উত্তৰ প্ৰদেশৰ বাৰেলী জিলাত প্ৰশাসনিক কামত গাফিলতি আৰু দুৰ্নীতিৰ অভিযোগৰ বিৰুদ্ধে কঠোৰ ব্যৱস্থা গ্ৰহণ কৰিছে জিলা আয়ুক্ত অবিনাশ সিঙে। মিৰগঞ্জৰ এজন কনিষ্ঠ সহায়কক তিনিবাৰকৈ টাইপিং টেষ্টত ব্যৰ্থ হোৱাৰ পিছত কনিষ্ঠ সহায়কৰ পদৰ পৰা আঁতৰাই চতুৰ্থ শ্ৰেণীৰ কৰ্মচাৰী হিচাপে নিযুক্তি দিয়া হৈছে। আনহাতে, ৰাজহ সংগ্ৰহৰ ধন আত্মসাৎ কৰাৰ অভিযোগত ফৰিদপুৰৰ এজন কনিষ্ঠ সহায়কক নিলম্বনৰ নিৰ্দেশ দিয়া হৈছে।
উল্লেখ্য যে মিৰগঞ্জত কনিষ্ঠ সহায়ক হিচাপে নিযুক্তি পোৱা ৰেহান খানক ২০২১ চনত মৃতকৰ নিৰ্ভৰশীল কোটাৰ অধীনত চৰকাৰী চাকৰি দিয়া হৈছিল। কনিষ্ঠ সহায়কৰ পদত কাম কৰিবলৈ কম্পিউটাৰ টাইপিঙৰ নিৰ্দিষ্ট দক্ষতা থকাটো বাধ্যতামূলক। এই দক্ষতা অৰ্জন কৰি নিৰ্ধাৰিত মানদণ্ড পূৰণ কৰিবলৈ ৰেহান খানক তিনিবাৰ টাইপিং টেষ্ট দিয়াৰ সুযোগ দিয়া হৈছিল। কিন্তু তিনিওবাৰেই তেওঁ পৰীক্ষাত উত্তীৰ্ণ হ’ব নোৱাৰিলে। ইয়াৰ পিছত চৰকাৰী নিয়ম আৰু নিৰ্দেশ অনুসৰি জিলা দণ্ডাধীশে ৰেহান খানক কনিষ্ঠ সহায়কৰ পদৰ পৰা আঁতৰাই চতুৰ্থ শ্ৰেণীৰ কৰ্মচাৰী হিচাপে নিযুক্তি দিয়াৰ নিৰ্দেশ জাৰি কৰে। এতিয়াৰে পৰা তেওঁ চতুৰ্থ শ্ৰেণীৰ কৰ্মচাৰী হিচাপে দায়িত্ব পালন কৰিব।
ইফালে ফৰিদপুৰৰ কনিষ্ঠ সহায়ক অংশু ভাৰ্মাৰ বিৰুদ্ধে ৰাজহ সংগ্ৰহৰ ধন আত্মসাৎ কৰাৰ অভিযোগ উত্থাপন হৈছিল। অভিযোগ অনুসৰি, ৰাজহৰ ধন চৰকাৰী একাউণ্টত জমা কৰাৰ পৰিৱৰ্তে ব্যক্তিগত একাউণ্টলৈ স্থানান্তৰ কৰিছিল। এই ঘটনাক লৈ ২০১৫-১৬ চনতে অংশু ভাৰ্মাৰ বিৰুদ্ধে বৰ্খাস্তকে ধৰি বিভিন্ন ব্যৱস্থা গ্ৰহণ কৰা হৈছিল। পিছত বিষয়টো ন্যায়াধিকৰণলৈ যায়। ন্যায়াধিকৰণৰ নিৰ্দেশৰ পিছত এডিএম চিটিৰ অধ্যক্ষতাত এখন তদন্ত সমিতি গঠন কৰা হয়। সমিতিখনে বিষয়টো পুনৰ তদন্ত কৰে। তদন্তত অভিযোগনামাত উত্থাপন কৰা অভিযোগসমূহৰ সমৰ্থনত প্ৰমাণ পোৱা গৈছে বুলি বিষয়াসকলে জানিবলৈ দিয়ে।
টাইপিং টেষ্টত নিৰ্ধাৰিত মানদণ্ড পূৰণ কৰিব নোৱাৰা আন তিনিজন কৰ্মচাৰীক অৱশ্যে জিলা প্ৰশাসনে আৰু এবাৰ সুযোগ দিছে। কাঞ্চিত চৌধুৰী, ৰাহুল কুমাৰ আৰু লক্ষ্মী সক্সেনা নামৰ ৩ কৰ্মচাৰীক টাইপিং দক্ষতা উন্নত কৰি পৰীক্ষাত উত্তীৰ্ণ হ’বলৈ দুমাহৰ সময় দিয়া হৈছে। বিষয়াসকলৰ মতে, এই তিনিজন কৰ্মচাৰীক কম্পিউটাৰ টাইপিঙৰ অনুশীলন কৰি নিৰ্ধাৰিত মানদণ্ড পূৰণ কৰাৰ বাবে এই চূড়ান্ত সুযোগ দিয়া হৈছে। দুমাহৰ ভিতৰত তেওঁলোকে সফল হ’ব নোৱাৰিলে চৰকাৰী নিয়ম অনুসৰি পৰৱৰ্তী ব্যৱস্থা গ্ৰহণ কৰা হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
