অসম লাইভ২৪ঃ বানত বুৰিছে ৰাজধানী দিল্লী। দিল্লীৰ চৌদিশে কেৱল পানী আৰু পানী। বানৰ সংহাৰীৰূপৰ মাজতেই ৰাজধানী দিল্লীৰ জনতাৰ মাজত দেখা দিছে তীব্ৰ জলসংকটে। যমুনাৰ পানীয়ে প্লাবিত কৰিছে বহু এলেকা। মুখ্যমন্ত্ৰী অৰবিন্দ কেজৰিৱালৰ বাসভৱনলৈকো সোমাইছে পানী। বানৰ সংহাৰীৰূপে চিন্তিত কৰি তুলিছে দিল্লীৰ জনতাক। বৃহস্পতিবাৰে মুখ্যমন্ত্ৰী অৰবিন্দ কেজৰিৱালে কৰা ঘোষণা অনুসৰি দিল্লীৰ কেইবাটাও এলেকাত এতিয়া তীব্ৰ জলসংকটে দেখা দিছে।
যমুনা নৈৰ পানীয়ে ওয়াজিৰাবাদ, চন্দ্ৰৱাল আৰু ওখলা পানী পৰিশোধন প্ৰকল্পও বুৰাই পেলাইছে। যাৰবাবে পানী পৰিশোধন কৰিব কৰিব পৰা নাই। যাৰাবাবে দিল্লীত তীব্ৰ জলসংকটৰ আশংকা কৰিছে দিল্লী চৰকাৰে।
আজিও বিপদসীমাৰ ওপৰেৰে বৈ আছে যমুনা। বৃহস্পতিবাৰে যমুনাৰ জলস্তৰ ২০৮.৪৮ মিটাৰলৈ বৃদ্ধি পাইছে। বহু এলেকা প্লাবিত হোৱাৰো আশংকা ব্যক্ত কৰিছে কেজৰিৱাল চৰকাৰে। আৱেলিৰ ভাগলৈ জলস্তৰ আৰু বৃদ্ধি পাব পাৰে বুলিও সন্দেহ প্ৰকাশ কৰা হৈছে। বুধবাৰৰ পৰাই দিল্লীৰ চহৰত পানী সোমাবলৈ আৰম্ভ কৰিছে। দিল্লীৰ ঠায়ে ঠায়ে অস্থায়ী বান্ধো বান্ধিছে দিল্লী চৰকাৰে।
উল্লেখ্য যে হাৰিয়ানাৰ হাতিকুণ্ড বান্ধৰ পানী এৰি দিয়াৰ ফলতেই বৃদ্ধি পাইছে যমুনাৰ জলস্তৰ। কেজৰিৱাল চৰকাৰে কেন্দ্ৰক দাবী কৰিছিল যে দিল্লীৰ পৰিস্থিতিৰ প্ৰতি লক্ষ্য ৰাখি যাতে আৰু বান্ধৰ পানী এৰি নিদিয়ে। কিন্তু কেন্দ্ৰই কেজৰিৱালৰ কথাক আওকান কৰি পানী এৰি দিয়াৰ ফলতেই ডুব গৈছে ৰাজধানী দিল্লী বুলি জনাইছে কেজৰিৱাল চৰকাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
