সুতলৈ টকা দিয়ে নেকি, সাৱধান! অন্যথা হ’ব পাৰে ১০ বছৰ পৰ্যন্ত জেল
সুতলৈ বুলি টকা দিওতা সকল এতিয়া সৱধান হোৱাৰ সময়। যদিহে সুতত কাৰোবাক আপোনাৰ জমা ধন দিয়ে, তেন্তে হ’ব পাৰে ১০ বছৰ পৰ্যন্ত জেল, লগতে ১ কোটি টকা পৰ্যন্ত জৰিমনা।
এতিয়াৰ পৰা নিয়ম বহিৰ্ভুত ঋণ প্ৰদান ব্যৱস্থা ৰোধ কৰিবলৈ চৰকাৰে কঠোৰ আইন অনাৰ ব্যৱস্থা কৰিছে। ইয়াৰ খচৰাও দাখিল কৰা হৈছে আৰু অতি সোনকালে ইয়াৰ ওপৰত আইন প্ৰণয়ন কৰা হ’ব। কেন্দ্ৰীয় চৰকাৰে অনিয়ন্ত্ৰিত ঋণ প্ৰদান ৰোধ কৰাৰ লগতে উলংঘাকাৰীক আৰ্থিক শাস্তিৰ উপৰিও ১০ বছৰ পৰ্যন্ত শাস্তি প্ৰদানৰ ব্যৱস্থা কৰিছে।
২০২৫ চনৰ ১৩ ফেব্ৰুৱাৰীৰ ভিতৰত BULA (Ban on Unregulated Lending Activities) শীৰ্ষক বিধেয়কখনৰ খচৰাৰ ওপৰত অংশীদাৰসকলক মতামত দাখিল কৰিবলৈ কোৱা হৈছে।
এই প্ৰস্তাৱিত বিধেয়কখনে ভাৰতীয় ৰিজাৰ্ভ বেংক বা অন্যান্য নিয়ন্ত্ৰকৰ অনুমোদন নথকা আৰু আন কোনো আইনৰ অধীনত পঞ্জীয়ন নোহোৱা সকলো ব্যক্তি বা সত্তাক ৰাজহুৱা ঋণৰ ব্যৱসায়ত নিষেধাজ্ঞা আৰোপ কৰিব বিচাৰিছে। খচৰা বিধেয়কখনে ‘অ-নিয়ন্ত্ৰিত ঋণ কাৰ্য্যকলাপ’ক এনে ঋণ হিচাপে সংজ্ঞায়িত কৰিছে যিবোৰ নিয়ন্ত্ৰিত ঋণ প্ৰদানৰ পৰিসৰৰ ভিতৰত নপৰে, সেয়া ডিজিটেলভাৱে হওক বা অন্য উপায়েৰে হওক।
খচৰাখনত আত্মীয়ৰ পৰা ঋণ লোৱাৰ বাহিৰে আন যিকোনো অনিয়ন্ত্ৰিত ঋণ প্ৰদানৰ কাৰ্য্যকলাপ নিষিদ্ধ কৰাৰ লগতে ঋণ লোৱাসকলৰ স্বাৰ্থ সুৰক্ষিত কৰাৰ বাবে এক ব্যাপক ব্যৱস্থা গঢ়ি তোলাৰ আহ্বান জনোৱা হৈছে। ইয়াৰ উপৰিও কোৱা হৈছে যে যদি কোনো ঋণদাতাই এই আইন উলংঘা কৰি ঋণ দিয়ে, সেয়া ডিজিটেলভাৱে হওক বা আন কোনো উপায়েৰে হওক, তেন্তে তেওঁক নূন্যতম দুবছৰৰ শাস্তি দিয়া হ’ব যিটো সাত বছৰলৈকে বৃদ্ধি কৰিব পাৰি। ইয়াৰ উপৰিও তেওঁৰ ওপৰত ২ লাখৰ পৰা ১ কোটি টকালৈকে জৰিমনাও আৰোপ কৰিব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
