বলীউডৰ জনপ্ৰিয় অভিনেতা গোবিন্দা আৰু তেওঁৰ পত্নী সুনীতা আহুজাৰ দাম্পত্য জীৱনক লৈ বহু বছৰ ধৰি বিভিন্ন গুজৱ আৰু চৰ্চা চলি আহিছে। কিন্তু এইবাৰ সকলো জল্পনা-কল্পনাৰ অন্ত পেলাই নিজেই মুখ খুলিলে সুনীতা আহুজাই । এটা ৰিয়েলিটি শ্ব’ত অংশগ্ৰহণ কৰি তেওঁ দিয়া কিছুমান মন্তব্যই এতিয়া ছ’চিয়েল মিডিয়াৰ পৰা আৰম্ভ কৰি মনোৰঞ্জন জগতলৈকে তুমূল চাঞ্চল্যৰ সৃষ্টি কৰিছে। শ্ব’টোৰ শেহতীয়া এটা খণ্ডত সহ-প্ৰতিযোগী শ্ৰেয়া কালৰাই সুনীতাক গোবিন্দাৰ কথিত পৰকীয়া প্ৰেম সম্পৰ্ক আৰু বিবাহিত জীৱনত পোৱা আঘাতৰ বিষয়ে সোধাত তেওঁ অকপটে কয়, ‘যদি হৈছিল, এতিয়া আৰু কি কৰিব পাৰি? আৰম্ভণিৰে পৰাই এনেকুৱা হৈছিল। তেওঁ এজন হিৰো আছিল, সেয়ে বেছি একো ক’ব নোৱাৰিলোঁ। এতিয়া এইবোৰ কথা ভাবি থাকিলে মোৰ ডায়েবেটিছহে বাঢ়িব। গতিকে যিদৰে চলি আছে, তেনেকৈয়ে চলিবলৈ দিছোঁ।’
এই মন্তব্যৰ পিছতে যেতিয়া তেওঁক সোধা হয় যে এইবোৰে তেওঁক কষ্ট নিদিয়ে নেকি, তেতিয়া সুনীতাৰ উত্তৰে বহু দৰ্শকৰ মন স্পৰ্শ কৰে। তেওঁ কয়, ‘এতিয়া মই কেৱল মোৰ সন্তানৰ বাবেই জীয়াই আছোঁ। জীৱনত বহু কথা সহ্য কৰিবলগীয়া হৈছে।’
এতিয়া আৰু একেলগে নাথাকে গোবিন্দ আৰু সুনীতা!
গোবিন্দাই এতিয়াও যদি একেধৰণৰ কাম কৰে, তেন্তে তেওঁ কি কৰিব বুলি সোধা প্ৰশ্নত সুনীতাই অত্যন্ত বাস্তৱসন্মত উত্তৰ দিয়ে। তেওঁ কয়, ‘কাকো জোৰ কৰি ধৰি ৰাখিব নোৱাৰি। মই নে ২৪ ঘণ্টাই তেওঁৰ কাষতে বহি থাকিম নেকি? তেনে কৰিলে তেৱোঁ বিৰক্ত হ’ব। সেয়ে এতিয়া এইবোৰ বিষয়ত মই একেবাৰেই গুৰুত্ব নিদিওঁ।’ ইয়াৰ লগে লগে এক আচৰিত তথ্য প্ৰকাশ কৰি সুনীতাই জনায় যে তেওঁলোক একেলগে থকাৰ সলনি পৃথক পৃথক ঘৰতে বাস কৰে। তেওঁৰ ভাষাত, ‘আমাৰ দুটা ঘৰ আছে। তেওঁৰ ঘৰলৈ সদায় মানুহৰ অহা-যোৱা চলি থাকে। কিন্তু মোৰ ব্যক্তিগত জীৱন আৰু শান্তি ভাল লাগে, সেয়ে মই পৃথক কৈ থাকোঁ।’ উল্লেখযোগ্য যে, প্ৰথমবাৰৰ বাবে সুনীতাই গোবিন্দাৰ কথিত পৰকীয়া সম্পৰ্কৰ বিষয়ে মন্তব্য কৰিছে যে এইটো নহয়। শ্ব’টোৰ আৰম্ভণিৰ পৰ্বতো তেওঁ স্বীকাৰ কৰিছিল যে বিবাহিত জীৱনত গোবিন্দাৰ একাধিক সম্পৰ্কৰ কথা তেওঁ জানিছিল। তথাপিও, নিজৰ ভালপোৱা আৰু সংসাৰ বচাই ৰাখিবলৈ তেওঁ বহু আপোচ আৰু ত্যাগ স্বীকাৰ কৰিছিল বুলি কয়। আনহাতে, জীৱনত পুনৰ প্ৰেমৰ কথা ভাবিব নেকি বুলি সোধাত সুনীতাই স্পষ্ট ভাষাৰে কয়, ‘নাই। এতিয়া সেই বয়সো নাই, ইচ্ছাও নাই। জীৱনত যি চাবলগীয়া আৰু অনুভৱ কৰিবলগীয়া আছিল, সেয়া বহুত আগতেই কৰি শেষ কৰিছোঁ।’ সুনীতা আহুজাৰ এই অকপট স্বীকাৰোক্তিৰ পিছত মনোৰঞ্জন জগতত নতুনকৈ আৰম্ভ হৈছে গোবিন্দা-সুনীতাৰ সম্পৰ্কক লৈ জোৰদাৰ আলোচনা। অৱশ্যে, গোবিন্দাই এতিয়ালৈকে পত্নীৰ এই মন্তব্যৰ ওপৰত কোনো প্ৰতিক্ৰিয়া প্ৰকাশ কৰা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
