বিশ্ববিদ্যালয়ৰ হোষ্টেলৰ কোঠাত সন্দেহজনক অৱস্থাত উদ্ধাৰ আই পি এছ বিষয়াৰ কন্যাৰ নিথৰ দেহ
উত্তৰ প্ৰদেশৰ পৰা আহিছে এটা ডাঙৰ খবৰ। ৰাজধানী লক্ষ্ণৌত এগৰাকী ছাত্ৰীৰ সন্দেহজনক মৃত্যুৰ ঘটনাই চাঞ্চল্যৰ সৃষ্টি কৰিছে ৰাম মনোহৰ লোহিয়া ৰাষ্ট্ৰীয় আইন বিশ্ববিদ্যালয়ত। ছাত্ৰীগৰাকীৰ পিতৃ এন আই এ দিল্লীৰ আই জি হিচাপে কৰ্তব্যত অধিষ্ঠিত হৈ আছে। তথ্য লাভ কৰি ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰা হৈছে।
লক্ষ্ণৌৰ ৰাম মনোহৰ লোহিয়া ৰাষ্ট্ৰীয় আইন বিশ্ববিদ্যালয়ত সংঘটিত হোৱা এই ঘটনাই চাঞ্চল্যৰ সৃষ্টি কৰিছে। ১৯ বছৰীয়া অনিকা ৰস্তোগী আইন বিশ্ববিদ্যালয়ৰ তৃতীয় বৰ্ষৰ এল এল বি ছাত্ৰী আছিল।
প্ৰাথমিক তথ্য অনুসৰি অনিকা নিশা হোষ্টেলৰ কোঠালৈ গৈছিল। অনিকাৰ লগৰ সকলে পুৱাই অনিকাৰ ৰুমলৈ গৈ দৰ্জা বন্ধ দেখি কেইবাবাৰো ফোন লগাই। কিন্তু বহু সময় ধৰি অনিকাই কোঠাটোৰ দুৱাৰ নোখোলাত আৰু ভিতৰৰ পৰা কোনো শব্দও নহাত চিন্তাত পৰে বান্ধৱীসকল।
পাছত জোৰ কৰি দৰ্জা ভাঙি যেতিয়া অনিকাৰ কোঠাত প্ৰৱেশ কৰে, তেতিয়া সকলো স্তম্ভিত হৈ পৰে। অনিকাৰ মৃতদেহ সন্দেহজনক অৱস্থাত হোষ্টেলৰ কোঠাটোৰ মজিয়াত পৰি আছিল। লগে লগে হাহাকাৰ লাগি যায়। বিশ্ববিদ্যালয় আৰু হোষ্টেল প্ৰশাসনক এই বিষয়ে অৱগত কৰা হয়। আৰক্ষীকো খবৰ কৰা হয় ঘটনা সন্দৰ্ভত।
এই ঘটনাই সমগ্ৰ বিশ্ববিদ্যালয় আৰু হোষ্টেলত আলোড়নৰ সৃষ্টি কৰিছে। ঘটনাস্থলীত উপস্থিত হৈ মৃতদেহটো মৰণোত্তৰ পৰীক্ষাৰ বাবে প্ৰেৰণ কৰি কোঠাটোৰ তদন্ত অব্যাহত ৰাখিছে। আৰক্ষীয়ে অনিকাৰ বান্ধৱীসকলকো জেৰা অব্যাহত ৰাখিছে। অনিকাৰ পিতৃ সন্তোষ ৰাস্তোগী আই পি এছ বিষয়া আৰু বৰ্তমান এন আই এ দিল্লীৰ আই জি।
বৰ্তমানলৈ ঘটনা সন্দৰ্ভত বিশেষ তথ্য লাভ কৰা নাই আৰক্ষীয়ে। সেয়ে মৰণোত্তৰ পৰীক্ষাৰ ফলাফললৈ অপেক্ষা সকলোৰে। সেই ফলাফল অহাৰ পিছতহে জানিব পৰা যাব ছাত্ৰীগৰাকীৰ মৃত্যুৰ কাৰণ কি!
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
