এদিন তেওঁ বলীউডৰ সকলোতকৈ সুদৰ্শন নায়ক আছিল৷ সেই ধৰ্মেন্দ্ৰৰ ব্যক্তিগত জীৱন বাৰে বাৰে শিৰোনামত আহিছিল ডেকাকালত৷ বিশেষকৈ ড্ৰিম গাৰ্ল হেমা মালিনীৰ সৈতে তেওঁৰ বিবাহবৰ্হিৰ্ভূত সম্পৰ্ক আৰু পৰবৰ্তীকালত বিবাহক লৈ খুবেই চৰ্চাত আহিছিল ধৰ্মেন্দ্ৰ৷ হেমামালিনীক বিয়া কৰাবলৈ ধৰ্মেন্দ্ৰই ইছলাম ধৰ্মও গ্ৰহণ কৰিছিল বুলি বাতৰি প্ৰকাশ পাইছিল৷ সম্প্ৰতি কিছুমাহ পূৰ্বে পুৰীৰ মন্দিৰত হেমা মালিনীৰ প্ৰৱেশক লৈ সেয়ে বিতৰ্কৰো সৃষ্টি হৈছিল৷ কিন্তু সঁচায়ে ইছলাম গ্ৰহণ কৰিছিল নেকি ধৰ্মেন্দ্ৰ আৰু হেমাই? ধৰ্মেন্দ্ৰই নিজেই সেই বিষয়ক লৈ এক মত প্ৰকাশ কৰি থৈছে৷
১৯৮০ চনত ধৰ্মেন্দ্ৰই হেমামালিনীক বিয়া কৰাইছে৷ হেমাক বিয়া কৰোৱাৰ পূৰ্বৰে পৰাই বিবাহিত আছিল ধৰ্মেন্দ্ৰ৷ পত্নী প্ৰকাশ কৌৰৰ সৈতে চাৰি সন্তানো আছে ধৰ্মেন্দ্ৰৰ৷ তেওঁলোক ক্ৰমে ছানি দেওল, ববি দেওল, অজিতা দেওল আৰু বিজয়া দেওল৷ প্ৰথমা পত্নী থাকোতে তেওঁৰ সৈতে বিচ্ছেদ নোহোৱালৈকে দ্বিতীয় বিবাহ কেনেকৈ কৰিলে ধৰ্মেন্দ্ৰই সেই বিষয়েও উত্থাপিত হৈছিল প্ৰশ্ন৷ আৰু সেই সময়তে তেওঁলোকে নিকাহ কৰায়৷ শুনা গৈছে যে প্রথমা পত্নীক ৰাখি দ্বিতীয় বিবাহ কৰিবলৈ ইছলাম গ্ৰহণ কৰিছিল ধৰ্মেন্দ্রই৷ প্রথমে তেওঁলোকৰ নিকাহ হয়৷ দিলাৱাৰ নাম গ্ৰহণ কৰে ধৰ্মেন্দ্ৰই, হেমা হয় আয়েশা বাঈ৷ পাছত আয়েঙ্গাৰ আচাৰনুষ্ঠান মানিও বিয়া হয়৷
হেমাৰ জীৱনী ‘Hema Malini: Beyond the Dream Girl’ গ্ৰন্থত ৰাম কমল মুখাৰ্জীয়ে জনাইছে যে ধৰ্মেন্দ্ৰ আৰু হেমাৰ বিবাহৰ আইনী বৈধতাক লৈ সন্দেহে দেখা দিছিল৷ কাৰণ হিন্দু বিবাহ আইন অনুসৰি প্ৰথম বিবাহৰ ইতি নোহোৱাকৈ দ্বিতীয় বিবাহ কৰিব নোৱাৰি৷ ২০০৪ চনত বিজেপিৰ প্ৰাৰ্থী হয় ধৰ্মেন্দ্ৰ৷ সেই সময়ত হলফনামাত পত্নী হিচাপে কেৱল প্ৰকাশৰ নামেই উল্লেখ কৰিছিল তেওঁ৷ তাৰ সৈতে নিজৰ সম্পত্তিৰ হিচাপ দিছিল অভিনেতাই৷ বিষয়টোক লৈ বিতৰ্ক হ’বলৈ পিছে সময়ো নালাগিল৷
ধৰ্মেন্দ্ৰই কিয় পত্নী হেমাৰ নাম হলফনামাত উল্লেখ নকৰিলে সেই বিষয়ক লৈ প্ৰশ্নৰ মুখত পৰিছিল হেমাও৷ তেওঁ কয়, ‘ই আমাৰ মাজৰ বিষয়৷ আমি নিজেই সেয়া মিলাই ল’ম৷ অন্য কোনোৱে এই বিষয়ত মূৰ ঘমাই লাভ নাই৷’ সেই সময়ত ৰাজ্যসভাৰ সদস্য আছিল হেমা৷ তেওঁৰ মনোনয়ন বাতিলৰ দাবীও উঠিছিল৷ হেমাই ভুল নাম লিখিছে৷ সঠিক ধৰ্মীয় পৰিচয় উল্লেখ কৰা নাই বুলিও অভিযোগ তোলা হয়৷ হেমাই তেতিয়া কয়, ‘এই সকলো অভিযোগ সঁচা নহয়৷ এই বিষয়ত আৰু একোৱেই ক’ব নোখোজো৷’
কিন্তু হেমাক বিয়া কৰোৱাৰ বাবে ইছলাম গ্ৰহণ কৰাটো সঁচা আছিলনে ধৰ্মেন্দ্ৰৰ? ২০০৪ চনত এক সাক্ষাৎকাৰত এই প্ৰশ্নৰ উত্তৰত ধৰ্মেন্দ্ৰই কৈছিল, ‘এইসমূহ মিছা অভিযোগ৷ নিজৰ স্বাৰ্থত ধৰ্ম পৰিবৰ্তন কৰাৰ দৰে পুৰুষ মই নহয়৷’ হিন্দি চলচ্চিত্ৰ জগতৰ অন্যতম চৰ্চিত নাম ধৰ্মেন্দ্ৰ৷ তেওঁৰ ব্যক্তিগত জীৱনক লৈ বাৰে বাৰে বিতৰ্কও হৈ আছিল৷ মীনা কুমাৰীৰ সৈতেও তেওঁৰ ৰসায়নক লৈ চৰ্চা হৈছিল মায়ানগৰীত৷ ১৯৫৪ চনত প্ৰকাশকেই প্রথম বিয়া কৰে অভিনেতাই৷ সাতৰ দশকত হেমাৰ সৈতে পৰিচয় আৰু ঘনিষ্ঠতা৷ বিশেষকৈ শোলেৰ শ্বুটিঙৰ সময়ত দুজনৰ মাজত সম্পৰ্ক গভীৰ হয়৷ হাজাৰ বিতৰ্ক সত্ত্বেও ১৯৮০ চনত হেমাক স্ত্ৰী হিচাপে স্বীকৃতি দিয়ে ধৰ্মেন্দ্রই৷ তেওঁৰ দুই কন্যা আছে এগৰাকী এষা আৰু আনগৰাকী আহনা৷ কেইবাবছৰ পূৰ্বে ধৰ্মেন্দ্ৰ আৰু হেমাৰ বিবাহৰ এখন ছবি পোষ্ট কৰে তেওঁলোকৰ কন্যা এষাই৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
