অসম লাইভ২৪ঃ বক্সিঙৰ জগতত তেওঁ চিনাকী নাম। বক্সিঙক কেন্দ্ৰ কৰিয়েই তেওঁ ৰাজনীতিত প্ৰৱেশ কৰিছে। প্ৰথমে কংগ্ৰেছ, তাৰপিছত শেহতীয়াকৈ বিজেপিত যোগদান কৰিছে বক্সাৰ বিজেন্দৰ সিঙে। বুধবাৰে তেঁও বিজেপিত যোগদান কৰিছে। বিজেন্দৰ সিঙে নতুন দিল্লীৰ বিজেপিৰ সদৰ দফতৰলৈ গৈ সদস্যপদ গ্ৰহণ কৰিছে। বিজেন্দৰ সিঙে ২০১৯ চনৰ লোকসভা নিৰ্বাচনত কংগ্ৰেছৰ হৈ প্ৰতিদ্বন্দিতা কৰিছিল বিজেন্দৰ সিঙে। কিন্তু সেই নিৰ্বাচনত তেওঁ পৰাজয় বৰণ কৰে। দক্ষিণ দিল্লীৰ পৰা তেওঁক প্ৰাৰ্থিত্ব প্ৰদান কৰিছিল কংগ্ৰেছে। ২০১৯তেই তেঁও ৰাজনীতিত প্ৰৱেশ কৰিছিল।
আন্তৰ্জাতিক বক্সাৰ বিজেন্দৰ সিঙে কংগ্ৰেছৰ পাছত বিজেপিত যোগ দিছে। বৰ্তমান বিজেন্দৰ সিঙৰ বাবেই বিজেপিয়ে হাৰিয়ানা আৰু পশ্চিম উত্তৰপ্ৰদেশৰ জাঁট সম্প্ৰদায়ৰ সমৰ্থন লাভ কৰিব পাৰে বুলি ৰাজনৈতিক বিশ্লেষকে মন্তব্য দাঙি ধৰিছে। বিজেপিত যোগদান কৰাৰ পাছতেই বিজেন্দৰ সিঙে কয়, ‘২০১৯ চনত মই কংগ্ৰেছৰ হৈ নিৰ্বাচনত প্ৰতিদ্বন্দিতা কৰিছিলো। মই দেশৰ উন্নয়ন আৰু অগ্ৰগতিৰ বাবে কাম কৰিব বিচাৰো। কংগ্ৰেছ এৰি বিজেপিত যোগদান কৰিছো। কাৰণ এটাই মই মানুহৰ বাবে কাম কৰিব খোজো। বিজেপিত যোগদান কৰাৰ কাৰণ হৈছে মই ক্ৰীড়াক্ষেত্ৰৰ উন্নয়ন সাধিব খোজো।’
উল্লেখ্য যে বিজেন্দৰ সিঙে প্ৰায়েই তেওঁ ছচিয়েল মিডিয়া হেণ্ডেলত বিজেপিৰ বিৰুদ্ধে বিভিন্ন অভিযোগ আনিছিল। কৃষক আন্দোলনকো তেওঁ মুকলিকৈ সমৰ্থন কৰি আহিছিল। এই সময়ত বিজেপিৰ প্ৰতিটো কামকাজকেই তেওঁ সমালোচনা কৰি আছিল। কিন্তু বিগত কেইটামান দিন ধৰি বহুতেই চৰ্চা চলাইছিল যে বিজেন্দৰে আপত যোগদান কৰিব। বিজেপিলৈ বিজেন্দৰ যাব কোনোৱে কল্পনাও কৰিব পৰা নাছিল। সকলোকে অবাক কৰি তেওঁ বিজেপিত যোগদান কৰিছে।
বক্সাৰ বিজেন্দৰ সিং হাৰিয়ানাৰ জাঠ সম্প্ৰদায়ৰ এখন বলিষ্ঠ মুখ। এনে পৰিস্থিতিত বিজেপিয়ে হাৰিয়ানা আৰু পশ্চিম উত্তৰপ্ৰদেশৰ বাবেই তেওঁক বিজেপিলৈ অহাৰ বাবে ৰাস্তা খুলি দিছে বুলিও বহুতে চৰ্চা চলাইছে। অৱশ্যে বিজেপিয়ে তেওঁক এইবাৰ নিৰ্বাচনত প্ৰাৰ্থী হিচাপে কোনোবা সমষ্টিত প্ৰক্ষেপ কৰিবনে সেয়াহে ডাঙৰ প্ৰশ্ন হৈ পৰিছে বহুতৰে মনত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
