অসম লাইভ২৪ঃ বৃহস্পতিবাৰে ঘোষণা হোৱা দুখন ৰাজ্যৰ বিধানসভা নিৰ্বাচনতেই দৃষ্টি আবদ্ধ হৈ আছিল দেশবাসীৰ। গুজৰাটত ২৭ বছৰৰ শাসনৰ পিছত পুনৰ এবাৰ অভিলেখ গঢ়ি বিপুল সংখ্যাগৰিষ্ঠতাৰে চৰকাৰ গঠনৰ বাবে আগবাঢ়িছে বিজেপি। দেশৰ দুই মুখ্য নেতা প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহৰ গৃহৰাজ্য গুজৰাটত বিজেপিৰ এই বিজয়ে বিজেপিৰ নেতা-কৰ্মী সকলক উৎফুল্লিত কৰিছে। হিমাচল প্ৰদেশৰ নিৰ্বাচনত বিগত ৫ বছৰীয়া চৰকাৰৰ অৱসান ঘটাই এইবাৰ জয়ৰ ধ্বজা উৰুৱাইছে কংগ্ৰেছ দলে। ইতিমধ্যে হিমাচলত মুখ্যমন্ত্ৰী পদৰ পৰা পদত্যাগো কৰিছে জয়ৰাম ঠাকুৰে।
এই সকলোবোৰৰ মাজত দুয়োখন ৰাজ্যৰ নিৰ্বাচনী যুঁজত অৱতীৰ্ণ হোৱা অৰবিন্দ কেজৰিৱালৰ আম আদমী পাৰ্টিক লৈ দেশজুৰি চৰ্চা। হিমাচল প্ৰদেশত আম আদমী পাৰ্টীয়ে এখনো আসন লাভ কৰিব নোৱাৰাৰ বিপৰীতে গুজৰাটতো মাত্ৰ ৭ খন আসনতেই যুঁজ সামৰে। কিন্তু এই পৰাজয়ৰ অন্ততো হাঁহিমুখে কেজৰিৱালে সম্বোধন কৰিছে দেশবাসীক।
গুজৰাট আৰু দেশবাসীক ধন্যবাদো জ্ঞাপন কৰিছে দিল্লীৰ মুখ্যমন্ত্ৰী তথা আপৰ আহ্বায়ক অৰবিন্দ কেজৰিৱাল আৰু মনীষ ছিছ’ডিয়াই। আপে গুজৰাটত ভাল ফলাফল দেখুওৱাব নোৱাৰিলেও এই ফলাফলক লৈ যথেষ্ট সুখী অৰবিন্দ কেজৰিৱাল। কিয়নো ২০১৭ চনৰ গুজৰাট বিধানসভা নিৰ্বাচনত আপে ২৯ খন আসনত প্ৰতিদ্বন্দ্বিতা আগবঢ়াইছিল যদিও এখনতো সফলতা লাভ কৰিবলৈ সক্ষম হোৱা নাছিল।
কিন্তু এইবাৰ পুনৰ নিৰ্বাচনত অৱতীৰ্ণ হৈ আম আদমী পাৰ্টীয়ে গুজৰাটত ১২ শতাংশ ভোট লাভ কৰিবলৈ সক্ষম হৈছে। গুজৰাট নিৰ্বাচনত বিজেপি বনাম আপৰ যুঁজ হ’ব বুলি পূৰ্বেই ঘোষণা কৰিছিল অৰবিন্দ কেজৰিৱালে। সেই কথা সঁচা প্ৰমাণিত নহ’ল যদিও ২ শতাংশ ভোট লাভ কৰিলে আপে। এই ৭ খন আসন লাভেৰে আপে দেশবাসীৰ মাজত ৰাষ্ট্ৰীয় দল হিচাপেও চিনাকি হৈ পৰিল।
উল্লেখ্য যে, এটা দলক ৰাষ্ট্ৰীয় দল হিচাপে ঘোষণা কৰিবলৈ ৪ খন ৰাজ্যৰ ৰাজ্যিক দল হিচাপে চিহ্নিত হোৱা জৰুৰী। আনহাতে এটা দল ৰাজ্যিক দল হ’বলৈ হ’লে নিৰ্বাচনত কমেও ৬ শতাংশ ভোট আৰু ২ খন আসনত জয়লাভ কৰাটো বাধ্যতামূলক। বৰ্তমান দিল্লী আৰু পঞ্জাৱত আম আদমী পাৰ্টীয়ে শাসন চলাই আছে। আনহাতে শেহতীয়া গোৱা বিধানসভা নিৰ্বাচনতো দলটোৱে আশানুৰূপ প্ৰদৰ্শন কৰি ৰাজ্যিক দল হিচাপে পৰিচয় লাভ কৰিছিল। তাৰ পিছতে গুজৰাটতো দলটোৱে এই দেওনা অতিক্ৰম কৰি এতিয়া ৰাষ্ট্ৰীয় দলৰ পৰিচয় লাভ কৰিছে। যাৰ বাবে গুজৰাটত পৰাজিত হৈও এতিয়া সন্তুষ্টিৰ হাঁহি মাৰিছে অৰবিন্দ কেজৰিৱালে।
মনীষ ছিছ’ডিয়াই টুইটযোগে গুজৰাটবাসীক ধন্যবাদ জনায় কয় যে এতিয়া আম আদমী পাৰ্টী ৰাষ্ট্ৰীয় দল হৈ পৰিছে। এতিয়াৰে পৰা স্বাস্থ্য আৰু শিক্ষা এক ৰাষ্ট্ৰীয় বিষয় হিচাপে পৰিগণিত হ’ব বুলিও প্ৰকাশ কৰিছে দলটোৰ নেতৃবৰ্গই।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
