অসম লাইভ২৪ঃ ধোঁৱাই ছানি ধৰিছে চিলিৰ আকাশ। বনজুইত জ্বলি ছাই হৈ গৈছে বহু ঘৰ, গাড়ী, দোকান। বনজুইয়ে প্ৰাণ কাঢ়িছে শতাধিক মানুহৰ। চৰকাৰী তথ্য অনুসৰি দাৱানলে বৰ্তমানলৈকে প্ৰাণ কাঢ়িছে ১১২জন মানুহৰ। সংবাদ সংস্থা এএফপিৰ প্ৰতিবেদন অনুসৰি মধ্য চিলিৰ পাহাৰত এই দাৱানলৰ সূত্ৰপাত। চিলিৰ এগৰাকী শীৰ্ষ বিষয়াই দিয়া বিশেষ টুইটত উল্লেখ কৰিছে যে মৃতকৰ সংখ্যা দিনকদিনে বাঢ়িয়েই আছে। ১১২ জনৰ ইতিমধ্যেই মৃত্যু হৈছে। মৃতকৰ সংখ্যা আৰু বৃদ্ধি পোৱাৰ পূৰ্ণ সম্ভাৱনা আছে বুলি জনাইছে চিলিৰ ৰাষ্ট্ৰপতি গেব্ৰিয়েল বোৰিকে। শনিবাৰে বিয়লিৰ পৰা হেলিকপ্টাৰেৰে ক্ষতিগ্ৰস্থ এলেকাসমূহ পৰিদৰ্শন কৰিছে ৰাষ্ট্ৰপতি গেব্ৰিয়েলে। ২০১০ চনত চিলিৰ ভূমিকম্প আৰু ছুনামীৰ ঘটনাত প্ৰায় ৫০০ জনৰ মৃত্যু হৈছে। দাৱানলৰ কাৰণে সৃষ্ট অগ্নিকাণ্ড সেই দেশৰ সকলোতকৈ ডাঙৰ দুৰ্ঘটনা বুলি জনাইছে প্ৰেছিডেণ্ট বোৰিকে।
পূব প্ৰশান্ত মহাসাগৰৰ পাৰৰ দক্ষিণ আমেৰিকা মহাদেশৰ পশ্চিম উপকূল ঘেৰি চিলি, পেৰু, ইকুয়েডত বছৰৰ শেষৰ ভাগত এক প্ৰকাৰৰ উষ্ণ দক্ষিণমুখী সোঁতৰ সৃষ্টি হয়। ইয়াৰ নাম হৈছে ‘এল নিনো’। গ্ৰীষ্মমণ্ডলীয় সেই তাপপ্ৰবাহৰ কাৰণে সেই দাবানলৰ সৃষ্টি হৈছে বুলি বিশেষজ্ঞসকলে জনাইছে। চলিত বছৰত লেটিন আমেৰিকাৰ অন্যান্য দেশসমূহত ইয়াৰ প্ৰভাৱ পৰে। চিলিৰ গৃহমন্ত্ৰী কেৰলিনা তোহাৰৰ মতে এই দাবানল চিলিৰ ইতিহাসত সকলোতকৈ ভয়াৱহ। দেওবাৰৰ দিনটোতেই মধ্য আৰু দক্ষিণ চিলিৰ প্ৰায় ৬৪ হাজাৰ একৰ মাটিত লগা জুইয়ে সকলো পুৰি ছাই কৰি পেলাইছে। চিলিৰ এই জুইয়ে সমুদ্ৰতীৰবৰ্তী কেইবাখনো চহৰকো ক্ষতিগ্ৰস্থ কৰিছে।
১৯৩১ চনত নিৰ্মাণ কৰা চিলিৰ এখন বিখ্যাত উদ্ভিদ উদ্যানো পুৰি ছাই হৈ যোৱা বুলি তথ্যপ্ৰকাশ কৰিছে চিলিৰ গৃহমন্ত্ৰীয়ে। ভিনা দেলমাৰ চহৰৰ প্ৰায় ১৬০০ মানুহৰ ঘৰ জ্বলি ছাই হৈ গৈছে। চহৰজুৰি এতিয়া কেৱল অসহায়তাৰ ছবি ফুটি উঠিছে। ঘৰ হেৰুৱাই হাহাকাৰ কৰি উঠিছে বহু লোকে। বিগত চাৰিদিন ধৰি জ্বলি থকা বনজুইয়ে মৃত উপত্যকাত পৰিণত কৰিছে ভিনাদেল মাৰ চহৰক। চহৰখনৰ চৌদিশে বগা কাপোৰেৰে ঢাকি ৰখা হৈছে বহু মৃতদেহ। সেই চহৰৰেই এজন স্থানীয় মহিলা ৰোজানা এভেণ্ডেনোয়ে ভয়ংকৰ জুইৰ বৰ্ণনা দাঙি ধৰিছে।
পেছাত ৰান্ধনী ৬৩বছৰীয়া ৰোজানা। তেওঁ সেই চহৰৰ পৰা কিছু আঁতৰত থকাৰ বাবে জীৱনটো যেনেতেনে ৰক্ষা পৰিল। ঘৰত তেওঁৰ স্বামী অকলে আছিল। বহু ঘণ্টাৰ চেষ্টাত তেওঁৰ স্বামীক সেই ভয়ংকৰ জুইৰ মাজৰ পৰা উলিয়াই আনিবলৈ সক্ষম হৈছে। স্বামী আৰু তেওঁৰ প্ৰাণ ৰক্ষা পৰিলেও ঘৰ-দুৱাৰ সকলো জাহ গৈছে জুইত। ৰোজানাই এই সন্দৰ্ভত কয়, ‘এই জুই সাংঘাতিক ভয়ানক। মই ঘৰলৈ ঘূৰি যাব নোৱাৰিলো। ঘৰত মোৰ স্বামী অকলে আছিল। জুই খুব খৰতকীয়াকৈ বাঢ়ি গৈছিল। তেওঁ যেনেতেনে পলাই আহিছে। কিন্তু আমাৰ এতিয়া একো নাই। কেৱল প্ৰাণ দুটাহে বাচি আহিছে।
ৰোজানাৰ দৰে একেই অভিজ্ঞতা ভগাই লৈছে চহৰৰ বহুকেইজন লোকেই। এই জুইৰ বাবেই মধ্য চিলিৰ কেইবাটাও অংশত তাপমাত্ৰা উল্লেখনীয়ভাৱে বৃদ্ধি পাইছে। চিলিৰ বিপৰ্যয় মোকাবিলা বাহিনীৰ সদস্যই দিনৰাত এক কৰি অগ্নিনিৰ্বাপনৰ চেষ্টা অব্যাহত ৰাখিছে। ৩১ টা অগ্নিনিৰ্বাপক হেলিকপ্টাৰেৰে সেই স্থানকেইটিত জুই নুমুওৱাৰ চেষ্টা চলাই থকা হৈছে। প্ৰায় ১৪০০ উদ্ধাৰকাৰী আৰু ১৩০০ সেনাই জুই নুমুওৱাৰ চেষ্টা অব্যাহত ৰাখিছে। জীৱ্ন্তে বহু লোকক উদ্ধাৰ কৰাৰ বিপৰীতে মৃতদেহো উদ্ধাৰ কৰিছে দলটোৱে।
দেওবাৰৰ বিয়লিলৈকে মৃতকৰ সংখ্যাই ১০০ অতিক্ৰম কৰিছে। ইয়াৰ মাজতে ৩২ টা মৃতদেহ চিনাক্ত কৰা গৈছে। চিলিৰ দুৰ্যোগ ব্যৱস্থাপনা বিভাগৰ প্রধান আলভাৰো হৰমাজাবলে জনোৱা অনুসৰি দেওবাৰ দুপৰীয়া পৰ্যন্ত ৩৪ টা স্থান বনজুইয়ে গ্ৰাস কৰিছে। ইয়াৰ মাজতে ৪২ টা এলেকাত জুই নিয়ন্ত্ৰণো কৰিছে। হাজাৰ হাজাৰ লোকক সেই স্থান খালী কৰি নিৰাপদ স্থানলৈ লৈ যোৱা হৈছে। ক্ষতিগ্ৰস্থসকলক আৰ্থিক সাহায্য দিয়াৰো প্ৰতিশ্ৰুতি দিছে চিলিৰ চৰকাৰে। চিলিৰ এই বিপদৰ সময়ত কাষত থিয় হোৱাৰ প্ৰতিশ্ৰুতি দিছে আৰ্জেণ্টিনাইয়ো।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
