চৌদিশে হাহাকাৰ, গেমিং জ’নত ভয়ংকৰ অগ্নিকাণ্ড, ৯ শিশুসহ জীৱন্তে অগ্নিদগ্ধ হৈ নিহত ২৭ গৰাকী
অতিকে শিহৰণকাৰী তথা এক মৰ্মান্তিক ঘটনা সংঘটিত হৈছে। এটা গেমিং জ’নত ভয়ংকৰ অগ্নিকাণ্ড সংঘটিত হৈ মৃত্যু হৈছে বহু লোকৰ। শনিবাৰ ২৫ মে’ৰ সন্ধিয়া গুজৰাটৰ ৰাজকোট চহৰৰ এটা গেমিং জ’নত বিধ্বংসী অগ্নিকাণ্ড সংঘটিত হৈছে।
বৰ্তমানলৈ প্ৰাপ্ত খবৰ অনুসৰি বিধ্বংসী অগ্নিকাণ্ডটোৰ ফলত মৃতকৰ সংখ্যা বৃদ্ধি পাইছে। ৯ টা শিশুসহ মুঠ ২৭গৰাকী লোক অগ্নিদগ্ধ হৈ মৃত্যুক আঁকোৱালি লৈছে এই অগ্নিকাণ্ডটোৰ ফলত। আনহাতে আহতো হৈছে বহু লোক।
কেন্দ্ৰীয় স্বাস্থ্যমন্ত্ৰী ডাঃ মনসুখ মাণ্ডবিয়াই এইমছ ৰাজকোটত ৩০খন আই চি ইউ বিচনা প্ৰস্তুত কৰি এই অগ্নিকাণ্ডত আহতসকলক চিকিৎসা প্ৰদান কৰা বুলি জানিবলৈ দিয়ে। ইয়াৰ সমান্তৰালকৈ এইমছকো সম্পূৰ্ণ সহায় আগবঢ়াবলৈ নিৰ্দেশ দিয়া হৈছে বুলিও তেওঁ কয়।
প্ৰধানমন্ত্ৰী নৰেন্দ্ৰ মোদীয়েও এই ঘটনাত শোক প্ৰকাশ কৰি কয় যে, “ৰাজকোটত সংঘটিত হোৱা অগ্নিকাণ্ডৰ দুৰ্ঘটনাত অত্যন্ত দুখী। মোৰ সমবেদনা আপোনজনক হেৰুৱাই পেলোৱা সকলোৰে সৈতে। আহতসকলৰ বাবে প্ৰাৰ্থনা। স্থানীয় প্ৰশাসনে ক্ষতিগ্ৰস্তসকলক সকলো ধৰণৰ সাহায্য প্ৰদানৰ বাবে কাম কৰি আছে।” .
আনহাতে অগ্নিকাণ্ড সংঘটিত হোৱা টি আৰ পি গেম জ’নৰ মালিক আৰু মেনেজাৰক ইতিমধ্যে আটক কৰা হৈছে। সহকাৰী আৰক্ষী আয়ুক্ত বিনায়ক পেটেলে কয় যে কেইবাটাও মৃতদেহ সম্পূৰ্ণৰূপে জ্বলি গৈছে যাৰ বাবে চিনাক্ত কৰাটো কঠিন।
টি আৰ পি গেমিং জ’নৰ এটা অস্থায়ী গৃহত সংঘটিত হৈছিল এই অগ্নিকাণ্ড। গ্ৰীষ্মকালীন ছুটীৰ বাবে সেই স্থানত বৃহৎ সংখ্যক উপস্থিত থকা বুলিও চাঞ্চল্যকৰ তথ্য পোহৰলৈ আহিছে।। গেম জ’নত কৰ্তৃপক্ষৰ পৰা প্ৰয়োজনীয় অনুজ্ঞাপত্ৰ আছিল নে নাই সেইটো নিশ্চিত কৰিবলৈ ৰাজ্য চৰকাৰে তদন্তকাৰী দল গঠন কৰিছে।
ৰাজ্য চৰকাৰে অগ্নিকাণ্ডত নিহত লোকসকলৰ পৰিয়াললৈ ৪ লাখকৈ টকাৰ আৰ্থিক সাহায্য ঘোষণা কৰিছে লগতে আহতসকলৰ পৰিয়াললৈ ৫০ হাজাৰ টকাৰ আৰ্থিক সাহায্য প্ৰদান কৰিছে।
অগ্নিনিৰ্বাপক বাহিনীৰ বিষয়াসকলৰ মতে, এই বৃহৎ অগ্নিকাণ্ডৰ আঁৰৰ কাৰণ এতিয়াও জানিব পৰা হোৱা নাই।
এই অগ্নিকাণ্ডৰ পৰিপ্ৰেক্ষিতত গুজৰাট আৰক্ষীয়ে জ্যেষ্ঠ আৰক্ষী বিষয়াসকলক ৰাজ্যৰ সকলো গেমিং জ’ন পৰিদৰ্শন কৰাৰ লগতে অগ্নিনিৰ্বাপক বাহিনীৰ অনুমতি অবিহনে চলি থকা জ’নসমূহ বন্ধ কৰিবলৈ নিৰ্দেশ দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
