মাজ আকাশত হাহাকাৰ, উৰন্ত বিমানৰ ইঞ্জিনত জুই, ভাইৰেল দৃশ্য
হঠাতে মাজ আকাশত হাহাকাৰ লাগে এখন বিমানৰ ভিতৰত। আতংকিত হৈ পৰে যাত্ৰী সকল। কাৰণ উৰম্ত অৱস্থাত থকা বিমানখনৰ এটা ইঞ্জিনত লাগি যায় জুই। উৰণৰ কেইমিনিট মানৰ পাছতে এই অগ্নিকাণ্ডৰ ঘটনা সংঘটিত হয়। যাৰ ফলত লগে লগে ইমাৰজেঞ্চী লেণ্ডিং কৰোৱা হয় বিমানখনৰ। যাৰ ফলত প্ৰাণ ৰক্ষা পৰে যাত্ৰী সকলৰ।
এই ঘটনা সংঘটিত হৈছে ডেল্টা এয়াৰলাইন্সৰ এখন বিমানত। বিমানখন আছিল বয়িং ৭৬৭-৪০০, ইয়াৰে ডি এল-৪৪৬ৰ বাওফালৰ ইঞ্জিনত উৰণৰ সময়ত হঠাতে জুই লাগে। জানিব পৰা মতে বিমানখন লছ এঞ্জেলছ আন্তঃৰাষ্ট্ৰীয় বিমানবন্দৰৰ পৰা (LAX) আটলান্টালৈ ৰাওনা হৈছিল।
বিমানখনে যেতিয়াই আকাশলৈ বুলি উৰা মাৰে লগে লগে মাটিত থকা বহু লোকে ইঞ্জিনৰ পৰা জুইৰ শিখা ওলোৱা প্ৰত্যক্ষ কৰে। বৰ্তমানে ছ’চিয়েল মিডিয়াত ভাইৰেল হৈ পৰিছে এই ঘটনাৰ ভিডিঅ’। দৃশ্যত ইঞ্জিনৰ পৰা স্ফুলিংগ আৰু জুইৰ শিখা স্পষ্টকৈ দেখা গৈছে । অগ্নিকাণ্ড সংঘটিত হোৱাৰ লগে লগে বিমানখনে লছ এঞ্জেলছ বিমানবন্দৰত জৰুৰীকালীন অৱতৰণ কৰিবলগীয়া হয়।
অগ্নিকাণ্ডৰ তথ্য পোৱাৰ লগে লগে পাইলটে ততাতৈয়াকৈ ‘মেডে’ ঘোষণা কৰি এয়াৰ ট্ৰেফিক কণ্ট্ৰ’লক খবৰ দিয়ে। বিমানখন নিৰাপদে ঘূৰি আহি ৰাণৱেত অৱতৰণ কৰে, তাৰ পিছত জৰুৰীকালীন অগ্নিনিৰ্বাপক আৰু উদ্ধাৰকাৰী দলে লগে লগে ইঞ্জিনৰ জুই নিৰ্বাপন কৰে।
https://x.com/RT_com/status/1946654487193546965
পাইলটৰ সজাগতাৰ বাবে বিমানখনত থকা সৰ্বমুঠ ২২৬জন যাত্ৰী আৰু ৯ জন ক্ৰুৰ প্ৰাণ ৰক্ষা পৰে। ঘটনাত কোনো লোক আহত হোৱা নাই।
বিমানখনৰ ইঞ্জিনত অগ্নিকাণ্ডৰ কাৰণ এতিয়াও স্পষ্ট হোৱা নাই। এই কথা জানিবলৈ ফেডাৰেল এভিয়েশন এডমিনিষ্ট্ৰেচনে (এফ এ এ) এই কাণ্ডৰ তদন্ত আৰম্ভ কৰিছে। ডেল্টা এয়াৰলাইন্সৰ বাবে এই বছৰ এনে দ্বিতীয়টো কাণ্ড, য’ত ইঞ্জিনত কাৰিকৰী বিজুতিৰ খবৰ পোৱা গৈছে। প্ৰতিবেদন অনুসৰি বিমানখনৰ বয়স প্ৰায় ২৫ বছৰ আৰু ইয়াত দুটা জি ই চি এফ ৬ ইঞ্জিন সংস্থাপন কৰা আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
