শিক্ষাৰ ভোকাতুৰ, নিজেই ভংগ কৰিলে নিজৰ অভিলেখ, লাভ কৰিলে ১৬৮ ডিগ্ৰী-ডিপ্লমা
ৰাজস্থানৰ উদয়পুৰ নিবাসী বিশেষভাৱে সক্ষম ডাঃ অৰবিন্দৰ সিঙৰ শিক্ষণ আৰু পঢ়া-শুনাৰ প্ৰতি ইমানেই আকৰ্ষণ আছে যে তেওঁ পুনৰবাৰ লাইমলাইটলৈ আহিছে। একাগ্ৰতা আৰু অধ্যৱসায়েৰে আন এক নতুন কৃতিত্ব অৰ্জন কৰিছে। এই কৃতিত্ব বহু লোকৰ বাবে প্ৰেৰণাদায়কো।
আচলতে ড° অৰবিন্দৰ সিঙে পুনৰ ইতিহাসৰ সৃষ্টি কৰিছে। সৰ্বমুঠ ১৬৮টা ডিগ্ৰী, ডিপ্লমা আৰু চাৰ্টিফিকেট লাভ কৰি তেওঁ নিজৰ বিশ্ব অভিলেখ ভংগ কৰিছে। এই কৃতিত্বৰ বাবে তেওঁ তৃতীয়বাৰৰ বাবে লণ্ডনৰ ৱৰ্ল্ড বুক অৱ ৰেকৰ্ডছত স্থান লাভ কৰিছে। সৰ্বাধিক সংখ্যক ডিগ্ৰী, ডিপ্লমা আৰু চাৰ্টিফিকেট লাভ কৰি ড° অৰবিন্দৰ সিঙে তৃতীয়বাৰৰ বাবে লণ্ডনৰ ৱৰ্ল্ড বুক অৱ ৰেকৰ্ডছত নিজৰ নাম পঞ্জীয়ন কৰিছে।
ড০ অৰবিন্দৰ সিঙে তৃতীয়বাৰৰ বাবে লণ্ডনৰ ৱৰ্ল্ড বুক অৱ ৰেকৰ্ডছত স্থান লাভ কৰাৰ পিছত ৰাজস্থানৰ উপ-মুখ্যমন্ত্ৰী ড০ প্ৰেম চন্দ বৈৰৱাইও তেওঁক সন্মান জনাইছে। উল্লেখযোগ্য যে ড° অৰবিন্দৰ সিঙৰ শিক্ষাৰ ক্ষুধা আচৰিত। বৰ্তমানলৈ তেওঁৰ বয়সৰ তিনিগুণ ডিগ্ৰী, ডিপ্লমা আৰু চাৰ্টিফিকেট লাভ কৰিছে।
১৯৮৯ চনৰ পৰা ২০২৪ চনৰ ভিতৰত চিকিৎসা বিজ্ঞানৰ উপৰিও তেওঁ মেনেজমেণ্ট, আইন, কচমেট’লজী, কচমেটিক ডাৰ্মাট’লজী আৰু ডিজিটেল মাৰ্কেটিং আদিও আয়ত্ত কৰিছে। এই ১৬৮টা ডিগ্ৰীৰ ভিতৰত ৯৪টা শৈক্ষিক আৰু ৭৪টা অশৈক্ষিক বিষয় অন্তৰ্ভুক্ত আছে।
শেহতীয়াকৈ তেওঁক চিকিৎসা আৰু শিক্ষাৰ ক্ষেত্ৰত আগবঢ়োৱা অৱদানৰ বাবে অক্সফৰ্ড বিশ্ববিদ্যালয়, লণ্ডন আৰু ব্ৰিটেইনৰ সংসদে সন্মান জনাইছে। ছিংগাপুৰৰ এছিয়া বিজনেছ কনক্লেভত ‘গ্ল’বেল মাষ্টাৰ মাইণ্ড’ আৰু ভাৰতৰ ‘বেষ্ট অৱ ১০০ ইণ্ডিয়ানছ’ উপাধি লাভ কৰে।
ডাঃ অৰবিন্দৰ চিকিৎসা বিশেষজ্ঞতা, চিকিৎসা আইন আৰু ব্যৱসায়িক দক্ষতাৰ এক আচৰিত মিশ্ৰণ। তেওঁ অক্সফৰ্ড, ইউ কে, আমেৰিকান এছ’চিয়েশ্যন, ছুইডেন, কানাডা, ইজৰাইল আদিৰ পৰা বিভিন্ন বিষয়ত শিক্ষা লাভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
