প্ৰচণ্ড গৰমৰ মাজতে অলপ বৰষুণ আহিলে সকলোৰে ভাল লাগে। কিন্তু প্ৰচণ্ড গৰমৰ পিছত বৰষুণ যেতিয়া আহে তেতিয়া বিভিন্ন শ্বাস-প্ৰশ্বাসজনিত সংক্ৰমণৰ আশংকাও বহু গুণে বৃদ্ধি পায়। বায়ুমণ্ডলত আর্দ্ৰতা বৃদ্ধি, তাপমাত্ৰাৰ সঘন পৰিৱৰ্তন, বিভিন্ন ঠাইত পানী জমা হোৱা আৰু জনসমাগমত অধিক সময় কটোৱাৰ ফলত ভাইৰাছ, বেক্টেৰিয়া আৰু ফাংগাছে দ্ৰুতগতিত বিস্তাৰ লাভ কৰে। ইয়াৰ ফলত সাধাৰণ চৰ্দি-কাহ, ইনফ্লুৱেঞ্জা, ব্ৰংকাইটিছ, নিমোনিয়াৰ দৰে ৰোগৰ সংক্ৰমণ এই সময়ত অধিক হোৱা দেখা যায়। চিকিৎসা বিশেষজ্ঞৰ মতে, কিছুমান বিশেষ শ্ৰেণীৰ লোকৰ ক্ষেত্ৰত এই সংক্ৰমণে গুৰুতৰ ৰূপ ল’ব পাৰে। সেয়েহে বৰষুণৰ বতৰত তেওঁলোকে অধিক সাৱধানতা অৱলম্বন কৰাটো অতি প্ৰয়োজনীয়।
কোনবোৰ লোকৰ বাবে আশংকা বেছি?
বিশেষজ্ঞৰ মতে, শিশু, বয়োজ্যেষ্ঠ ব্যক্তি, গৰ্ভৱতী মহিলা আৰু আগৰে পৰা হাঁপানি (Asthma), COPD বা ব্ৰংকাইটিছত ভুগি থকা লোকসকল শ্বাস-প্ৰশ্বাসজনিত সংক্ৰমণৰ প্ৰতি অধিক সংবেদনশীল। ইয়াৰ উপৰিও ডায়েবেটিছ, হৃদৰোগ, বৃক্কৰোগ, কেন্সাৰ অথবা ৰোগ-প্ৰতিৰোধ ক্ষমতা কমাই দিয়া চিকিৎসা গ্ৰহণ কৰি থকা ব্যক্তিসকলেও অধিক সতৰ্ক হৈ থাকিব লাগে। ধূমপান আৰু বায়ু প্ৰদূষণৰ সংস্পৰ্শতো হাওঁফাঁও দুৰ্বল হৈ পৰে, যাৰ ফলত সংক্ৰমণৰ আশংকা বৃদ্ধি পায়।
এই সহজ অভ্যাসবোৰেই দিব সুৰক্ষা
বিশেষজ্ঞসকলে কয়, দৈনন্দিন জীৱনত কিছুমান সহজ অভ্যাস গঢ়ি তুলিলেই শ্বাস-প্ৰশ্বাসজনিত সংক্ৰমণৰ আশংকা যথেষ্ট হ্ৰাস কৰিব পাৰি। নিয়মিতভাৱে চাবোনেৰে হাত ধুব। চৰ্দি-কাহ বা জ্বৰত আক্ৰান্ত ব্যক্তিৰ সৈতে ঘনিষ্ঠ সংস্পৰ্শ এৰাই চলিব। ভিৰ থকা ঠাইলৈ গ’লে মাস্ক ব্যৱহাৰ কৰিব। ঘৰখনত পৰ্যাপ্ত বায়ু চলাচলৰ ব্যৱস্থা নিশ্চিত কৰিব। প্ৰতিদিনে পৰ্যাপ্ত নিদ্ৰা ল’ব। সুষম আৰু পুষ্টিকৰ খাদ্য গ্ৰহণ কৰিব। শৰীৰত পানীৰ অভাৱ নহ’বলৈ যথেষ্ট পৰিমাণে পানী খাব। হাঁপানি বা COPD ৰোগীয়ে নিয়মিত ইনহেলাৰ ব্যৱহাৰ কৰিব আৰু ৰেচকিউ ঔষধ লগত ৰাখিব। অধিক বিপদজনক শ্ৰেণীৰ লোকে চিকিৎসকৰ পৰামৰ্শ মতে ঋতুকালীন ফ্লু আৰু নিমোনিয়াৰ প্ৰতিষেধক টিকা গ্ৰহণ কৰিব পাৰে।
এণ্টিবায়’টিক নিজ ইচ্ছামতে নাখাব
বিশেষজ্ঞসকলৰ মতে, বৰষুণৰ বতৰত হোৱা অধিকাংশ শ্বাস-প্ৰশ্বাসজনিত সংক্ৰমণ ভাইৰাছজনিত হয়। এনে ক্ষেত্ৰত এণ্টিবায়’টিক ঔষধে কোনো উপকাৰ নকৰে। বৰঞ্চ অযথা বা চিকিৎসকৰ পৰামৰ্শ অবিহনে এণ্টিবায়’টিক গ্ৰহণ কৰিলে ভৱিষ্যতে ঔষধৰ প্ৰতি জীৱাণুৰ প্ৰতিৰোধ ক্ষমতা বৃদ্ধি পাব পাৰে। ফলত পিছলৈ হোৱা সংক্ৰমণৰ চিকিৎসা অধিক কঠিন হৈ পৰিব। সেয়েহে যিকোনো ঔষধ চিকিৎসকৰ পৰামৰ্শ অনুসৰিয়েই গ্ৰহণ কৰাটো বুদ্ধিমত্তাৰ পৰিচয়। বিশেষজ্ঞসকলৰ মতে, সঠিক স্বাস্থ্যবিধি পালন, সুষম আহাৰ, পৰ্যাপ্ত বিশ্ৰাম আৰু চিকিৎসকৰ পৰামৰ্শ মানি চলিলে বৰষুণৰ বতৰত শ্বাস-প্ৰশ্বাসজনিত অধিকাংশ সংক্ৰমণৰ পৰা নিজকে সুৰক্ষিত ৰাখিব পাৰি।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
