জীৱনে সন্মুখীন কৰোৱা কঠিনতকৈ কঠিন পৰীক্ষাতো হাৰি ভাগৰি নপৰাজনেই প্ৰকৃতাৰ্থত জীৱনযুঁজৰ আচল সৈনিক। যাক ইংৰাজীত ক’ব পাৰি the real Hero বুলি। জীৱনৰ কঠিন পৰিস্থিতিৰে মোকাবিলা কৰি সফলতাৰ উচ্চতম শিখৰত আৰোহণ কৰিবলৈ লাগে অদম্য মানসিক শক্তি, নিজৰ দেহৰ ঘামক সোণ কৰিব পৰা মানসিকতা, যিকোনো পৰিস্থিতিতে হাৰ নমনা মানসিকতা আৰু সঠিক সময়ত সঠিক সিদ্ধান্ত ল’ব পৰা ক্ষমতা। চলিত কমনৱেলথ গেমছত ভাৰতৰ হৈ প্ৰথমটো পদক লাভ কৰা ঝাণ্ডু কুমাৰৰ জীৱন পৰিক্ৰমা ইয়াৰ অন্যতম উদাহৰণ।
চলিত CWGত ভাৰতৰ হৈ প্ৰথমটো পদক
বিহাৰৰ ঝণ্ডু কুমাৰে গ্লাছগো অনুষ্ঠিত হৈ থকা কমনৱেলথ গেমছত ভাৰতৰ হৈ আনুষ্ঠানিকভাৱে প্ৰথমটো পদক দখল কৰি ইতিহাসত নাম সন্নিৱিষ্ট কৰিবলৈ সক্ষম হৈছে। পেৰা পাৱাৰলিফ্টিং শাখাত ঝণ্ডু কুমাৰে প্ৰথমে ১৮১ কিলোগ্ৰাম তাৰ পিছত ১৯০ কিলোগ্ৰাম সফলতাৰে উত্তোলন কৰে। অৱশ্যে তৃতীয় প্ৰচেষ্টাত ১৯৬ কিলোগ্ৰামৰ টাৰ্গেট লৈ ডাইচলৈ অহা ঝণ্ডু কুমাৰে ফাউল খেলি স্বৰ্ণৰ স্বপ্ন বুকুত লৈয়ে অভিযান সামৰিবলৈ বাধ্য হয়। স্বৰ্ণ জয় কৰিব নোৱাৰিলেও পেৰা পাৱাৰলিফ্টাৰজনৰ হাতলৈ আহে ব্ৰঞ্জৰ পদক। ইয়াৰ লগে লগে চলিত কমনৱেলথ গেমছত ভাৰতৰ হৈ আনুষ্ঠানিকভাৱে পদক দখল কৰা প্ৰথমজন খেলুৱৈত পৰিণত হয় ঝণ্ডু কুমাৰ। অৱশ্যে কমনৱেলথ গেমছ আৰম্ভ হোৱাৰ পূৰ্বেই অসম কন্যা লাভলীনাৰ বাবে ন্যূনতম ব্ৰঞ্জ হলেও নিশ্চিত হৈ আছে। কিয়নো গ্ৰুপ পৰ্যায়ত বক্সাৰগৰাকীয়ে বাই লাভ কৰি ইতিমধ্যে ছেমি ফাইনেললৈ উন্নীত হৈছে।
জীৱনৰ প্ৰতিটো খোজতেই আছিল সংগ্ৰাম
ঝাণ্ডু কুমাৰৰ শিশুকালৰ পৰাই জীৱনৰ প্ৰতিটো খোজেই যেন সংগ্ৰামৰ অন্য এটি নাম। ঝাণ্ডু কুমাৰ জীৱনটো অভাৱ-অনাটন, বঞ্চনা, ক্ষুধা, ত্যাগ আৰু অদম্য অধ্যৱসায়ৰ দীঘলীয়া ইতিহাস। বিহাৰৰ নালন্দা জিলাৰ হৰনৌতত জন্মগ্ৰহণ কৰা ঝাণ্ডু সৰুৰে পৰাই প’লিঅ’ত আক্ৰান্ত হৈছিল। বহুতে হয়তো সেই অৱস্থাত জীৱনৰ সপোনবোৰেই এৰি দিলেহেঁতেন, কিন্তু তেওঁ সহজেই হাৰি যোৱা ল’ৰা নাছিল। পিতৃয়ে শাক-পাচলি বিক্ৰী কৰি ডাঙৰ পৰিয়ালটো পোহ-পাল দিছিল। শিশুকালৰে পৰা ঝাণ্ডুৱেও পিতৃৰ সৈতে ট্ৰাইচাইকেল চলাই বিক্ৰী কৰিছিল শাক-পাচলি। দৰিদ্ৰতাৰ সৈতে যুঁজ দিয়াটো আছিল তেওঁৰ দৈনন্দিন জীৱনৰ অবিচ্ছেদ্য অংগ।
ছলমান খানৰ ‘দাবাং’ছবিয়ে দিছিল অনুপ্ৰেৰণা
এদিন ছলমান খান অভিনীত ‘দাবাং’ ছবিখন চাই ঝাণ্ডু কুমাৰৰ মনত কিবা এটা কৰাৰ সপোন এটাই বাহ লয়। ভৰি দুখন কাৰ্যক্ষম নহলেও ওপৰৰ সুঠাম দেহটোৰে কি কৰিব পাৰি তাকেই ভাবি অৱশেষত পেৰা পাৱাৰলিফ্টিঙৰ বিষয়ে কিছু জ্ঞান আহৰণ কৰিলে। সেই সময়ত ঝণ্ডুৱে পিতৃৰ শাক-পাচলি দোকানত সহায় কৰাৰ উপৰিও চলাইছিল ই-ৰিক্সা। ভবা মতেই কাম, ই-ৰিক্সা, শাক-পাচলি দোকানৰ সমান্তৰালভাৱে দৈনিক প্ৰয়োজনীয় অনুশীলন ঘৰুৱাভাৱেই কৰাৰ ব্যৱস্থা কৰিলে ঝাণ্ডু কুমাৰে। নিজৰ এটা মোবাইল ফোনো নথকা ঝাণ্ডু কুমাৰে বন্ধুৰ ফোনত ব্যায়ামৰ ভিডিঅবোৰ চাই ঘৰতে অনুশীলন আৰম্ভ কৰে। ব্যায়ামৰ বাবে প্ৰয়োজনীয় খাদ্যৰ অভাৱে প্ৰায়ে জুৰুলা কৰিলেও হাৰ মনা নাছিল ঝাণ্ডু কুমাৰে।
প্ৰশিক্ষকে প্ৰশিক্ষণৰ উপৰিও কৰিছিল আৰ্থিক সহায়
ঝাণ্ডু কুমাৰৰ অধ্যাৱসায় আৰু আগ্ৰহ দেখি এসময়ত ভাৰোত্তলনৰ প্ৰশিক্ষক গৌতম সিঙে তেওঁৰ জীৱনত পোহৰৰ কিৰণ হৈ আহে। ঝাণ্ডু কুমাৰক কেৱল প্ৰয়োজনীয় প্ৰশিক্ষণ দিয়াই নহয়, আৰ্থিকভাৱেও সহায় কৰে। কিন্তু ইয়াৰ পিছতো প্ৰতিযোগিতাত অংশগ্ৰহণ কৰিবলৈ ধনৰ অভাৱ শেষ নহ’ল। অৱশেষত জীৱন নিৰ্বাহৰ একমাত্ৰ সম্বল বন্ধুৰ পৰা ঋণ লৈ কিনা ই-ৰিক্সাখনকেই এদিন বিক্ৰী কৰিবলৈ বাধ্য হয় পেৰা পাৱাৰলিফ্টাৰগৰাকীয়ে। অৱশেষত অসীম কষ্ট, অধ্যাৱসায় আৰু একাগ্ৰতা দেখি ভাগ্যয়ো যেন এদিন সুপ্ৰসন্ন হ’ল তেওঁৰ প্ৰতি।যিজন ল’ৰাই এদিন বজাৰত শাক-পাচলি বিক্ৰী কৰিছিল, যিজন লৰাই ই-ৰিক্সা চলাই পেট প্ৰৱৰ্তাইছিল, যিজনে পুষ্টিকৰ খাদ্যৰ অভাৱত অনুশীলন কৰিছিল, সেইজনেই আজি কমনৱেলথ গেমছৰ পদকজয়ী ঝাণ্ডু কুমাৰ।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
