প্ৰত্যাহাৰ হ’ল বিতৰ্কিত কৃষি আইন
কিন্তু অব্যাহত থাকিব কৃষকৰ আন্দোলন
ভাস্কৰজ্যোতি বৰা
ফোন নংঃ ৯১০১৫০৪৭৩০
প্ৰত্যাহৰ হ’ল বিতৰ্কিত তিনিখন কৃষি আইন৷ কৃষি আইন বাতিল বিধেয়কত ৰাষ্ট্ৰপতি ৰামনাথ কোবিন্দে স্বাক্ষৰ লগে লগে আনুষ্ঠানিকভাৱে অৱলুপ্তি ঘটিল কৃষি আইন তিনিখনৰ৷ কিন্তু কৃষকৰ আন্দোলন শেষ হ’বনে? কৃষি আইন প্ৰত্যাহাৰৰ পাছতো প্ৰতিবাদী কৃষক দৃঢ় হৈ আছে- তেওঁলোকে আন্দোলন অব্যাহত ৰাখিব৷ নতুন তিনিখন কৃষি আইনৰ বিৰোধিতা কৰি আৰম্ভ হৈছিল দেশৰ কৃষকৰ আন্দোলন৷ এই আন্দোলন আছিল অভূতপূৰ্ব৷ সাম্প্ৰতিক সময়ৰ কৃষক আন্দোলনৰ এক উজ্জ্বল দৃষ্টান্ত হিচাপে সমগ্ৰ বিশ্বতে প্ৰশংসিত হৈছে প্ৰতিবাদী কৃষক৷ আৰু অদমনীয় কৃষক আন্দোলনৰ ওচৰত সেও মানি নৰেন্দ্ৰ মোদী চৰকাৰে বাতিল কৰিবলৈ বাধ্য হ’ল আইন তিনিখন৷ কৃষি আইন প্ৰত্যাহাৰৰ আনুষ্ঠানিক ঘোষণা কৰি গুৰুপৰ্বৰ দিনা মোদীয়ে ক’লে- ‘মোৰ তপস্যাত সুৰুঙা থাকি গ’ল৷’ সঁচাকৈ মোদীৰ তপস্যাত বাৰুকৈয়ে সুৰুঙা থাকি গ’ল নেকি? কৃষি আইন প্ৰত্যাহাৰ হোৱাৰ পাছতো সংযুক্ত কিষাণ মৰ্চাই প্ৰত্যাহাৰ নকৰে আন্দোলনৰ কাৰ্যসূচী৷ কাৰণ, কৃষি আইন তিনিখন প্ৰত্যাহাৰ তেওঁলোকৰ প্ৰধান দাবী আছিল হয়, কিন্তু আনুষংগিক আৰু কেইবাটাও দাবী আছে তেওঁলোকৰ৷
প্ৰধানতঃ উৎপাদিত সামগ্ৰীৰ ন্যূনতম সমৰ্থন মূল্য নিৰ্ধাৰণ কৰিবলৈ আইন প্ৰণয়নৰ দাবী উত্থাপন কৰি আহিছে সংযুক্ত কিষাণ মৰ্চাই৷ ন্যূনতম সমৰ্থিত মূল্য নোপোৱাৰ ফলতে দেশৰ কৃষকসকলে দুৰ্ভোগ ভুগি আহিছে৷ অসমত কৃষকে কেতিয়াও ন্যূনতম সমৰ্থিত মূল্য নাপায় বুলি ক’লেও ভুল কোৱা নহয়৷ কৃষি আইন প্ৰত্যাহাৰ কৰিলে যদিও মোদী চৰকাৰে ন্যূনতম সমৰ্থিত মূল্য সন্দৰ্ভত কোনো নতুন ঘোষণা কৰা নাই৷ প্ৰতিবাদী কৃষকক আশ্বাসো দিয়া নাই ন্যূনতম সমৰ্থিত মূল্যক লৈ৷
আন্দোলনৰ সময়ত মৃত্যুবৰণ কৰা কৃষকক লৈ শেহতীয়াকৈ কেন্দ্ৰীয় চৰকাৰে লোৱা স্থিতিত জাঙুৰ খাই উঠিছে৷ কৃষক আন্দোলনত মৃত্যুবৰণ কৰাসকলক ছহিদ হিচাপে স্বীকৃতি দি ক্ষতিপূৰণৰ দাবী উঠিছে৷ কিন্তু চৰকাৰে সংসদত কৈছে যে- কৃষক আন্দোলনত কাৰো মৃত্যু হোৱা নাই৷ মৃত্যু হোৱাৰ তথ্য নাই চৰকাৰৰ হাতত৷ কৃষি আইনকেইখন বাধ্যত পৰি প্ৰত্যাহাৰ কৰিলেও চৰকাৰে আন্দোলনৰ ছহিদক মানি ল’ব বিচৰা নাই৷ কাৰণ, প্ৰধানমন্ত্ৰী মোদীয়ে কৃষি আইন তিনিখন সন্দৰ্ভত কৃষক সমাজক প্ৰত্যায় নিওৱাত চৰকাৰ ব্যৰ্থ হ’ল বুলিহে দেশবাসীৰ ওচৰত ক্ষমা বিচাৰিছিল৷ অৰ্থাৎ, চৰকাৰৰ দৃষ্টিত আইন তিনিখন শুদ্ধ আছিল৷
এতিয়া সংযুক্ত কিষাণ মৰ্চাই আৰু কেইবাটাও ইচ্ছ্যুত আন্দোলন অব্যাহত ৰাখিব বুলি কৰা ঘোষণাই স্বাভাৱিকতে অস্বস্তিত পেলাইছে চৰকাৰক৷ চৰকাৰেও কৃষি আইন বাতিল কৰি কৃষকৰ ওচৰলৈ নতুন প্ৰতিশ্ৰুতিৰে যোৱাৰ চেষ্টা কৰিব৷ পঞ্জাৱ আৰু উত্তৰ প্ৰদেশৰ বিধানসভা নিৰ্বাচনৰ বাবে তাৰ ৰণকৌশল যুগুত কৰিছে বিজেপিয়ে৷ কিন্তু প্ৰতিবাদী কৃষকৰ অদমনীয় স্থিতিয়ে সুচল কৰিবনে চৰকাৰ তথা বিজেপিৰ পথ?
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
