বিশ্বকাপ চেম্পিয়ন হোৱাৰ বাবে ভাৰতীয় ক্ৰিকেট বৰ্ডে ১২৫ কোটি আৰ্থিক পুৰস্কাৰ দিছে ৰোহিত শৰ্মাৰ দলক৷ ১৫গৰাকী ক্ৰিকেটাৰৰ দৰে কোচ ৰাহুল দ্ৰাবি়ড়েও পাইছে ৫কোটি টকা৷ কিন্তু অইন তিনিজন সহকাৰী কোচক আঢ়ৈ কোটিকৈ ধন দিয়াটো পছন্দ হোৱা নাই দ্ৰাবিড়ৰ৷ এই কথাৰ পাছতেই পুৰস্কাৰৰ আধা ধন বিচিচিআইক উভতাই দিছে দ্ৰাবিড়ে৷
পুৰস্কাৰ অৱশ্যে অস্বীকাৰ কৰা নাই দ্ৰাবিড়ে৷ তেওঁৰ বক্তব্য, ‘বোলিং কোচ পৰশ মামব্ৰে, বেটিং কোচ বিক্ৰম ৰাঠৌৰ আৰু ফিল্ডিং কোচ টি দিলীপৰ অৱদান এই বিজয়ত কম নহয়৷ তেওঁলোকেও সমান ধন পোৱা উচিত৷ মই সহকাৰীসকলতকৈ আঢ়ৈ কোটি টকা কোনো কাৰণতে বেছিকৈ ল’ব নোৱাৰো৷ মই তেওঁলোকৰ আৱেগ বুজি পাওঁ, সেয়ে স্বইচ্ছাৰেই মই আঢ়ৈ কোটি টকা উভতাই দিয়াৰ সিদ্ধান্ত লৈছো৷’
দ্ৰাবিড় আৰু তিনিজন সহকাৰী কোচে পাইছে ৩ কোটি ১২ লাখ ৫০ হাজাৰ টকাকৈ৷ এইবাৰেই প্ৰথম নহয়. ইয়াৰ পূৰ্বেও এনে কাম কৰিছে দ্ৰাবিড়ে৷ ২০১৮ চনৰ অনূৰ্ধ্ব-১৯ত ভাৰতীয় দলৰ কোচ আছিল দ্ৰাবিড়৷ সেইবাৰৰ বিশ্বকাপ জিকাৰ পাছত বিচিচিআইয়ে দ্ৰাবিড়ক আৰ্থিক পুৰস্কাৰ হিচাপে দিছিল ৫০ লাখ টকা আৰু সহকাৰী কোচসকলক দিছিল ২০লাখকৈ টকা৷ সেইবাৰো সহকাৰীসকলতকৈ বেছি ধন ল’বলৈ অস্বীকাৰ কৰিছিল দ্ৰাবিড়ে৷ বৰ্ডক তেতিয়াও অনুৰোধ কৰিছিল মুঠ ধন সমানে সমানে আমাৰ ৪কোচৰ মাজত ভগাই দিয়ক৷ বৰ্ড তেতিয়াই তেওঁৰ সিদ্ধান্তত মুগ্ধ হৈছিল৷ টি-২০ত ভাৰতৰ বিজয়ৰ লগে লগেই অৱসৰ লৈছে দ্ৰাবিড়েও৷ বিদায় বেলাত আকৌ এবাৰ চৰ্চালৈ আহিছে ৰাহুল দ্ৰাবিড়৷ লাভ কৰা ৫ কোটি টকাৰ আঢ়ৈ কোটি উভতাই দিব ৰাহুল দ্ৰাবিড়ে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
