাখ বিজ্ঞাপন প্ৰকাশ কৰা হৈছিল তাত থকা বাসিন্দা সকলৰ বাবে।
ইয়াৰ পিছতে ৰাজস্থানৰ বাবে ৮.৫ কোটি টকা আৰু দিল্লীৰ বাবে ৭.৬ কোটি টকা ব্যয় কৰা হৈছিল। দৰাচলতে গুগলত সৰ্বাধিক ৰাজনৈতিক বিজ্ঞাপন তামিলনাডুত আছে। ইয়াৰ পিছতে আছে তেলেংগানা, উত্তৰ প্ৰদেশ, কৰ্ণাটক, মধ্যপ্ৰদেশ। গুগলত ‘ৰাজনৈতিক’ বিজ্ঞাপন দিয়াৰ ক্ষেত্ৰত বিজেপিৰ পিছতে দ্বিতীয় স্থানত আছে কংগ্ৰেছ। ছবছৰত ৪৫ কোটি টকাৰ বিজ্ঞাপন দিছে দেশৰ প্ৰধান বিৰোধী দলটোৱে। এই সময়ছোৱাত কংগ্ৰেছে মুঠ ৫,৯৯২টা বিজ্ঞাপন দিছে। তেওঁলোকৰ লক্ষ্য আছিল মূলতঃ কৰ্ণাটক আৰু তেলেংগানা।
ৰাজ্য দুখনৰ বাসিন্দাৰ বাবে কংগ্ৰেছে ব্যয় কৰিছে ৯.৬ কোটি টকা। মধ্যপ্ৰদেশৰ বাবে ব্যয় কৰা হৈছে ৬.৩ কোটি টকা। ইফালে গুগলত ‘ৰাজনৈতিক বিজ্ঞাপন’ৰ ক্ষেত্ৰত তৃতীয় স্থানত আছে ডি এম কে। ২০১৮ চনৰ মে’ মাহৰ পৰা ডি এম কেয়ে গুগলত বিজ্ঞাপন দি ৪২ কোটি টকা খৰচ কৰিছে। তাৰ ভিতৰত ১৬.৬ কোটি টকা তেওঁলোকৰ ৰাজনৈতিক পৰামৰ্শদাতা প্ৰতিষ্ঠানে বিজ্ঞাপন দিছে। তামিলনাডুৰ বাহিৰত এম কে ষ্টেলিনৰ দলে কৰ্ণটকত ১৪ কোটি আৰু কেৰালাত ১৩ কোটি টকাৰ বিজ্ঞাপন দিছে।
২০১৩ চনৰ নৱেম্বৰ মাহত তেলেংগানা বিধানসভা নিৰ্বাচনৰ সময়ত ভাৰত ৰাষ্ট্ৰ সমিতিয়ে ১২ কোটি টকা ব্যয় কৰিছিল। পশ্চিম বংগৰ তৃণমূলৰ বাবে গুগলৰ বিজ্ঞাপনত ৪.৮ কোটি টকা স্থান দিছে আইপিএচিয়ে। লক্ষণীয় যে, দ্বিতীয় পর্যায়ৰ লোকসভা নির্বাচনৰ পূর্বে ৰাজনৈতিক দলসমূহে গুগলৰ বিজ্ঞাপনৰ নামত ব্যয় কৰা ধনৰ পৰিমাণো আশ্চৰ্যজনক৷ এই ক্ষেত্ৰত বিজেপিক চেৰ পেলাই শীৰ্ষত আছে কংগ্ৰেছ। যোৱা ১৮ এপ্ৰিলৰ পৰা ২৪ এপ্ৰিললৈকে কংগ্ৰেছে গুগলৰ বিজ্ঞাপনৰ নামত খৰছ কৰিছে ৫.৭ কোটি টকা, আনহাতে এই সময়ছোৱাত বিজেপিয়ে দিছে ৫.৩ কোটি টকা বিজ্ঞাপন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
