ভাৰতৰ প্ৰাক্তন আন্তঃৰাষ্ট্ৰীয় ক্ৰিকেটাৰ অৰুণ লালে ৬৬ বছৰৰ বয়সত দ্বিতীয় বিবাহ কৰাইছে৷ সোমবাৰে কলকতাত প্ৰাক্তন ভাৰতীয় ক্ৰিকেটাৰগৰাকীয়ে বুলবুল সাহা নামৰ ৩৮ বছৰীয়া এগৰাকী যুৱতীৰে বিবাহপাশত আৱদ্ধ হয়৷
উল্লেখ্য যে কিছুদিন পূৰ্বে অৰুণ লাল আৰু বুলবুল সাহাৰ বিয়াৰ বাগদান কাৰ্যসূচীৰ ফ’টোসহ বাতৰি প্ৰকাশ পাইছিল৷
প্ৰথমা পত্নীৰ সন্মতিতে প্ৰাক্তন ক্ৰিকেটাৰগৰাকীয়ে ৩৮ বছৰীয়া বুলবুল সাহাৰ সৈতে বিবাহপাশত আৱদ্ধ হোৱা বুলি জানিব পৰা গৈছে৷
লগতে পঢ়ক Love Vs Money : ধন নে প্ৰেম, মানুহে জীৱনত কোনটো অধিক বিচাৰে?
উল্লেখ্য নিজেও দুৰাৰোগ্য ৰোগত আক্ৰান্ত হৈ সুস্থ হৈ উঠা অৰুণ লালৰ প্ৰথমা পত্নী ৰীণা বৰ্তমান গুৰুতৰভাৱে অসুস্থ আৰু দ্বিতীয় বিবাহৰ পিছতে দ্বিতীয়া পত্নী বুলবুল সাহাই ৰীণাৰ দায়িত্ব ল’ব বুলিও প্ৰকাশ পাইছে৷
ভাৰতীয় জাতীয় দলৰ হৈ টেষ্ট আৰু এদিনীয়া আন্তৰ্জাতিক ক্ৰিকেট মেচত প্ৰতিনিধিত্ব কৰা অৰুণ লালে পৰৱৰ্তী সময়ত ক্ৰিকেটৰ ধাৰাভাষ্যকাৰ পেচা আৰম্ভ কৰিছিল৷ ১৯৫৫ চনত পঞ্জাৱৰ কাপুৰথালাত জন্ম গ্ৰহণ কৰা অৰুণ লালে ভাৰতৰ হৈ ১৬ খন টেষ্ট আৰু ১৩ খন আন্তঃৰাষ্ট্ৰীয় এদিনীয়া মেচত অংশগ্ৰহণ কৰিছিল ৷
ইয়াৰ পিছতে তেওঁ ক্ৰিকেটৰ প্ৰশিক্ষক হিচাপেও আত্মপ্ৰকাশ কৰে৷ বৰ্তমান অৰুণ লাল বংগ ক্ৰিকেট দলৰ মুখ্য প্ৰশিক্ষক আৰু তেওঁৰ প্ৰশিক্ষণতে বংগই ২০২১-২২ বৰ্ষৰ ৰঞ্জী ট্ৰফীৰ ফাইনেলত প্ৰৱেশ কৰিছিল৷
লগতে পঢ়ক আপোনাৰ শিশুৰ হাতৰ আখৰ বেয়া নেকি? ৫টা পৰামৰ্শৰে ভাল হ’ব শিশুৰ হাতৰ আখৰ
ইফালে ঘণিষ্ঠ বন্ধু মহলৰ উপস্থিতিত কলকতাত সম্পন্ন হোৱা অৰুণ লালৰ দ্বিতীয় বিবাহৰ পিছতে দ্বিতীয়া পত্নী বুলবুল সাহাই তেওঁলোকৰ বিবাহৰ ফ’টো সামাজিক মাধ্যমত শ্বেয়াৰ কৰিছে৷
‘‘অফিচিয়েলি মিচেছ লাল, আমাক সমৰ্থন কৰাৰ বাবে পৰিয়ালৰ লগতে সকলো বন্ধু-বান্ধৱকে ধন্যবাদ জ্ঞাপন কৰিছো৷’’ সামাজিক মাধ্যমত বিবাহৰ ফ’টো শ্বেয়াৰ কৰি বুলবুল সাহাই এইদৰে লিখিছে৷
উল্লেখ্য যে যোৱা সপ্তাহত নিজৰ ফেচবুকত অৰুণ লালেৰে বাগদানৰ ফ’টো শ্বেয়াৰ কৰি বুলবুল সাহা ইন্টাৰনেটৰ পৃথিৱীত খলকনি তুলিছিল৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
