গুজৰাট মন্ত্ৰীসভাত ব্যাপক ৰদ-বদল৷ বৃহস্পতিবাৰে সেই ৰাজ্যৰ মুখ্যমন্ত্ৰী ভূপেন্দ্ৰ পেটেলক বাদ দি মন্ত্ৰীসভাৰ বাকী সদস্যসকলে বৃহস্পতিবাৰে পদত্যাগ কৰিছিল৷ তেতিয়াই জনা গৈছে যে মন্ত্ৰীসভাৰ নতুন সদস্যসকলে শুকুৰবাৰে শপত ল’ব৷ সেই মতেই শুকুৰবাৰে দুপৰীয়া গান্ধীনগৰৰ ৰাজভৱনত মুঠ ২৫ জন বিধায়কে মন্ত্ৰী হিচাপে শপত ল’ব৷ মন্ত্ৰী হিচাপে শপত ল’ব ক্ৰিকেটাৰ ৰবীন্দ্ৰ জাদেজাৰ পত্নী তথা গুজৰাটৰ জামেনগৰ উত্তৰ কেন্দ্ৰৰ বিজেপি বিধায়ত ৰিভাবা জাদেজাও৷ নতুন মন্ত্ৰী হিচাপে শপত ল’লে মুঠ ১৯ জনে৷ ২০২১ চনৰ ছেপ্টেম্বৰ মাহৰ পাছত গুজৰাটত উপমুখ্যমন্ত্ৰী নাছিল৷
শুকুৰবাৰে পুৱা গুজৰাটৰ ৰাজ্যপাল আচাৰ্য দেৱৰাটৰ সৈতে দেখা কৰিছে মুখ্যমন্ত্ৰী ভূপেন্দ্ৰ পেটেলে৷ ৰাজ্যপালত হাতত পদত্যাগী মন্ত্ৰী আৰু হ’বলগীয়া মন্ত্ৰীৰ তালিকা হাতত তুলি দিয়া হৈছে৷ বিজেপিৰ এক সূত্ৰৰ পৰা জনা গৈছে ২০২৭ চনৰ বিধানসভা নিৰ্বাচনৰ পূৰ্বে এক নিৰ্দিষ্ট ৰাজনৈতিক কৌশল মানি মন্ত্ৰীসভাৰ সাল সলনি হ’ব৷ চলিত মাহত গুজৰাটৰ বিজেপি সভাপতি পদ দিয়া হৈছিল ৰাজ্যৰ মন্ত্ৰী জগদীশ বিশ্বকৰ্মাক৷ বিজেপিৰ এক পদ এক ব্যক্তি নীতি অনুসৰিয়েই জগদীশে নতুন মন্ত্ৰীসভাত স্থান নাপায়৷
গুজৰাট বিজেপিৰ সাংগঠিক আৰু প্ৰশাসনিক ৰদবদল অৱশ্যে নতুন নহয়৷ ২০১৪ৰ মে মাহত নৰেন্দ্ৰ মোদীয়ে প্ৰধানমন্ত্ৰী হোৱাৰ পাছত তেওঁৰ উত্তৰসুৰি মনোনীত হৈছিল আনন্দীবেন পেটেল৷ কিন্তু ২০১৬ চনৰ আগষ্টত শীৰ্ষনেতৃত্বৰ নিৰ্দেশত ইস্তাফা দিছিল তেওঁ৷ মুখ্যমন্ত্ৰীৰ দায়িত্ব পাইছিল বিজয় ৰূপানীয়ে৷ তেওঁৰ নেতৃত্বতেই ২০১৭ চনৰ বিধানসভা নিৰ্বাচনত কংগ্ৰেছক পৰাস্ত কৰি জয়ী হৈছিল বিজেপি৷ কিন্তু ২০২১ চনৰ ছেপ্টেম্বৰত দলীয় নেতৃত্বৰ নিৰ্দেশ মানি ইস্তাফা দিয়াৰ কথা তেওঁ ঘোষণা কৰে৷ জৈন সম্প্ৰদায়ৰ নেতা ৰূপানীৰ সলনি প্ৰভাৱশালী পেটেল জনগোষ্ঠীয় ভূপেন্দ্ৰক মুখ্যমন্ত্ৰীৰ দায়িত্ব দিয়া হয়৷ মন্ত্ৰীসভাৰ সালসলনিৰ পাছতেই ২০২২ চনৰ বিধানসভা নিৰ্বাচনত বিপুল ভোটত জয় লাভ কৰিছিল বিজেপি দলে৷ ২০২৭ চনৰ শেষপৰ্বত গুজৰাট বিধানসভা নিৰ্বাচন অনুষ্ঠিত হোৱাৰ কথা৷ সেয়ে এইবাৰো নিৰ্বাচনৰ পূৰ্বেই বিজেপিয়ে নিজৰ মন্ত্ৰিসভাৰ সালসলনি আৰম্ভ কৰিছে বুলি বহুতে ধাৰণা কৰিছে৷
নতুন মন্ত্ৰিসভাও জাতপাতৰ অংক মূৰত ৰাখিয়ে কৰা হৈছে বুলি বহুতৰে ধাৰণা৷ নতুন মন্ত্ৰিসভাত ৮জন সদস্য অন্যান্য অনগ্ৰসৰ শ্ৰেণীৰ অন্তৰ্ভুক্ত৷ ৬ জন গুজৰাটৰ প্ৰভাৱশালী পটীদাৰ গোষ্ঠীৰ মানুহ৷ ৪জন আদিবাসী সম্প্ৰদায়ভুক্ত৷ তিনিজন তফছিলি জনজাতিৰ মানুহ৷ মন্ত্ৰীসকলৰ মাজত দুজন ক্ষত্ৰিয় সম্প্ৰদায়ভুক্ত, এজন ব্ৰাহ্মণ আৰু এজন জৈন সম্প্ৰদায়ৰ৷
১৮২ বিধানসভা আসনবিশিষ্ট গুজৰাটত সৰ্বোচ্চ ২৭ জনক মন্ত্ৰী কৰা হৈছে৷ পূৰ্বে মন্ত্ৰিসভাত মুঠ ১৭ জন সদস্য আছিল মুখ্যমন্ত্ৰীক বাদ দি ৮ জন পূৰ্ণমন্ত্ৰী আৰু ৮ জন প্ৰতিমন্ত্ৰী আছিল৷ সেই দিশৰ পৰা চালে কেৱল মন্ত্ৰিসভাৰ ৰদবদলেই নহয় সম্প্ৰসাৰণো হৈছে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
