গুৱাহাটী মহানগৰীত জাৰি ১৬৩ ধাৰা, সমৱেত হ’ব নোৱাৰিব ৫ জনতকৈ অধিক লোক
গুৱাহাটীত ভাৰতীয় নাগৰিক সুৰক্ষা সংহিতাৰ ১৬৩ ধাৰা জাৰি। কালি ১৮ ডিচেম্বৰ বুধবাৰে কংগ্ৰেছৰ প্ৰতিবাদী কাৰ্যসূচীত সংঘটিত হোৱা ঘটনাৰ পাছতে এই ১৬৩ ধাৰা জাৰি প্ৰশাসনৰ ফালৰ পৰা।
এই ধাৰা অনুসৰি এতিয়া মহানগৰীৰ কোনো স্থানত সমৱেত হ’ব নোৱাৰিব ৫ জনতকৈ অধিক লোক। ৫ জনতকৈ অধিক লোক সমবেত হোৱা দেখিলেই আৰক্ষীয়ে আইনি ব্যৱস্থা গ্ৰহণ কৰিব।
ইয়াৰ লগতে প্ৰতিবাদ, ধৰ্ণা, শ্ল’গান প্ৰদৰ্শনতো বাধা আৰোপ কামৰূপ প্ৰশাসনৰ। দিছপুৰৰ ৰাজধানী চৌহদৰ এক কিলোমিটাৰ ব্যাসাৰ্ধত কৰিব নোৱাৰিব প্ৰতিবাদ।
কালি বুধবাৰৰ ঘটনাৰ পাছতে সাৱধানতামূলক ব্যৱস্থা গ্ৰহণ মহানগৰ আৰক্ষীৰ। উল্লেখ্য যে, কালি ১৮ ডিচেম্বৰ তাৰিখে কংগ্ৰেছৰ ‘ৰাজভৱন চলো’ কাৰ্যসূচী অনুষ্ঠিত হৈছিল। প্ৰতিবাদৰ সময়ত আৰক্ষী আৰু প্ৰতিবাদকাৰীৰ মাজত সৃষ্টি হৈছিল উত্তপ্ত পৰিস্থিতিৰ। পৰিস্থিতি নিয়ন্ত্ৰণৰ বাবে আৰক্ষীয়ে কন্দুৱা গেছ প্ৰয়োগ কৰিছিল।
পাছে সেই কন্দুৱা গেছৰ বাবেই সংঘটিত হয় এক নহবলগীয়া ঘটনা। কাৰ্যসূচীত অংশ ল’বলৈ আহি মৃত্যু হয় মৃদুল ইছলাম নামৰ এজন অধিবক্তাৰ। পৰিস্থিতি নিয়ন্ত্ৰণৰ বাবে আৰক্ষীয়ে কন্দুৱা গেছ প্ৰয়োগৰ কৰাৰ লগতে লাঠিচালনাও কৰিছিল।
অধিবক্তা মৃদুল ইছলামৰ গাত লাগিছিল কন্দুৱা গেছৰ চেল। আহত মৃদুল ইছলামক গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হৈছিল যদিও হাস্পতালত মৃত্যু হয় লোকজনৰ। মৃত মৃদুল ইছলামৰ ঘৰ দক্ষিণ কামৰূপৰ সোণতলীত বুলি জানিব পৰা গৈছে। কংগ্ৰেছৰ আইনী কোষৰ অধিবক্তা আছিল মৃদুল ইছলাম।
সেই ঘটনাৰ বাবেই আজিয়ো যাতে কোনো উত্তপ্ত পৰিস্থিতিৰ সৃষ্টি নহয়, তাৰ বাবে প্ৰশাসনে জাৰি কৰিলে এই ১৬৩ ধাৰা।
উল্লেখ্য যে, কংগ্ৰেছে কালি বুধবাৰে ‘এক দেশ এক নিৰ্বাচন’ৰ বিৰোধিতা, স্মাৰ্ট মিটাৰ প্ৰত্যাহাৰ, হিংসা বন্ধ কৰি মণিপুৰত শান্তি ঘূৰাই অনাৰ দাবীত ‘ৰাজভৱন চলো’ কাৰ্যসূচী ৰূপায়ণ কৰিছিল। এই প্ৰতিবাদৰ সময়তে আৰক্ষী আৰু প্ৰতিবাদকাৰীৰ মাজত সৃষ্টি হৈছিল উত্তপ্ত পৰিস্থিতি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
