এইবাৰ পোহৰলৈ আহিছে অন্য এক লোমহৰ্ষক কাণ্ড৷ ভাবী কইনাই ভাবী দৰাৰ ডিঙিত ছুৰিকাঘাত কৰাৰ দৰেই এক ভয়ংকৰ কাণ্ড সংঘটিত হৈছে৷
ঘটনাৰ বিৱৰণীৰ মতে এগৰাকী যুৱতীয়ে ভাবী দৰাক বিশাখাপট্টনমৰ চোৰাভাৰামৰ এটা পাহাৰৰ শিখৰলৈ মাতি নি ডিঙিত ছুৰীৰে আঘাত কৰে৷ ভুক্তভোগী যুৱকজনে কোনোপধ্যে গৈ চিকিৎসালয়ত ভৰ্তি হোৱাত প্ৰাণ ৰক্ষা পৰে৷
ভুক্তভোগী যুৱকজনৰ নাম ৰামু নাইডু৷ তেওঁ বিশাখাপট্টনমৰ চিএছআইআৰত বিজ্ঞানীৰূপে কৰ্মৰত৷ কিছুদিন পিছতে অভিযুক্ত যুৱতীগৰাকীৰ সৈতে তেওঁৰ বিবাহ সম্পন্ন হোৱাৰ কথা আছিল৷
লগতে পঢ়ক বিবাহস্থলীতে দৰাৰ গালত দুটা পূৰ্ণতীয়া চৰ কইনাৰ, কিয় দিলে এই চৰ? চাওক ভিডিঅ’
অভিযুক্ত যুৱতীগৰাকীৰ নাম পুষ্পা বুলি প্ৰকাশ পাইছে৷ ২২ বছৰীয়া পুষ্পাৰ পিতৃ-মাতৃয়ে জোৰকৈ ৰামুৰ সৈতে বিয়া দিবলৈ সাজু হৈছিল৷ পুষ্পাই ঘৰত আপত্তি কৰাত পিতৃ-মাতৃয়ে তেওঁৰ কথা নুশুনাত এই কাণ্ড সংঘটিত কৰা বুলি প্ৰকাশ পাইছে৷
ইতিমধ্যে ঘটনাৰ সন্দৰ্ভত আৰক্ষীয়ে তদন্ত প্ৰক্ৰিয়া আৰম্ভ কৰিছে৷ আৰক্ষীয়ে প্ৰকাশ কৰা মতে ৰামুৰ নাইডুৱে ডিঙিৰ লগতে হাততো আঘাত পাইছে৷ তেওঁৰ হাতত তিনিটা ক্ষত চিহ্ণ প্ৰত্যক্ষ কৰা বুলি আৰক্ষীয়ে প্ৰকাশ কৰিছে৷
আৰক্ষীয়ে প্ৰকাশ কৰিছে যে যুৱতীগৰাকীয়ে ইয়াৰ আগতে কোনো অপৰাধমূলক কাণ্ড সংঘটিত কৰাৰ তথ্য নাই৷ আৰক্ষীৰ জেৰাত পুষ্পাই প্ৰকাশ কৰিছে যে তেওঁ এই বিবাহত বহিবলৈ সন্মত হোৱা নাছিল৷ আনকি আৰম্ভণীৰে পৰা মাক-দেউতাকক এই বিবাহ বিৰোধিতা কৰি আহিছিল যদিও তেওঁলোকে পুষ্পাৰ আপত্তি উপেক্ষা কৰি বিবাহৰ দিন ধাৰ্য কৰে৷ আৰু অৱশেষত উপায়বিহীন হৈ এই পদক্ষেপ ল’বলৈ বাধ্য হৈ পৰা বুলি আৰক্ষীৰ আগত প্ৰকাশ কৰিছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
