অষ্ট্ৰেলিয়াৰ মহিলা ক্ৰিকেটত এই মুহূৰ্তত এক বিতৰ্কই তীব্ৰ চাঞ্চল্যৰ সৃষ্টি কৰিছে। অষ্ট্ৰেলিয়াৰ মহিলা ক্ৰিকেট দলৰ উপ-অধিনায়িকা এছলে গাৰ্ডনাৰৰ বিৰুদ্ধে তেওঁৰ জীৱনসংগী মণিকা ৰাইটে অবৈধ সম্পৰ্কৰ অভিযোগ উত্থাপন কৰিছে।
মনিকাৰ দাবী অনুসৰি, আন এজন অষ্ট্ৰেলিয়ান ক্ৰিকেটাৰ জৰ্জিয়া ৱলৰ সৈতে গাৰ্ডনাৰৰ ঘনিষ্ঠ সম্পৰ্ক গঢ়ি উঠিছে। উল্লেখযোগ্য যে, এছ গাৰ্ডনাৰ আৰু মনিকা ৰাইটে ২০২৫ চনত বিৱাহপাশত আবদ্ধ হৈছিল। কিন্তু বিগত কিছু সময় ধৰি দুয়ো পৃথকে বাস কৰি আহিছে।
ছ’চিয়েল মিডিয়াত গাৰ্ডনাৰৰ বিৰুদ্ধে মণিকাৰ অভিযোগ
ডেইলী মেইলৰ এক প্ৰতিবেদন অনুসৰি, এছ গাৰ্ডনাৰে এদিন হঠাতে নিজৰ বিৱাহৰ আঙঠিটো থৈ গৃহ এৰি ওলাই যায়। ইয়াৰ পিছতে মনিকা ৰাইটে নিজৰ ইনষ্টাগ্ৰাম ষ্ট’ৰীত জৰ্জিয়া ৱ’লৰ এখন ফটো শ্বেয়াৰ কৰে। ফটোৰ কেপচনত মণিকাই লিখে— ‘এইগৰাকীয়েই সেইগৰাকী, যাৰ বাবে মোৰ জীৱনসংগীয়ে মোক প্ৰতাৰণা কৰিলে।’ মণিকাই উক্ত পোষ্টৰ জৰিয়তে গাৰ্ডনাৰ আৰু জৰ্জিয়া ৱলৰ মাজৰ সম্পৰ্কৰ ইংগিত দিয়ে।
একেলগে খেলিছিল বিগত T20 বিশ্বকাপত
এছ গাৰ্ডনাৰ আৰু জৰ্জিয়া ৱ’লে শেহতীয়াকৈ ইংলেণ্ডত অনুষ্ঠিত হোৱা মহিলা T20 বিশ্বকাপত অষ্ট্ৰেলিয়াৰ দলৰ সদস্য আছিল। অষ্ট্ৰেলিয়াই চেম্পিয়নৰ খিতাপ দখল কৰাৰ মাত্ৰ এসপ্তাহ পিছতেই এই অভিযোগ ৰাজহুৱা হোৱাত অষ্ট্ৰেলিয়ান ক্ৰিকেটত ব্যাপক চৰ্চা আৰম্ভ হৈছে। অৱশ্যে এই অভিযোগ সন্দৰ্ভত এছ গাৰ্ডনাৰ বা ক্ৰিকেট অষ্ট্ৰেলিয়াই এতিয়ালৈকে কোনো আনুষ্ঠানিক বক্তব্য প্ৰকাশ কৰা নাই। সেয়েহে অভিযোগসমূহৰ সত্যতা সম্পৰ্কে এই মুহূৰ্তত নিশ্চিতভাৱে একো ক’ব নোৱাৰি
গাৰ্ডনাৰ-ৱ’লৰ ক্ৰিকেট কেৰিয়াৰ
এছ গাৰ্ডনাৰ অষ্ট্ৰেলিয়াৰ মহিলা ক্ৰিকেট দলৰ উপ-অধিনায়িকা আৰু দলটোৰ অন্যতম অভিজ্ঞ অলৰাউণ্ডাৰ। তেওঁ এতিয়ালৈকে অষ্ট্ৰেলিয়াৰ হৈ ২০৭ খন আন্তঃৰাষ্ট্ৰীয় মেচ খেলিছে। এই সময়ছোৱাত ৩,৫০০ৰো অধিক ৰান সংগ্ৰহ কৰাৰ লগতে ২৩৯টা উইকেট দখল কৰি দলৰ অন্যতম গুৰুত্বপূৰ্ণ খেলুৱৈ হিচাপে নিজকে প্ৰতিষ্ঠা কৰিছে।
আনহাতে জৰ্জিয়া ৱ’ল হৈছে এগৰাকী টপ অৰ্ডাৰ বিস্ফোৰক বেটাৰ। জৰ্জিয়া ৱ’লে এই পৰ্যন্ত অষ্ট্ৰেলিয়াৰ হৈ ১৯খন T20ত অংশগ্ৰহণ কৰি এটা শতক আৰু ৩টা অৰ্ধশতকসহ ৬০৪ ৰান সংগ্ৰহ কৰাৰ লগতে ১৩খন ODIত দুটাকৈ শতক আৰু অৰ্ধশতকসহ ৫৪৯ সংগ্ৰহ কৰিছে।
উল্লেখ্য, এই অভিযোগসমূহ এতিয়ালৈকে কেৱল মণিকা ৰাইটৰ ফালৰ পৰা উত্থাপিত হৈছে। এছ গাৰ্ডনাৰ বা জৰ্জিয়া ৱলে এই সন্দৰ্ভত কোনো প্ৰতিক্ৰিয়া প্ৰকাশ কৰা নাই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
