মুখ্যমন্ত্ৰী ডঃ হিমন্ত বিশ্ব শৰ্মাই উত্তৰাখণ্ডত নিৰ্বাচনী প্ৰচাৰ চলাবলৈ গৈ সৃষ্টি কৰি থৈ অহা ৰাজনৈতিক যুদ্ধ এতিয়াও মাৰ যোৱা নাই৷ বৰং এই যুদ্ধৰ চোক ক্ৰমাৎ বৃদ্ধি পোৱাহে পৰিলক্ষিত হৈছে৷
উল্লেখ্য যে উত্তৰখণ্ডত বিজেপিৰ হৈ নিৰ্বাচনী প্ৰচাৰ চলাবলৈ গৈ অসমৰ মুখ্যমন্ত্ৰী ডঃ হিমন্ত বিশ্ব শৰ্মাই ৰাহুল গান্ধীক অতি কঠোৰ আৰু অশালীন মন্তব্যৰে আক্ৰমণ কৰিছিল৷
প্ৰধানমন্ত্ৰী নৰেন্দ্ৰ মোদীক চাৰ্জিকেল ষ্ট্ৰাইকৰ প্ৰমাণ বিচৰা বুলি সমালোচনা কৰি ৰাহুল গান্ধীক তাচ্ছিল্যৰে মুখ্যমন্ত্ৰী ডঃ হিমন্ত বিশ্ব শৰ্মাই ‘আপোনাৰ পিতৃ ৰাজীৱ গান্ধী নে কোন বুলি সুধি প্ৰমাণ বিচাৰিছো নেকি?’ বুলি মন্তব্য কৰিছিল৷
ইয়াৰ পিছতে অসমৰ মুখ্যমন্ত্ৰী ডঃ হিমন্ত বিশ্ব শৰ্মাক ওভতি ধৰে দেশৰ কে’বাগৰাকীও বিৰোধী নেতাই৷ হিমন্ত বিশ্ব শৰ্মাক ওভতি ধৰাসকলৰ ভিতৰত অন্যতম হৈছে তেলেংগনাৰ মুখ্যমন্ত্ৰী কে চন্দ্ৰশেখৰ ৰাও৷
তেলেংগনাৰ মুখ্যমন্ত্ৰী কে চন্দ্ৰশেখৰ ৰাওৱে ডঃ হিমন্ত বিশ্ব শৰ্মাক ওভতি ধৰাই নহয়, মুখ্যমন্ত্ৰী পদৰ পৰা অপসাৰণ কৰিবলৈ বিজেপিৰ ৰাষ্ট্ৰীয় অধ্যক্ষ জেপি নাড্ডাকো দাবী কৰিছিল৷
আনকি দেওবাৰে সংবাদ মেলত সম্বোধন কৰি তেলেংগনাৰ মুখ্যমন্ত্ৰীগৰাকীয়ে ৰাহুল গান্ধীয়ে চাৰ্জিকেল ষ্ট্ৰাইকৰ বিৰুদ্ধে প্ৰশ্ন কৰাতো কিয় ভুল বুলিও প্ৰশ্ন কৰিছিল৷
ইয়াৰ পিছতে তেলেংগনাৰ মুখ্যমন্ত্ৰীগৰাকীক আক্ৰমণৰ লক্ষ্য কৰি এইবাৰ ডঃ হিমন্ত বিশ্ব শৰ্মাই চাৰ্জিকেল ষ্ট্ৰাইকৰ ভিডিঅ’গ্ৰাফিক প্ৰমাণ দিছে৷ সোমবাৰে নিজা Koo এপত ভিডিঅ’গ্ৰাফিক প্ৰমাণটো আপলোড কৰি মুখ্যমন্ত্ৰী ডঃ শৰ্মাই লিখিছে, ‘‘মৰমৰ কে চি আৰ গুৰু, ভাৰতীয় সেনাই কৰা চাৰ্জিকেল ষ্ট্ৰাইকৰ ভিডিঅ’গ্ৰাফিক প্ৰমাণ দিছো৷’’
উল্লেখ্য যে কংগ্ৰেছ নেতা ৰাহুল গান্ধীয়ে কেন্দ্ৰ চৰকাৰৰ পৰা ২০১৬ আৰু ২০১৯ চনত ভাৰতীয় সেনাই পাকিস্তানী সেনাৰ বিৰুদ্ধে চলোৱা চাৰ্জিকেল ষ্ট্ৰাইকৰ প্ৰমাণ বিচাৰি আহিছে৷ কিন্তু এই চাৰ্জিকেল ষ্ট্ৰাইকৰ কোনো প্ৰমাণ আজিকোপতি কেন্দ্ৰীয় চৰকাৰে দিবলৈ সক্ষম হোৱা নাই৷
কিন্তু সোমবাৰে অসমৰ মুখ্যমন্ত্ৰীয়ে এক ভিডিঅ’গ্ৰাফিক প্ৰমাণ আপলোড কৰি ইয়াৰ প্ৰমাণ ৰাজহুৱা কৰা বুলি দাবী কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
