অসম লাইভ ২৪ঃ নতুন বছৰলৈ মাজত মাথো কেইটামান ক্ষণ বাকী৷ কাইলৈৰ পৰা সলনি হ’ব কেলেণ্ডাৰ৷ পিছে পুৰণি কেলেণ্ডাৰখনত ৰৈ গ’ল কেইটামান উল্লেখনীয় দিন৷ যি কেইটা দিন হৈ ৰ’ব স্মৰণীয়৷
ৰাজনীতিৰ পৰা অৰ্থনীতিলৈ, খেল জগতৰ পৰা সাংস্কৃতিক জগতলৈ বহু ঘটনা, পৰিক্ৰমাৰ সাক্ষী হ’ল ২০২১৷ বছৰটোৰ আৰম্ভনিতে গণৰাজ্য দিৱসৰ দিনটোত দেশৰ অন্নদাতাই উলিয়াইছিল ট্ৰেক্টৰ ৰেলী৷ ৩ বিতৰ্কিত কৃষি আইনৰ বিৰুদ্ধে দেশৰ কৃষকসকলে সাব্যস্ত কৰিছিল তীব্ৰ প্ৰতিবাদ৷ লালকিল্লাৰ প্ৰাচীৰত কৃষকে আঁৰিছিল পতাকা৷
বছৰটো আৰম্ভ হোৱাৰ কিছুদিনৰ পাছতে আহিছিল কোভিডৰ দ্বিতীয় লহৰ৷ আকৌ আৰম্ভ হৈছিল লকডাউন৷ এই দ্বিতীয় লহৰ ইমানেই ভয়াৱহ আছিল যে দেশৰ বহু হাস্পতালত নাটনি হৈছিল অক্সিজেনৰ৷ মৃত্যু হৈছিল বহু লোকৰ৷ পিছে বছৰটোৰ আৰম্ভণিৰ পৰাই আৰম্ভ হৈছিল কোভিড ভেকচিনেচন প্ৰক্ৰিয়া৷
২০২১ চনত অসমকে ধৰি দেশৰ ৫ ৰাজ্যত হৈছিল বিধানসভা নিৰ্বাচন৷ এই নিৰ্বাচনত চৰ্চাৰ মূল কেন্দ্ৰবিন্দু আছিল পশ্চিম বংগ নিৰ্বাচন৷ নন্দীগ্ৰামত পৰাস্ত হৈছিল মমতা বেনাৰ্জী৷ পিছে চৰকাৰ গঠন কৰাত সফল হ’ল TMC৷ অসতো ড০ হিমন্ত বিশ্ব শৰ্মাৰ নেতৃত্বত গঠন হৈছিল BJP,AGP, UPPL ৰ চৰকাৰ৷
২০২০ৰ দৰে ২০২১ বলীউডৰ বাবে সুখকৰ নাছিল৷ ২০২১ বৰ্ষত আমি হেৰুৱাইছিলো বৰ্ষীয়ান অভিনেতা দিলীপ কুমাৰক৷ একেদৰে সৰু পৰ্দাৰ জনপ্ৰিয় অভিনেতা সিদ্ধাৰ্থ শুক্লাৰো মৃত্যু হৈছিল ২০২১ বৰ্ষত৷
উল্লেখ্য, খেলজগতৰ বাবে এটি উল্লেখনীয় বছৰ আছিল ২০২১৷ অলিম্পিকত ভাৰতে ৭টাকৈ পদক লাভ কৰি ৰচনা কৰিছিল ইতিহাস৷ জেভলিন থ্ৰ’ত নীৰজ চোপ্ৰাই লাভ কৰিছিল সোণৰ পদক৷ একেদৰে লাভলীনা বৰগোহাঁয়ে ব্ৰঞ্জৰ পদক লাভ কৰি গৌৰাৱান্বিত কৰিছিল ৰাজ্যবাসীক৷
বছৰটোৰ শেষৰফালে নবেম্বৰ মাহত চৰকাৰে বাতিল কৰিছিল তিনি বিতৰ্কিত কৃষি আইন৷ ১১ ডিচেম্বৰত বিজয় দিৱস পালন কৰি ৰাজ্যবাসীলৈ নিজ গৃহলৈ উভতিছিল দেশৰ অন্নদাতা৷
ইয়াৰ উপৰি ২০২১ বৰ্ষতে ২১ বছৰৰ পাছত ভাৰতে লাভ কৰিছিল মিছ ইউনিভাৰ্ছ৷ হৰনাজ সান্ধুৰ সফলতাত গৌৰাৱান্বিত দেশবাসী৷ একেদৰে বিকি-কেটৰিনাৰ বিবাহেও আকৰ্ষণ কৰিছিল সকলোকে৷
ডিচেম্বৰ মাহৰ মাজভাগত নাগালেণ্ডত সংঘটিত হৈছিল হৃদয় বিদাৰক ঘটনা৷ সেনা-বাহিনীৰ গুলীবৰ্ষণত মৃত্যু হৈছিল ১৪ জন নীৰিহ লোকৰ৷ ঘটনাৰ পাছতে উত্তপ্ত হৈ পৰিছিল মন জিলা৷ AFSPA বাতিলৰ দাবীত এতিয়াও প্ৰতিবাদমুখৰ হৈয়ে আছে নগাভূমি৷
বছৰটোৰ শেষত আন এক দুঃখবৰে জোকাৰি গ’ল দেশ৷ এক হেলিকপ্টাৰ দুৰ্ঘটনাত মৃত্যু হয় দেশৰ CDS বিপিন ৰাৱাটৰ৷ এই দুৰ্ঘটনাতে মৃত্যু হৈছিল আন ১৩ জন লোকৰ৷
ইফালে বছৰটোৰ শেষ ক্ষণত অমিক্ৰনে সৃষ্টি কৰিছে আতংকৰ৷ দেশত প্ৰতিদিনেই বৃদ্ধি পাইচে অমিক্ৰণৰ সংক্ৰমণ৷ বৰ্ধিত সংক্ৰমণৰ বাবে দেশৰ কেইবাখনো ৰাজ্যত জাৰি কৰিছে কঠোৰ নিৰ্দেশনা৷
এনেদৰেই ভাল-বেয়াৰ অলেখ ঘটনাৰ সাক্ষী হৈ পাৰ হ’ল ২০২১৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
