উজনি অসমৰ কেইবাখনো জিলাত হোৱা জলপ্ৰলয় আৰু ইয়াৰ ফলত সৃষ্টি হোৱা দুৰ্দশাৰ কথা নতুনকৈ কোৱাৰ প্ৰয়োজন নাই। শিৱসাগৰ, চৰাইদেউ জিলাৰ কিছু কিছু অঞ্চলত পানী কিছু শুকালেও এতিয়াও অধিংকাশ বন্যাৰ্তই নিজগৃহলৈ উভতিব পৰা নাই। বানৰ পিছত বন্যাৰ্তৰ ঘৰসমূহৰ পৰিস্থিতি আৰু অধিক বৰ্ণনাতীত। কিছু কিছু গৃহৰ ভিতৰত এবুকু পৰ্যন্ত পলসে পুতি পেলাইছে। কেনেকৈ কৰ পৰা এই পলস গুচোৱা কাম আৰম্ভ কৰিব বানাক্ৰান্তসকলে উৱাদিহ পোৱা নাই। মৃ*ত পশুধনৰ পৰা ওলোৱা দুৰ্গন্ধ, পানীত পচি যোৱা বিভিন্ন উদ্ভিদৰ দুৰ্গন্ধ, পানীত থকা বিভিন্ন কীটৰ ফলত বনাক্ৰান্ত অঞ্চলত বানৰ পিছত অস্বাস্থ্যকৰ পৰিৱেশ বিৰাজ কৰিছে। চৌদিশে কেৱল দুৰ্গন্ধ আৰু দুৰ্গন্ধ। লাখ লাখ লোকে হেৰুৱাইছে গৃহ, লাখ লাখ লোকে হেৰুৱাইছে নিজৰ কৃষিভূমি। বানৰ সংহাৰ কেতিয়াও সাময়িক নহয়। এসপ্তাহ, ১০ দিন বা এমাহত পানী শুকালেও এই সংহাৰৰ ফল বনাক্ৰান্তসকলে ভুগিব লাগিব বছৰ বছৰ ধৰি। সাহায্য বিতৰণৰ এই ধামখুমীয়া হয়টো এদিন স্তিমিত হৈ আহিব, কিন্তু বানাক্ৰান্তৰ সংগ্ৰাম চলি থাকিব মাহ মাহ ধৰি, বছৰ বছৰ ধৰি।
কেতিয়াও বানপানী নোহোৱা অঞ্চল চৰাইদেউ, শিৱসাগৰত দিখৌৱে চলোৱা এই সংহাৰৰ প্ৰকৃত কাৰণ নাগালেণ্ডত হোৱা ডাৱৰ বিস্ফোৰণেইনে? প্ৰকৃতিৰ বুকুত আমি নিৰ্মম অত্যাচাৰ চলালে প্ৰকৃতিয়েও সদায়ে নীৰৱে ইয়াক সহ্য কৰি নাথাকে। মানুহে প্ৰকৃতিৰ ওপৰত চলোৱা এই অত্যাচৰৰ প্ৰতিশোধ এদিন নহয় এদিন হলেও ল’বই। প্ৰকৃততে সেয়াই যেন প্ৰতিফলিত হ’ল চৰাইদেউ আৰু শিৱসাগৰ জিলাত। তাকেই উপগ্ৰহীয় চিত্ৰৰ সহায়ত দেখুৱাবলৈ চেষ্টা কৰিছে নাজিৰাৰ প্ৰাক্তন বিধায়ক তথা কংগ্ৰেছী নেতা দেৱব্ৰত শইকীয়াই।
শইকীয়াই দিখৌ নৈৰ প্ৰৱাহমান পথৰ ২০১০ আৰু ২০২৪ৰ দুখন উপগ্ৰহীয় চিত্ৰৰ সহায়ত কেনেকৈ প্ৰকৃতিৰ ওপৰত মানুহৰ নিৰ্মম অত্যাচাৰ চলিছিল তাক বুজাবলৈ যত্ন কৰিছে। দেৱব্ৰত শইকীয়াই চৰকাৰৰ বিৰুদ্ধে বিস্ফোৰক অভিযোগ আনি কয় যে -এই সংহাৰী বান প্ৰকৃতিসৃষ্ট নহয়, এয়া মাফিয়াৰ সৈতে চৰকাৰৰ মিতিৰালিৰ কুফল’। দেৱব্ৰত শইকীয়াই লগতে কয় যে-‘ এসময়ৰ সেউজীয়া নদীৰ পাৰ আৰু স্বাভাৱিক জলপথসমূহক আজি শিল, বালি আৰু কয়লা মাফিয়াই কেনেদৰে বৃহৎ গাঁত আৰু ধ্বংসস্তূপলৈ ৰূপান্তৰিত কৰিছে, সেয়া এই চিত্ৰসমূহত জলজল-পটপটকৈ ওলাই পৰিছে। এই অবাধ লুণ্ঠন আৰু প্ৰকৃতি ধ্বংসই আজিৰ প্ৰলয়ংকাৰী বানৰ মূল কাৰণ। মই এই ধ্বংসলীলাৰ বিৰুদ্ধে বাৰে বাৰে মাত মাতি আহিছোঁ আৰু চৰকাৰক সকীয়াই আহিছোঁ, কিন্তু চৰকাৰে মাফিয়াৰ স্বাৰ্থত নীৰৱতা অৱলম্বন কৰিলে।’
দেৱব্ৰত শইকীয়াই খননৰ বিৰুদ্ধে উচ্চ ন্যায়ালয়ত ৰাজহুৱা স্বাৰ্থজড়িত আবেদনো দাখিল কৰা বুলি উল্লেখ কৰি কয়-‘দিখৌ নদীৰ পাৰত চলি থকা এই অবৈধ খননৰ বিৰুদ্ধে মই গুৱাহাটী উচ্চ ন্যায়ালয়ত জনস্বাৰ্থ জড়িত আবেদন (PIL 62/2019) দাখিল কৰিছিলোঁ। এই আবেদনৰ ভিত্তিত, ২০১৯ চনৰ ২১ অক্টোবৰত উচ্চ ন্যায়ালয়ে অবৈধ খনন ৰোধ কৰিবলৈ তিনি মাহৰ ভিতৰত এটা “Mines & Minerals Task Force Battalion” গঠন কৰাৰ আশা প্ৰকাশ কৰিছিল। কিন্তু ন্যায়ালয়ৰ স্পষ্ট নিৰ্দেশৰ পিছতো, ২০২১ চনৰ ২২ ডিচেম্বৰত বিধানসভাত চৰকাৰে লাজ লগা উত্তৰ দিলে যে এই ২০০ জনীয়া টাস্ক ফ’ৰ্চ গঠনৰ প্ৰক্ৰিয়াহে চলি আছে!’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
