বিগত নিৰ্বাচনৰ আগেয়ে মুখ্যমন্ত্ৰী হিমন্ত শৰ্মাই ২ লাখ নতুনকৈ চৰকাৰী চাকৰিত নিযুক্তিৰ কথা ঘোষণা কৰিছিল। আগন্তুক বাজেট অধিৱেশনৰ পিছতেই নতুন কাৰ্যকালৰ প্ৰথম পৰ্যায়ৰ নিযুক্তি প্ৰক্ৰিয়া সম্পন্ন হোৱাৰ আশা প্ৰকাশ কৰা হৈছে। সমান্তৰালভাৱে চুবুৰীয়া ৰাজ্য পশ্চিমবংগত বিগত নিৰ্বাচনত বিজেপিয়ে দুৰ্দান্ত ফলাফল দেখুৱাই চৰকাৰ গঠন কৰাৰ দুমাহ পূৰ্ণ নৌহওতেই ৰাজ্যখনৰ নিবনুৱা যুৱক-যুৱতীসকলৰ বাবে আনিছে এক সুখবৰ। চুবুৰীয়া ৰাজ্যখনত শীঘ্ৰেই বৃহৎ চৰকাৰী নিযুক্তি দিয়া হ’ব বুলি ঘোষণা কৰিছে বিজেপিৰ নেতৃত্বত গঠন কৰা নতুন চৰকাৰখনে। ৰাজ্যখনত ১ লাখ চৰকাৰী পদত নিযুক্তি দিয়া হ’ব বুলি ইতিমধ্যে ঘোষণা কৰিছে মুখ্যমন্ত্ৰী শুভেন্দু অধিকাৰীয়ে। পশ্চিমবংগত চৰকাৰী চাকৰিৰ বাবে প্ৰস্তুতি চলাই থকা যুৱ-যুৱতীসকলৰ বাবে সেয়ে দীৰ্ঘসময়ৰ মূৰত আহিছে ভাল খবৰ। সোমবাৰে বিধানসভাত নৱগঠিত চৰকাৰখনে দাখিল কৰা প্ৰথম বাজেটত এই গুৰুত্বপূৰ্ণ ঘোষণা কৰা হয়।
কি কি বিভাগত হ’ব নিযুক্তি?
ৰাজ্যখনৰ বাজেট ভাষণত বিত্তমন্ত্ৰী স্বপন দাসগুপ্তই জনোৱা মতে, মুঠ ১ লাখ নতুন চৰকাৰী পদত নিযুক্তি দিয়া হ’ব। ইয়াৰে সৰ্বাধিক পদ শিক্ষা আৰু আৰক্ষী বিভাগত পূৰণ কৰা হ’ব। তথ্য অনুসৰি, ৫০ হাজাৰ শিক্ষক পদ আৰু ২০ হাজাৰ আৰক্ষী পদত নিয়োগ প্ৰক্ৰিয়া অতি শীঘ্ৰেই সম্পন্ন কৰা হ’ব। বাকী থকা ৩০ হাজাৰ পদ ৰাজ্যৰ বিভিন্ন চৰকাৰী বিভাগত পূৰণ কৰাৰ পৰিকল্পনা কৰা হৈছে।
মহিলাসকলৰ বাবে ৩৩ % সংৰক্ষণ
চৰকাৰে মহিলা সশক্তিকৰণৰ লক্ষ্যৰে চৰকাৰী চাকৰিত মহিলাসকলৰ বাবে ৩৩ % সংৰক্ষণ কৰাৰ কথা ঘোষণা কৰিছে। এই পদক্ষেপৰ ফলত চৰকাৰী বিভাগসমূহত মহিলাৰ অংশগ্ৰহণ বৃদ্ধি পাব বুলি আশা কৰা হৈছে। ইয়াৰ উপৰিও, ৰাজ্যৰ প্ৰতিটো আৰক্ষী থানাত মহিলা হেল্প ডেস্ক স্থাপনৰো ব্যৱস্থা গ্ৰহণ কৰা হ’ব বুলি বাজেটত উল্লেখ কৰা হৈছে।
চৰকাৰী কৰ্মচাৰীৰ DA ২০ % বৃদ্ধিৰ ঘোষণা
বিভিন্ন বিভাগত খালী থকা পদসমূহ পূৰণৰ ঘোষণা কৰাৰ সমান্তৰালভাৱে ৰাজ্য চৰকাৰে চৰকাৰী কৰ্মচাৰীসকলৰ বাবেও আনিছে ভাল খবৰ। বাজেটত দৈনিক ভাট্টা ২০ শতাংশ বৃদ্ধি কৰাৰ সিদ্ধান্ত লোৱা হৈছে। ইয়াৰ ফলত কৰ্মচাৰীসকলৰ DA ১৮ %ৰ পৰা বৃদ্ধি হৈ ৩৮% হ’বগৈ। ইয়াৰ লগতে চিভিক ভলান্টিয়াৰ, গৃহৰক্ষী জোৱান আৰু গ্ৰীন আৰক্ষীৰ মাহিলী ভাট্টাও ২,০০০ টকাকৈ বৃদ্ধি কৰাৰ সিদ্ধান্ত গ্ৰহণ কৰা হৈছে। শুভেন্দু অধিকাৰী চৰকাৰৰ এই ঘোষণাই ৰাজ্যৰ চাকৰিপ্ৰত্যাশী যুৱসমাজ আৰু চৰকাৰী কৰ্মচাৰীসকলৰ মাজত উৎসাহৰ সৃষ্টি কৰিছে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
