ভয়ংকৰ ফেৰী দুৰ্ঘটনা, ১৩ গৰাকীয়ে হেৰুৱালে প্ৰাণ, ১০১ গৰাকী কোনোমতে উদ্ধাৰ
মুম্বাইত অতিকে শোকাৱহ দুৰ্ঘটনা। ফেৰী দুৰ্ঘটনা সংঘটিত হৈ বৰ্তমানলৈ প্ৰাণ হেৰুৱালে ১৩গৰাকীকৈ লোকে। ১০১ গৰাকী লোক কোনোমতে উদ্ধাৰ।
ঘটনা সন্দৰ্ভত জানিব পৰা অনুসৰি, মুম্বাইৰ গেটৱে অৱ ইণ্ডিয়াৰ পৰা এলিফেণ্টা দ্বীপলৈ যোৱাৰ পথত এখন স্পীড বোটে খুন্দা মৰাৰ ফলত যাত্ৰী ভৰ্তি ফেৰী বাগৰি পৰাত ১৩ জন লোকৰ মৃত্যু, আনহাতে ১০১ জন লোকক উদ্ধাৰ কৰা হৈছে বুলি মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাড়নবিছে অৱগত কৰে।
নীলকমল নামৰ ফেৰীখন, মুম্বাইৰ ওচৰৰ জনপ্ৰিয় পৰ্যটনস্থলী এলিফেণ্টা দ্বীপপুঞ্জলৈ গৈ থকা অৱস্থাত স্পীড ব’টখনে ফেৰীখনৰ সৈতে খুন্দা মৰাৰ পূৰ্বে ইয়াৰ চাৰিওফালে ঘূৰি ফুৰিছিল। সাগৰত পৰীক্ষামূলকভাৱে চলি থকা নৌসেনাৰ এই স্পীড ক্ৰাফ্ট নিয়ন্ত্ৰণৰ বাহিৰলৈ গৈ ফেৰীখনত খুন্দা মৰাৰ ফলত এই ঘটনা সংঘটিত হয়।
https://x.com/richapintoi/status/1869349425329676394
শেহতীয়াকৈ নৌসেনাৰ স্পীড বোটখনৰ ইঞ্জিন সলনি কৰি নতুন ইঞ্জিনৰ পৰীক্ষা চলি আছিল। ইঞ্জিনটো সম্পূৰ্ণ থ্ৰ’টলত আবদ্ধ হৈ পৰাত নাওখন নিয়ন্ত্ৰণৰ বাহিৰলৈ গৈ ফেৰীখনত খুন্দা মাৰে।
জানিব পৰা মতে দুৰ্ঘটনাৰ সময়ত ফেৰী খনত ২০ টি শিশুকে ধৰি ১১০ৰো অধিক যাত্ৰী আছিল। ইয়াৰ উপৰিও নৌসেনাৰ দুজন জোৱান আৰু চাৰিজন কৰ্মচাৰীকে ধৰি ছয়জন ব্যক্তি।
দুৰ্ঘটনা সংঘটিত হোৱাৰ লগে লগে উদ্ধাৰকাৰী দল নামি পৰে উদ্ধাৰ অভিযানত। এই অভিযানত ১১ খন নাও, ৩ খন সাগৰীয় আৰক্ষীৰ নাও আৰু এখন কোষ্ট গাৰ্ড আৰক্ষীৰ জাহাজে এলেকাটোত তালাচী চলাই আছে। ইয়াৰ উপৰিও বাকী থকা যিকোনো যাত্ৰীক বিচাৰি উলিয়াবলৈ চাৰ্চ এণ্ড ৰেচকিউ (এছ এ আৰ) অভিযানৰ বাবে চাৰিখন হেলিকপ্টাৰ নিয়োগ কৰা হৈছে।
মুখ্যমন্ত্ৰী দেৱেন্দ্ৰ ফাড়নাবিছে জনোৱা মতে, নৌসেনা তথা ক’ষ্ট গাৰ্ডৰ এখন স্পীড ব’টে নিয়ন্ত্ৰণ হেৰুৱাই সংঘৰ্ষত লিপ্ত হোৱাৰ পিছত ফেৰীখন বাগৰি পৰে। আনহাতে এই অতি দুৰ্ভাগ্যজনক শোকাৱহ দুৰ্ঘটনাৰ বলি হোৱা আত্মীয়ক ৫ লাখ টকাৰ আৰ্থিক সাহায্য ঘোষণা কৰে মুখ্যমন্ত্ৰীৰ সাহায্য পুঁজিৰ পৰা। প্ৰধানমন্ত্ৰী মোদীয়েও এই শোকাৱহ দুৰ্ঘটনাৰ বলি হোৱা আত্মীয়ৰ বাবে ২ লাখ টকা এক্স গ্ৰেটিয়া ঘোষণা কৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
