অসম চৰকাৰৰ কেবিনেট বৈঠকৰ পিছতে মুখ্যমন্ত্ৰী হিমন্ত বিশ্ব শৰ্মাই ৰাজ্যবাসীৰ বাবে কেইবাটাও গুৰুত্বপূৰ্ণ ঘোষণা কৰে। বিশেষকৈ বিদেশী ভাষা শিকি বিদেশত চাকৰি কৰিবলৈ আগ্ৰহী যুৱক-যুৱতী, নতুনকৈ চৰকাৰী চাকৰি লাভ কৰা প্ৰাৰ্থী আৰু পঞ্চায়তসমূহক লৈ কেইবাটাও নতুন সিদ্ধান্তৰ কথা ঘোষণা কৰে মুখ্যমন্ত্ৰীয়ে।
বিদেশত চাকৰিৰ বাবে যুৱক-যুৱতীক ১.৫০ লাখ টকাৰ সহায়
বিদেশী ভাষা শিকি বিদেশলৈ গৈ চাকৰি কৰিব বিচৰা অসমৰ যুৱক-যুৱতীসকলৰ বাবে চৰকাৰে বিশেষ আৰ্থিক সহায় আগবঢ়োৱাৰ কথা ঘোষণা কৰিছে। এই আঁচনিৰ অধীনত যোগ্য যুৱক-যুৱতীয়ে মুঠ ১ লাখ ৫০ হাজাৰ টকা পৰ্যন্ত লাভ কৰিব পাৰিব। ঘোষণা অনুসৰি, এই ধন কেইবাটাও পৰ্যায়ত প্ৰদান কৰা হ’ব। প্ৰথম পৰ্যায়ত তিনিমাহৰ বাবে ৩০ হাজাৰ টকা দিয়া হ’ব। ইয়াৰ পিছত ছয় মাহ সম্পূৰ্ণ হোৱাৰ পাছত পুনৰ ৩০ হাজাৰ টকা লাভ কৰিব। বিদেশী ভাষাৰ প্ৰশিক্ষণত উত্তীৰ্ণ হোৱাৰ পাছত ৪০ হাজাৰ টকা আৰু চাকৰি লাভ কৰি বিদেশলৈ যোৱাৰ সময়ত ৫০ হাজাৰ টকা প্ৰদান কৰা হ’ব। অৰ্থাৎ বিদেশী ভাষা শিকি আন্তঃৰাষ্ট্ৰীয় চাকৰিৰ বজাৰত প্ৰৱেশ কৰিব বিচৰা ৰাজ্যৰ যুৱক-যুৱতীৰ বাবে এই সিদ্ধান্ত যথেষ্ট গুৰুত্বপূৰ্ণ হিচাপে বিবেচিত হৈছে।
চৰকাৰী চাকৰিৰ নিযুক্তিক লৈ চৰকাৰৰ নতুন সিদ্ধান্ত
এতিয়াৰে পৰা বাধ্যতামূলক হ’ব পুলিচ ভেৰিফিকেশ্যন চাৰ্টিফিকেট। নিযুক্তি পোৱাৰ ৬ মাহৰ ভিতৰত দাখিল কৰিব লাগিব PVC। PVC বিচাৰি প্ৰাৰ্থীয়ে যাব নালাগে আৰক্ষী চকীলৈ। প্ৰাৰ্থীক PVC দিয়াৰ দায়িত্ব লব লাগিব আৰক্ষীয়ে। PVC জমা নিদিয়া পৰ্যন্ত চাকৰিক নিয়মীয়া কৰণ বুলি ধৰা নহ’ব। পূৰ্বে কেৱল আদালতৰ পৰা জমা দিব লাগিছিল ক’ৰ্ট এফিডেভিট। SCৰ সিদ্ধান্ত মৰ্মে পুনৰ প্ৰয়োজন হ’ব PVC। ৰাজ্যিক কেবিনেটত ঘোষণা মুখ্য়মন্ত্ৰীৰ। চৰকাৰী চাকৰিত নিযুক্তিৰ ক্ষেত্ৰত প্ৰাৰ্থীৰ তথ্য আৰু পটভূমি পৰীক্ষণ অধিক সুশৃংখল কৰাৰ লক্ষ্যৰে এই নতুন নিয়ম প্ৰৱৰ্তন কৰা হৈছে বুলি জানিব পৰা গৈছে।
পঞ্চায়তৰ কামতো নতুন নিয়ম
কেবিনেট বৈঠকৰ পাছত ৰাজ্যৰ পঞ্চায়তসমূহক লৈও নতুন নিয়মৰ কথা ঘোষণা কৰে মুখ্যমন্ত্ৰীয়ে। ৰাজ্য চৰকাৰে প্ৰতিখন পঞ্চায়তৰ বাবে নিৰ্দিষ্ট কামৰ তালিকা নিৰ্ধাৰণ কৰিছে। নতুন নিয়ম অনুসৰি, পঞ্চায়তসমূহে পাঁচটা কাম চৰকাৰৰ পৰা পৃথক অনুমোদন নোলোৱাকৈ স্বাধীনভাৱে কৰিব পাৰিব। ইয়াৰ ভিতৰত গ্ৰামাঞ্চলৰ পথ নিৰ্মাণ, বজাৰ-হাট নিৰ্মাণ, শ্মশানৰ উন্নয়ন বা নিৰ্মাণ, বিদ্যালয়ৰ বাউণ্ডাৰী নিৰ্মাণ আৰু জীম নিৰ্মাণ। উল্লেখ্য যে সংবাদমেলত এতিয়াৰে পৰা প্ৰতিখন গাঁৱতেই চৰকাৰী GYM, ৱেলনেছ চেণ্টাৰ হব বুলি ঘোষণা কৰে মুখ্যমন্ত্ৰীয়ে।
অৱশ্যে নিৰ্ধাৰিত পাঁচটা কামৰ বাহিৰে আন কোনো উন্নয়নমূলক কাম পঞ্চায়তে নিজাববীয়াকৈ কৰিব নোৱাৰিব। তেনে কামৰ বাবে চৰকাৰৰ অনুমোদন ল’ব লাগিব।
এইক্ষেত্ৰত সংশ্লিষ্ট পঞ্চায়তক অনুমোদন প্ৰদান কৰিব জিলাখনৰ জিলা আয়ুক্তই। ৰাজ্য চৰকাৰৰ এই নতুন ব্যৱস্থাৰ জৰিয়তে পঞ্চায়তৰ কাম-কাজ অধিক স্পষ্ট কৰাৰ লগতে কোনবোৰ কাম স্থানীয়ভাৱে কৰিব পাৰিব আৰু কোনবোৰ কামৰ বাবে প্ৰশাসনৰ অনুমোদন প্ৰয়োজন হ’ব, সেই বিষয়ে এক নিৰ্দিষ্ট কাঠামো প্ৰস্তুত কৰাৰ চেষ্টা কৰা হৈছে। কেবিনেট বৈঠকৰ পাছত মুখ্যমন্ত্ৰীৰ এই ঘোষণাসমূহে ৰাজ্যৰ যুৱসমাজ, চৰকাৰী চাকৰিপ্ৰত্যাশী আৰু পঞ্চায়ত ব্যৱস্থাৰ ওপৰত যথেষ্ট প্ৰভাৱ পেলাব বুলি আশা কৰা হৈছে। ইয়াৰ উপৰিও জাগীৰোডত এখন পঞ্চতাৰকা হোটেল নিৰ্মাণৰ কথাও ঘোষণা কৰে মুখ্যমন্ত্ৰীয়ে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
