দিন হাজিৰা, কোম্পানীৰ চাকৰিয়ালৰ বাবে সুখবৰ!

দিন হাজিৰা কৰা, ব্যক্তিগত খণ্ডৰ চাকৰিয়ালসকলৰ বাবে এটা অতি গুৰুত্বপূৰ্ণ খবৰ। কেন্দ্ৰীয় চৰকাৰৰ নতুন শ্ৰম সংহিতা অনুসৰি দৰমহা প্ৰদানৰ নিয়ম আগতকৈ অধিক স্পষ্ট কৰা হৈছে। ক’ড অন ৱেজেছ (Code on Wages) অনুসৰি, যদি কোনো কৰ্মচাৰীয়ে মাহেকীয়া দৰমহা লাভ কৰে, তেন্তে পৰৱৰ্তী মাহৰ ৭ তাৰিখৰ ভিতৰত তেওঁৰ বেংক একাউণ্টত দৰমহা জমা হ’ব লাগিব। ইয়াৰ উপৰিও, যদি কোনো কৰ্মচাৰীয়ে চাকৰি এৰি দিয়ে,চাকৰিৰ পৰা তেওঁক বৰ্খাস্ত কৰা হয় বা আন কোনো কাৰণত তেওঁৰ চাকৰিৰ কাৰ্যকাল শেষ হয়, তেন্তে কোম্পানীয়ে দুটা কৰ্ম দিনৰ ভিতৰত তেওঁৰ সকলো বকেয়া ধন পৰিশোধ কৰিব লাগিব।

এই নিয়মৰ সুবিধা কোনে পাব?

আগতে দৰমহা প্ৰদানৰ বহু নিয়ম কেৱল এটা নিৰ্দিষ্ট দৰমহাৰ সীমাৰ ভিতৰত থকা কৰ্মচাৰীসকলৰ ক্ষেত্ৰত প্ৰযোজ্য আছিল। কিন্তু নতুন ক’ড অন ৱেজেছ অনুসৰি এই নিয়ম এতিয়া সকলো কৰ্মচাৰীৰ বাবে প্ৰযোজ্য হ’ব, তেওঁলোকৰ দৰমহা কম হওক বা বেছি হওক। অৰ্থাৎ, প্ৰতিজন কৰ্মচাৰীয়ে সময়মতে দৰমহা লাভ কৰাৰ আইনী অধিকাৰ পাব।

কেতিয়ালৈকে দৰমহা দিব লাগিব?

নতুন নিয়ম অনুসৰি দৰমহা পৰিশোধৰ সময়সীমা তলত দিয়া ধৰণে নিৰ্ধাৰণ কৰা হৈছে—
মাহিলী দৰমহা পোৱা কৰ্মচাৰী: পৰৱৰ্তী মাহৰ ৭ তাৰিখৰ ভিতৰত দৰমহা দিব লাগিব।
সাপ্তাহিক দৰমহা পোৱা কৰ্মচাৰী: সপ্তাহৰ শেষ কৰ্ম দিনৰ ভিতৰত দৰমহা দিব লাগিব।
১৫ দিনৰ ভিত্তিত দৰমহা পোৱা কৰ্মচাৰী: ১৫ দিনীয়া সময়সীমা শেষ হোৱাৰ ২ দিনৰ ভিতৰত দৰমহা পৰিশোধ কৰিব লাগিব।

দৈনিক মজুৰিৰ কৰ্মচাৰী: কাম শেষ হোৱাৰ পিছত সেইদিনাই মজুৰি দিব লাগিব।

চাকৰি এৰিলে কেতিয়া সম্পূৰ্ণ বকেয়া ধন পাব?

যদি কোনো কৰ্মচাৰীয়ে পদত্যাগ কৰে, কোম্পানীয়ে তেওঁক বৰ্খাস্ত কৰে বা চাকৰি সমাপ্ত কৰে, তেন্তে কোম্পানীয়ে দুটা কৰ্ম দিনৰ ভিতৰত তেওঁৰ সকলো বকেয়া দৰমহা, জমা হোৱা ছুটীৰ ধন আৰু আন সকলো প্ৰাপ্য পৰিশোধ কৰিব লাগিব। এই নিয়মৰ উদ্দেশ্য হৈছে কৰ্মচাৰীসকলক নিজৰ ন্যায্য ধনৰ বাবে দীঘলীয়া সময় অপেক্ষা কৰিবলগীয়া অৱস্থাৰ পৰা ৰক্ষা কৰা।

যদি কোম্পানীয়ে সময়মতে দৰমহা নিদিয়ে, তেন্তে কি হ’ব?

যদি কোনো কোম্পানীয়ে সময়মতে দৰমহা নিদিয়ে বা অনুমতি নোহোৱাকৈ দৰমহাৰ পৰা ধন কাটি লয়, তেন্তে কৰ্মচাৰীয়ে অভিযোগ দাখিল কৰিব পাৰে। ইয়াৰ বাবে চৰকাৰে ইন্সপেক্টৰ-কাম-ফেচিলিটেটৰ নিয়োগ কৰিব, যিয়ে কোম্পানীসমূহে নিয়ম মানি চলাটো নিশ্চিত কৰিব। কৰ্মচাৰীয়ে ৩ বছৰৰ ভিতৰত অভিযোগ দাখিল কৰিব পাৰিব। তদন্তৰ পিছত যদি সংশ্লিষ্ট কৰ্তৃপক্ষই কোম্পানীক দৰমহা বা ক্ষতিপূৰণ পৰিশোধ কৰাৰ নিৰ্দেশ দিয়ে আৰু কোম্পানীয়ে সেয়াও পালন নকৰে, তেন্তে চৰকাৰে সেই ধন ভূমি ৰাজহ আদায় কৰাৰ দৰে আইনীভাৱে আদায় কৰিব পাৰিব।

পুৰণি নিয়মৰ তুলনাত কি কি সলনি হ’ল?

নতুন ক’ড অন ৱেজেছ-এ Payment of Wages Act, 1936-কে ধৰি দৰমহাৰ সৈতে জড়িত একাধিক পৃথক আইনক সলনি কৰি এক একত্ৰিত আইন ৰূপে প্ৰৱৰ্তন কৰা হৈছে।
এই নতুন ব্যৱস্থাৰ আটাইতকৈ ডাঙৰ পৰিবৰ্তন হৈছে—
সময়মতে দৰমহা দিয়াটো আৰু অবৈধভাৱে দৰমহা কাটি নোলোৱাটো এতিয়া সকলো কৰ্মচাৰীৰ ক্ষেত্ৰত বাধ্যতামূলক।
কোম্পানীয়ে কৰ্মচাৰীসকলক বেতন পৰ্চি (Salary Slip) দিয়াটো বাধ্যতামূলক। এই পৰ্চি কাগজত বা ডিজিটেল ৰূপত দিব পাৰিব।
দৰমহাৰ পৰা কিমান পৰিমাণ ধন কটিব পাৰিব, সেই বিষয়েও স্পষ্ট নিয়ম নিৰ্ধাৰণ কৰা হৈছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ