এই সময় আছিল খুবেই আশাব্যঞ্জক সময়৷ এই সময় আছিল ঘৰলৈ ন কইনাক আদৰি এক নতুন জীৱন আৰম্ভ কৰাৰ সময়৷ কিন্তু এই সপোন আদবাটতেই মৰহিল৷ পৰিয়ালৰ লোকক লৈ কইনা আনিবলৈ গৈ আধাবাটতেই শেষ হৈ গল সকলো সম্ভাৱনা৷ পথ দুৰ্ঘটনাই কাঢ়ি নিলে দৰাসহিতে মুঠ ৮জনৰ জীৱন৷ ঘটনাটো শুকুৰবাৰৰ নিশা৷ উত্তৰপ্ৰদেশৰ সম্ভল জিলাত এতিয়া শোকৰ ছাঁ৷
স্থানীয় প্ৰশাসন সূত্ৰৰ পৰা লাভ কৰা খবৰ অনুসৰি দুৰ্ঘটনাত মৃত আটাইকেইগৰাকীয়ে সম্ভল জিলাৰ হৰ গোবিন্দপুৰ গাওঁৰ বাসিন্দা৷ হৰ গোবিন্দপুৰৰ পৰা বাদাউন জিলাৰ চিৰতৌল গাওঁলৈ কইনা আনিবলৈ ওলাইছিল সুৰজ নামৰ ২৪ বছৰীয়া যুৱকজন৷ সুৰজৰ কইনা আনিবলৈ তেওঁৰ সৈতে একেখন বাহনতেই যাত্ৰা কৰিছিল তেওঁৰ পৰিয়ালৰ আটাইকেইগৰাকী সদস্য৷ মুঠ ১০গৰাকী ব্যক্তি আছিল SUV খনত৷ বিবাহগৃহলৈ ৰাওনা হোৱাৰ সময়তেই নিয়ন্ত্ৰণ হেৰুৱাই জেওৱানাই গাওঁৰ কাষৰ জনতা ইন্টাৰ কলেজৰ দেৱালত খুন্দা মাৰে বাহনখনে৷ লগে লগেই দৰাসহিতে বাহনত থকা ৮ ব্যক্তিয়ে নিমিষতে প্ৰাণ হেৰুৱাই৷
দুৰ্ঘটনাৰ সময়ত অত্যন্ত দ্ৰুত গতিত আছিল বাহনখন৷ যাৰবাবে নিয়ন্ত্ৰণ হেৰুৱাই কলেজৰ দেৱালত ধাক্কা মাৰি বাগৰি পৰে বুলি জনাইছে আৰক্ষী সূত্ৰই৷ ঘটনাস্থলীত থিতাতে নিহত হয় দৰা সুৰজসহ ৫ব্যক্তিৰ৷ অইন ৫ ব্যক্তিত ততাতৈয়াকৈ স্থানীয় হাস্পতালত ভৰ্তি কৰোৱা হয় যদিও হাস্পতালতেই অইন ৩গৰাকীৰো মৃত্যু হোৱাৰ খবৰ আহিছে৷ দুগৰাকী ব্যক্তিৰ অৱস্থাও অত্যন্ত সংকটজনক বুজি জনাইছে চিকিৎসালয় কৰ্তৃপক্ষই৷ মৃতসকলৰ ভিতৰত শিশুও আছে বুলি জানিব পৰা গৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
