অসম লাইভ২৪ঃ ৰাজ্যত বাল্যবিবাহক লৈ অব্যাহত আছে অভিযান। অভিযানক বহুতেই সমৰ্থন কৰিছে যদিও বহুতেই আকৌ বিষয়টোক লৈ চৰকাৰক সমালোচনাও কৰিছে। লেখক ইছমাইল হুছেইনেও বিষয়টোক লৈ মন্তব্য প্ৰকাশ কৰিছে। ইছমাইল হুছেইনে ফেচবুক পোষ্টত লিখিছে, ‘কম বয়সত বিয়াঃ বেমাৰটো পুৰণি৷ গতিকে ১৮বছৰটো কঠোৰভাৱে মানি চলিব লাগে৷মই ২১বছৰৰ পক্ষপাতী৷বেমাৰটো কেৱল সনাতনধৰ্মীৰ মাজতেই নাছিল,ইছলামধৰ্মীৰ মাজতো আছিল৷আহক,বেমাৰটো নাইকিয়া কৰিবলৈ আইনক সহায় কৰোঁ৷’
ইপিনে ইছমাইল হুছেইনে কমবয়সতে বিয়া হোৱা নাৰীৰ এখন লিষ্টো পোষ্টটোত দাঙি ধৰিছে। তেওঁ দাঙি ধৰা তথ্যত প্ৰথমেই আছে কবি পদ্মাৱতী দেৱী ফুকননীৰ নাম। তেওঁ ৯ বছৰ বয়সতেই বিবাহপাশত আৱদ্ধ হৈছিল। ১৮৬২ চনত সম্পন্ন হৈছিল এই বিবাহ। ইয়াৰ পাছতেই আছে কবি নলিনীবালা দেৱীৰ নাম। নলিনীবালা দেৱীয়েও ১৯০৭ চনত ১১ বছৰ বয়সতে বিবাহপাশত আৱদ্ধ হৈছিল। সুৰবালা বৰদলৈ অৰ্থাৎ গোপীনাথ বৰদলৈৰ পত্নীয়েও ১৩ বছৰ বয়সতে আৱদ্ধ হৈছিল বিবাহপাশত। একেদৰে বিষ্ণুৰাম মেধিয়েও বাল্য বিবাহেই কৰিছিল। বিষ্ণুৰাম মেধীৰ পত্নী নিৰ্মলা ডেকাৰ বিবাহৰ সময়ত বয়স হৈছিল মাত্ৰ ১১ বছৰ।
বিখ্যাত কবি তথা লেখক ৰবীন্দ্ৰনাথ ঠাকুৰেও বাল্য বিবাহ কৰাইছিল। ৰবীন্দ্ৰনাথ ঠাকুৰৰ সৈতে বিবাহপাশত আৱদ্ধ হোৱাৰ সময়ত তেওঁৰ পত্নী মৃণালিনী দেৱীৰ বয়স আছিল মাত্ৰ ৯ বছৰ। মৃণালিনী দেৱী অসম সাহিত্যসভাৰ প্ৰাক্তন উপ-সভানেত্ৰীগৰাকীয়েও বাল্য বিবাহেই কৰিছিল। বিবাহৰ সময়ত তেওঁৰ বয়স হৈছিল মাত্ৰ ১২ বছৰ।
উল্লেখ্য যে, ১৯১১ চনৰ লোকপিয়ল মতে অসমত সনাতনধৰ্মীৰ মাজত ৫ বছৰলৈ বিয়া হোৱা ছোৱালী ১০০ জনীৰো অধিক আছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
