এফালে কংগ্ৰেছ এৰাৰ কথা বতৰা, আনফালে বিজেপি নেতাৰ সৈতে ছেলফী
কংগ্ৰেছৰ বিৰুদ্ধে ক্ৰমাৎ ক্ষোভৰ মাজতে তিৰুৱনন্তপুৰমৰ সাংসদ তথা দলটোৰ জনপ্ৰিয় নেতা শশী থাৰুৰে কেন্দ্ৰীয় মন্ত্ৰী তথা বিজেপি নেতা পীয়ুষ গোৱালৰ সৈতে এখন ফটো পোষ্ট কৰিছে। ফটোখন ভাৰত-ব্ৰিটেইনৰ বাণিজ্যিক চুক্তিৰ আলোচনাৰ পিছতে উঠা।
এই চেলফিত কংগ্ৰেছ নেতা শশী থাৰুৰক কেন্দ্ৰীয় মন্ত্ৰী পীয়ুষ গোৱাল আৰু ব্ৰিটিছ বাণিজ্য বিভাগৰ বিদেশ সচিব জনাথন ৰেইনল্ডছৰ সৈতে দেখা গৈছে। থাৰুৰৰ এই ছবিখনৰ পিছত পুনৰবাৰ কংগ্ৰেছত তেওঁৰ ভৱিষ্যত উপস্থিতি সন্দৰ্ভত আলোচনা তীব্ৰতৰ হৈ পৰিছে।
কংগ্ৰেছৰ সাংসদগৰাকীয়ে নিজৰ ফটোখন ইনষ্টাগ্ৰামত পোষ্ট কৰি কেপচনত লিখিছে, “বাণিজ্য আৰু উদ্যোগ মন্ত্ৰী পীয়ুষ গোৱালৰ উপস্থিতিত ব্ৰিটেইনৰ বাণিজ্য আৰু বাণিজ্য বিভাগৰ অধীনস্থ সচিব জনাথন ৰেইনল্ডছৰ সৈতে মত বিনিময় কৰাটো ভাল। বহুদিনৰ পৰা স্থবিৰ হৈ থকা এফটিএ আলোচনা পুনৰ আৰম্ভ হৈছে, যিটো অতি আদৰণীয়।”
https://x.com/ShashiTharoor/status/1894225091149664308
কেৰালা চৰকাৰৰ নীতিক প্ৰশংসা কৰাৰ পিছত কংগ্ৰেছ দলৰ সৈতে থাৰুৰৰ সম্পৰ্কত ফাঁট মেলাৰ পিছতে এক্সত এই পোষ্টটো লিখিছে শশী থাৰুৰে। ইয়াৰ পিছত আকৌ এবাৰ দলত থাৰুৰৰ ভৱিষ্যতক লৈ চৰ্চা তীব্ৰতৰ হৈ পৰিছে।
উল্লেখ্য যে, কিছুদিনৰ পৰা কংগ্ৰেছৰ সাংসদ তথা দলটোৰ পুৰণি নেতা শশী থাৰুৰ কংগ্ৰেছ দলৰ ওপৰত ক্ষুব্ধ হোৱা দেখা গৈছে। শেহতীয়াকৈ থাৰুৰে এই সন্দৰ্ভত কংগ্ৰেছ নেতা ৰাহুল গান্ধীকো সাক্ষাৎ কৰিছিল আৰু নিজৰ অসন্তুষ্টিও প্ৰকাশ কৰিছিল।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
