শেহতীয়াকৈ ছ’চিয়েল মিডিয়া প্লেটফৰ্ম Xত আৰুহী ৰেড্ডী নামৰ এটা একাউণ্টৰ পৰা কৰা এটা পোষ্টে ব্যাপক চৰ্চা লাভ কৰিছে। কৰ্ণাটকৰ আৰূহী ৰেড্ডী নামৰ এই যুৱতীগৰাকীয়ে ছ’চিয়েল মিডিয়া প্লেটফৰ্ম Xত বিয়াৰ প্ৰস্তাৱক লৈ কৰিছিল পোষ্টটো। আৰুহীয়ে পোষ্টটোত উল্লেখ কৰা দাবী অনুসৰি, শেহতীয়াকৈ তেওঁলৈ এটা বিয়াৰ প্ৰস্তাৱ আহিছিল। বিয়াৰ প্ৰস্তাৱ অহা যুৱকজনৰ ব্যক্তিত্ব আৰুহী ভালেই লাগিছিল। লগতে যুৱকজনৰ বাৰ্ষিক দৰমহাও প্ৰায় ৪০ লাখ টকা বুলি জানিব পৰা গৈছিল আৰু তেওঁ এটা ভাল পৰিয়ালৰ বুলি কোৱা হৈছিল।
কিন্তু এই সকলো দিশ ভাল লগাৰ পিছতো আৰুহীয়ে এই সম্পৰ্কটো নাকচ কৰে। সম্পৰ্কটো নাকচ কৰাৰ একমাত্ৰ কাৰণ হিচাপে যুৱতীগৰাকীয়ে উল্লেখ কৰে যে- যুৱকজনৰ Instagram প্ৰফাইলত উল্লেখ কৰা এটা কথা। আৰুহীৰ মতে, যুৱকজনে তেওঁৰ Instagram প্ৰফাইলত কংগ্ৰেছ নেতা ৰাহুল গান্ধীক নিজৰ ‘ৰোল মডেল’ হিচাপে উল্লেখ কৰিছিল। এই কথাটোৱেই আৰুহীৰ বাবে বিয়াৰ প্ৰস্তাৱটো নাকচ কৰাৰ মূল কাৰণ হৈ পৰে।
আৰুহীয়ে নিজৰ পোষ্টত তেওঁ ৰাহুল গান্ধীক লৈ তীব্ৰ মন্তব্য কৰে। আৰূহীয়ে যুক্তি দি কয় যে কোনো ব্যক্তিয়ে-যদি এজন ‘Looser’ক নিজৰ ৰোল মডেল হিচাপে গণ্য কৰে, তেন্তে সেই ব্যক্তিজনৰ বুদ্ধিমত্তা বা IQক লৈ প্ৰশ্ন উত্থাপন হোৱাটো স্বাভাৱিক। ইয়াৰ উপৰি, তেওঁ যুৱকজনৰ ৰাজনৈতিক আৰু সামাজিক চিন্তাধাৰা ভৱিষ্যতে পৰিয়াল তথা সন্তানৰ ওপৰত কেনেধৰণৰ প্ৰভাৱ পেলাব পাৰে, সেই বিষয়েও প্ৰশ্ন উত্থাপন কৰে। তেওঁৰ মতে, জীৱনসংগী বাছনিৰ ক্ষেত্ৰত কেৱল চাকৰি, দৰমহা বা পৰিয়ালৰ পটভূমিয়েই গুৰুত্বপূৰ্ণ নহয়; দুয়োজনৰ চিন্তা-চৰ্চা আৰু আদৰ্শৰ মিল থকাটোও গুৰুত্বপূৰ্ণ।
আৰুহী ৰেড্ডীৰ এই পোষ্ট ছ’চিয়েল মিডিয়াত ভাইৰেল হোৱাৰ পিছতে বিষয়টোক লৈ বিভিন্ন ধৰণৰ প্ৰতিক্ৰিয়া দেখা গৈছে। কোনোবাই ব্যক্তিগত সম্পৰ্কত ৰাজনৈতিক মতাদৰ্শৰ গুৰুত্বক সমৰ্থন কৰিছে, আনহাতে আন একাংশই কেৱল ৰাজনৈতিক পছন্দৰ ভিত্তিত বিয়াৰ প্ৰস্তাৱ নাকচ কৰাটো উচিত নে নহয়, সেই লৈ প্ৰশ্ন উত্থাপন কৰিছে।
অৱশ্যে, এই ঘটনাৰ মূল তথ্যসমূহ আৰুহী ৰেড্ডীৰ ছ’চিয়েল মিডিয়া পোষ্টৰ ওপৰত আধাৰিত। যুৱকজনৰ পৰিচয় বা তেওঁৰ দৰমহাৰ বিষয়ে স্বতন্ত্ৰভাৱে নিশ্চিত তথ্য প্ৰকাশ পোৱা নাই। সেয়ে ঘটনাটোক ছ’চিয়েল মিডিয়াত কৰা দাবী হিচাপেই বিবেচনা কৰাটো উচিত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
