ৰাছিয়াৰ সেনাই মাৰিয়পোলত আটক কৰা ইউক্ৰেইনৰ সৈন্যসকলক আত্মসমৰ্পণ কৰিবলৈ শেষ সকিয়নী প্ৰদান কৰিছে৷ ৰাছিয়াই ‘‘সময়সীমা’’ নিৰ্ধাৰণ কৰি দি কৈছে অতি শীঘ্ৰেই সেনাসকলে আত্মসমৰ্পণ কৰক৷
মঙলবাৰে ৰাছিয়াৰ সামৰিক বাহিনীয়ে ঘোষণা কৰিছে যে ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিৰ প্ৰতি অনুগত সৈনিকসকলে যদি তাৎক্ষণিকভাৱে আত্মসমৰ্পণ নকৰে তেন্তে তেওঁলোকে ইয়াৰ পৰিণামৰ বাবে সাজু থাকিব লাগিব।
ৰাছিয়াৰ ৰাষ্ট্ৰপতি ভ্লাদিমিৰ পুটিনৰ বাহিনীয়ে কৈছে যে যিসকলে মঙলবাৰে আবেলিৰ ভিতৰত তেওঁলোকৰ অস্ত্ৰ সমৰ্পণ কৰে তেওঁলোকক জীৱন ৰক্ষাৰ সুযোগ দিয়া হ’ব।
লগতে পঢ়ক হতাশাৰ পৰা মুক্তি পাবলৈ কি কি কৰিব?
ইফালে সোমবাৰে ইউক্ৰেইনৰ প্ৰধানমন্ত্ৰী ডেনিছ শ্মিহালে কয়, ‘‘মাৰিয়পোলক ৰাছিয়াৰ বাহিনীয়ে ধ্বংস কৰিছে যদিও পতন ঘটাব পৰা নাই!’’
দক্ষিণ ইউক্ৰেইনৰ বন্দৰ চহৰ মাৰিয়পোলে ৰাছিয়ান বাহিনীৰ নিৰন্তৰ আক্ৰমণৰ সন্মুখীন হৈ আছে যদিও ইউক্ৰেইনৰ যুঁজাৰু সেনাই আত্মসমৰ্পণ কৰা নাই। মাৰিয়পোলৰ মেয়ৰ বাদিম বয়চেঙ্কোৱে অভিযোগ কৰিছে যে যোৱা কেইসপ্তাহমানত ৰাছিয়াৰ বাহিনীয়ে চহৰখনৰ ৯০ শতাংশ আন্তঃগাঁথনি ধ্বংস কৰিছে।
এইবাৰ, আৱদ্ধ চহৰখনত ইউক্ৰেইনৰ বাহিনীক আত্মসমৰ্পণ কৰিবলৈ সকীয়নি প্ৰদানে ৰাছিয়ান সেনাৰ ‘চূড়ান্ত আক্ৰমণ’ৰ বাৰ্তা প্ৰেৰণ কৰা বুলি কিছুসংখ্যক সামৰিক বিশেষজ্ঞই মত প্ৰকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
