ৰাজধানী দিল্লীৰ স্বৰূপ নগৰ অঞ্চলত সংঘটিত হৈছে এক চাঞ্চল্যকৰ ঘটনা। এগৰাকী ১৫ বছৰীয়া কিশোৰীক ধ*ৰ্ষণৰ পিছত হ*ত্যাৰ অভিযোগ উত্থাপন হৈছে। এই ঘটনাৰ সৈতে জড়িত থকাৰ অভিযোগত ১৯ বছৰীয়া শিৱম গণেশক গ্ৰেপ্তাৰ কৰাৰ লগতে আন তিনিজন নাবালকক আৰক্ষীয়ে আটক কৰিছে। আৰক্ষীয়ে এই গোচৰৰ অভিযোগনামা দাখিলৰ প্ৰস্তুতি চলাইছে। আৰক্ষীৰ তথ্য অনুসৰি, ঘটনাটো ১০ ছেপ্টেম্বৰৰ নিশা সংঘটিত হৈছিল। অভিযোগ অনুসৰি, শিৱমৰ সৈতে কিশোৰীগৰাকীৰ প্ৰায় এবছৰ ধৰি পৰিচয় আছিল। সেই পৰিচয়ৰ বাবেই শিৱমৰ কথাত বিশ্বাস কৰি কিশোৰীগৰাকী তেওঁৰ সৈতে বাহিৰলৈ ওলাই গৈছিল। পিছত শিৱমৰ তিনিজন নাবালক বন্ধুও তেওঁলোকৰ সৈতে যোগ দিছিল।
আৰক্ষীৰ অভিযোগ অনুসৰি, চাৰিওজনে কিশোৰীগৰাকীক এটা নিৰ্জন স্থানলৈ লৈ যায়। তাত তেওঁক বিয়েৰ খাবলৈ বাধ্য কৰাৰ পিছত চাৰিওজনে ধ*ৰ্ষণ কৰে বুলি অভিযোগ উঠিছে। ইয়াৰ পিছত কিশোৰীগৰাকীয়ে ঘটনাটো আৰক্ষীক জনোৱাৰ কথা কোৱাত অভিযুক্তসকলে তেওঁক আক্ৰমণ কৰে। আৰক্ষীৰ মতে, চোকা অস্ত্ৰৰে আঘাত কৰাৰ ফলত কিশোৰীগৰাকীৰ মৃ*ত্যু হয়। পিছত মৃ*তদেহটো সেই স্থানতে এৰি অভিযুক্তসকলে পলায়ন কৰে।
১০ ছেপ্টেম্বৰৰ নিশাৰ পৰা কিশোৰীগৰাকী নিৰুদ্দেশ হৈ আছিল। আৰক্ষীৰ মতে, তেওঁ সঘনাই ঘৰৰ পৰা বাহিৰলৈ যোৱাৰ বাবে সেই নিশা ঘৰলৈ উভতি নহাৰ বিষয়টো পৰিয়ালে প্ৰথমে অস্বাভাৱিক বুলি ভবা নাছিল। সেয়েহে তৎক্ষণাৎ নিৰুদ্দেশৰ অভিযোগ দাখিল কৰা হোৱা নাছিল। ১৩ ছেপ্টেম্বৰৰ পুৱা কুশক ৰোডৰ সমীপৰ এখন পথাৰত কিশোৰীগৰাকীৰ মৃ*তদেহ উদ্ধাৰ হয়। মৃ*তদেহটো কেইবাদিনো মুকলি ঠাইত পৰি থকাৰ বাবে যথেষ্ট ক্ষতিগ্ৰস্ত হৈছিল। মুখমণ্ডলৰ পৰিৱৰ্তনৰ ফলত মৃ*তদেহটো চিনাক্ত কৰাটোও কঠিন হৈ পৰিছিল।
মৃ*তদেহ পৰীক্ষা কৰাৰ সময়ত আৰক্ষীয়ে কিশোৰীগৰাকীৰ হাতত তিনিটা তৰা সদৃশ টেটু থকাৰ কথা লক্ষ্য কৰে। তাৰ পিছত আৰক্ষীয়ে মৃ*তদেহৰ ফটো লৈ কিশোৰীগৰাকীৰ পৰিয়ালৰ সৈতে যোগাযোগ কৰে। প্ৰথম অৱস্থাত পিতৃয়ে মৃ*তদেহটো নিজৰ কন্যাৰ বুলি বিশ্বাস কৰিব পৰা নাছিল। কিন্তু তেওঁৰ মোবাইল ফোনত থকা কন্যাৰ এখন ফটোত একেধৰণৰ টেটু দেখা যায়। সেই টেটুৰ মিল পৰীক্ষা কৰাৰ পিছত মৃ*তদেহটো কিশোৰীগৰাকীৰ বুলি নিশ্চিত কৰা হয়।
ঘটনাটোৰ তদন্তত আৰক্ষীয়ে CCTV ফুটেজ পৰীক্ষা কৰে। সেই ফুটেজ আৰু অন্যান্য তথ্যৰ ভিত্তিত আৰক্ষীয়ে অভিযুক্তসকলৰ সন্ধান চলায়। তদন্তৰ পিছত ১৯ বছৰীয়া শিৱম গণেশক গ্ৰেপ্তাৰ কৰাৰ লগতে আন তিনি নাবালক অভিযুক্তক আটক কৰা হয়। আৰক্ষীয়ে এতিয়া গোচৰটোৰ তদন্ত সম্পূৰ্ণ কৰি অভিযোগনামা দাখিলৰ প্ৰস্তুতি চলাইছে। ঘটনাটোক লৈ স্বৰূপ নগৰ অঞ্চলত চাঞ্চল্যৰ সৃষ্টি হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
