চলিত বৰ্ষৰ মে’ত NEET প্ৰশ্নকাকত ফাদিল কেলেংকাৰীক কেন্দ্ৰ কৰি সৃষ্টি হোৱা বিতৰ্কই দেশৰ GenZৰ মাজত ব্যাপক অসন্তুষ্টিৰ সৃষ্টি কৰিছিল। পৰীক্ষা ব্যৱস্থাত স্বচ্ছতা, জবাবদিহিতা আৰু ন্যায় নিশ্চিত কৰাৰ দাবীত শিক্ষাৰ্থীসকলে যি ধৰণে সংগঠিতভাৱে আন্দোলন গঢ়ি তুলিছিল, শিক্ষাৰ্থীসকলৰ সেই ক্ষোভৰ উদ্গীৰণ আৰু শক্তিক সময়মতে কেন্দ্ৰীয় চৰকাৰে উপলব্ধি কৰিব নোৱাৰিলে। যাৰ ফলস্বৰূপে, ১৬ মে’ত সামাজিক মাধ্যমত আৰম্ভ হোৱা ‘ককৰোচ জনতা পাৰ্টী’ নামৰ ডিজিটেল আন্দোলনে জুলাইলৈকে আহি চৰকাৰৰ ওপৰত যথেষ্ট ৰাজনৈতিক চাপ সৃষ্টি কৰে। দেশজুৰি GenZ শিক্ষাৰ্থীৰ আন্দোলনৰ ফলত ২৫ জুলাইত শিক্ষামন্ত্ৰী ধৰ্মেন্দ্ৰ প্ৰধানে পদত্যাগ কৰিবলৈ বাধ্য হয়, চৰকাৰৰ এই সিদ্ধান্তত বহু ৰাজনৈতিক বিশ্লেষককো বিস্মিত কৰি তোলে।
এই ঘটনাৰ পিছতে জ্যোতিষ শাস্ত্ৰত বিশ্বাসীসকলে প্ৰধানমন্ত্ৰী মোদীৰ শপতগ্ৰহণৰ কুণ্ডলীৰ গ্ৰহ-নক্ষত্ৰৰ অৱস্থান সম্পৰ্কে অধ্যয়ন কৰিবলৈ আৰম্ভ কৰে। দেশৰ প্ৰখ্যাত জ্যোতিষবিদ নিৱন্ধকাৰ শচীন মলহোত্ৰাই ‘নৱভাৰত টাইমছ’ত উল্লেখ কৰা মতে মোদীৰ শপতগ্ৰহণ কুণ্ডলীত গ্ৰহ-নক্ষত্ৰৰ অৱস্থান কেনে সংক্ষেপতে দিয়া হল।
মোদীৰ শপতগ্ৰহণ কুণ্ডলীত গ্ৰহ-নক্ষত্ৰৰ অৱস্থান
শচীন মলহোত্ৰাই ‘নৱভাৰত টাইমছ’ত উল্লেখ কৰা মতে, প্ৰধানমন্ত্ৰী নৰেন্দ্ৰ মোদীয়ে ২০২৪ চনৰ ৯ জুন সন্ধিয়া ৭:২৩ বজাত তৃতীয়বাৰৰ বাবে প্ৰধানমন্ত্ৰী হিচাপে শপত গ্ৰহণ কৰাৰ সময়ত বৃশ্চিক লগ্ন উদয় হৈছিল। লগ্নেশ মংগল মেষ ৰাশিত ষষ্ঠ ভাবত অৱস্থান কৰিছিল আৰু শনিৰ তৃতীয় দৃষ্টিৰ প্ৰভাৱত আছিল। পঞ্চম ভাবত অৱস্থিত ৰাহুক জ্যোতিষবিদ শচীন মলহোত্ৰাই শিক্ষা আৰু ছাত্ৰ ৰাজনীতিৰ ক্ষেত্ৰত চৰকাৰৰ বাবে প্ৰতিকূল যোগ হিচাপে ব্যাখ্যা কৰিছে। একেসময়তে সপ্তম ভাবত বৃহস্পতি, বুধ, সূৰ্য আৰু শুক্ৰৰ যুগ্ম অৱস্থানৰ ফলত বিজেপিয়ে লোকসভা আৰু ৰাজ্যসভাত কিছুমান বিৰোধী সাংসদক নিজৰ মিত্ৰজোঁটলৈ আনি সংখ্যাগৰিষ্ঠতা শক্তিশালী কৰিব পাৰিলেও, যুৱ সমাজৰ মনোভাৱ অনুধাৱন কৰাত ব্যৰ্থ হোৱা বুলি জ্যোতিষবিদসকলে উল্লেখ কৰিছে। শচীন মলহোত্ৰাৰ ব্যাখ্যা অনুসৰি, বৰ্তমান শনিয়ে ৰাহুৰ ওপৰেৰে আৰু ৰাহুৱে শনিৰ ওপৰেৰে গমন কৰি আছে। ভৃগু জ্যোতিষৰ নিয়ম অনুসৰি এই অৱস্থাই শপতগ্ৰহণ কুণ্ডলীৰ শক্তি হ্ৰাস কৰি এই বছৰৰ নৱেম্বৰ মাহৰ আগতেই চৰকাৰৰ ভাবমূৰ্তিৰ ওপৰত পুনৰ ডাঙৰ সংকট সৃষ্টি কৰাৰ সম্ভাৱনা সূচায়।
মোদীৰ জন্ম কুণ্ডলীত ৰাজযোগ দুৰ্বল হোৱাৰ দাবী
জ্যোতিষবিদ শচীন মলহোত্ৰাৰ মতে, ১৯৫০ চনৰ ১৭ ছেপ্টেম্বৰ (উল্লেখিত তাৰিখ অনুসৰি) গুজৰাটৰ ভাডনগৰত জন্মগ্ৰহণ কৰা নৰেন্দ্ৰ মোদীৰ জন্ম কুণ্ডলীত একাধিক শক্তিশালী ৰাজযোগ বিদ্যমান। বৃশ্চিক লগ্নত লগ্নেশ মংগল আৰু নবমেশ চন্দ্ৰৰ সংযোগ, দশম ভাবত আত্মকাৰক শনি আৰু আমাত্যকাৰক শুক্ৰৰ জৈমিনী ৰাজযোগ, লগতে কাৰকাংশ লগ্নৰ পৰা দশম ভাবত বুধৰ অৱস্থানৰ বাবে জনপ্ৰিয়তা আৰু ৰাজসত্তাৰ শক্তিশালী যোগ গঠিত হোৱা বুলি উল্লেখ কৰা হৈছে। কিন্তু জ্যোতিষবিদসকলৰ দাবী অনুসৰি, বৰ্তমান ৰাহুৰ ওপৰত শনিৰ আৰু বৃহস্পতিৰ ওপৰত ৰাহুৰ প্ৰতিকূল গোচৰে এই ৰাজযোগসমূহৰ প্ৰভাৱ ক্ৰমাৎ দুৰ্বল কৰি তুলিছে। ইয়াৰ ফলত, বিশেষকৈ মংগলৰ মহাদশাৰ সময়ছোৱাত আগন্তুক দিনত চৰকাৰৰ সন্মুখত অধিক ৰাজনৈতিক জটিলতা দেখা দিব পাৰে বুলি জ্যোতিষীয় সম্ভাৱনা প্ৰকাশ কৰা হৈছে। শেষত এই দাবী কৰা হৈছে যে, এই বছৰৰ শেষৰ ফালে পুনৰ এবাৰ বৃহৎ গণআন্দোলনৰ আংশকা আছে আৰু সেয়া চৰকাৰৰ বাবে নতুন ৰাজনৈতিক প্ৰত্যাহ্বান কঢ়িয়াই আনিব পাৰে।
গুৰুত্বপূৰ্ণ: ওপৰৰ সকলো জ্যোতিষীয় বিশ্লেষণ আৰু সম্ভাৱনা বিভিন্ন জ্যোতিষবিদৰ দাবী আৰু মতামতৰ সাৰাংশহে মাথোঁ। জ্যোতিষ বিদ্যা বিজ্ঞানসম্মতভাৱে প্ৰমাণিত পূৰ্বানুমানৰ পদ্ধতি নহয়, সেয়ে এই দাবীসমূহক নিশ্চিত তথ্য হিচাপে Asom Live24-এ দাবী নকৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
