এজাক বৰষুণতে গুৱাহাটীৰ বিভিন্ন স্থানত কৃত্ৰিম বান হোৱা খবৰ এতিয়া আৰু একো নতুন খবৰ নহয়। কিন্তু সোমবাৰে হোৱা প্ৰচণ্ড বৰষুণৰ ফলত হাৰিয়ানাৰ গুৰুগ্ৰামৰ দৰে Smart Cityৰ বহু অঞ্চল পানীত বুৰ যায়। নিউ গুৰুগ্ৰামৰ পৰা পুৰণি চহৰৰ বিভিন্ন আৱাসিক এলেকালৈকে বহু ঠাইত পথত পানী জমা হয়। কিছুমান পথত পানীৰ গভীৰতা এক কঁকাল পৰ্যন্ত হোৱা বুলি জানিব পৰা গৈছে। পানী জমা হোৱাৰ ফলত গুৰুগ্ৰামৰ বহু গুৰুত্বপূৰ্ণ পথত যান-বাহনৰ চলাচল ব্যাহত হয়। গলফ কোৰ্চ ৰোড, দিল্লী-জয়পুৰ এক্সপ্ৰেছ ৱে, চোহনা ৰোড, পুৰণি দিল্লী ৰোড আৰু ৰেলৱে ৰোডত দীঘলীয়া যান-জঁটৰ সৃষ্টি হয়। বহু চালক আৰু মটৰ চাইকেল আৰোহী ঘণ্টাৰ পিছত ঘণ্টা ধৰি যান-জঁটত আবদ্ধ হৈ থাকিবলগীয়া হয়। ৰাজীৱ চ’কৰ আণ্ডাৰপাছ আৰু ফ্লাই অভাৰৰ ওচৰতো ঘণ্টা ঘণ্টা ধৰি যান-বাহনৰ গতি প্ৰায় স্তব্ধ হৈ পৰে। বহু ঠাইত পানীৰ মাজেৰে বাহন চলাই নিয়া দেখা যায়। পানী জমা হোৱা পথত বাহন চলাবলৈ গৈ চালকসকলেও যথেষ্ট সমস্যাৰ সন্মুখীন হয়।
মঙলবাৰে ঘৰৰ পৰা কামৰ পৰামৰ্শ
সোমবাৰৰ এই পৰিস্থিতিৰ প্ৰতি লক্ষ্য ৰাখি স্থানীয় প্ৰশাসনে মঙলবাৰৰ বাবে ঘৰৰ পৰা কাম কৰাক অগ্ৰাধিকাৰ দিবলৈ পৰামৰ্শ জাৰি কৰিছে। জিলা দুৰ্যোগ ব্যৱস্থাপনা কৰ্তৃপক্ষই গুৰুগ্ৰামৰ কৰ্পৰেট কাৰ্যালয়, চৰকাৰী আৰু ব্যক্তিগত বিদ্যালয় তথা অন্যান্য প্ৰতিষ্ঠানসমূহক এই পৰামৰ্শ মানি চলিবলৈ আহ্বান জনাইছে। জিলা দুৰ্যোগ ব্যৱস্থাপনা কৰ্তৃপক্ষৰ অধ্যক্ষ তথা উপায়ুক্ত উত্তম সিঙে জাৰি কৰা পৰামৰ্শ অনুসৰি, ২৫ আগষ্টত যিমান সম্ভৱ কৰ্মচাৰীসকলক ঘৰৰ পৰাই কাম কৰাৰ সুবিধা দিবলৈ কোৱা হৈছে।
প্ৰশাসনৰ মতে, অধিক লোক ঘৰৰ পৰা কাম কৰিলে পথত বাহনৰ সংখ্যা কমিব। ফলত যান-জঁট হ্ৰাসৰ লগতে পানী জমা হোৱা অঞ্চলসমূহত উদ্ধাৰ, পানী নিষ্কাশন আৰু মেৰামতিৰ কাম কৰাটোও সহজ হ’ব।
কিয় ঘৰৰ পৰা কামৰ পৰামৰ্শ দিয়া হৈছে?
গুৰুগ্ৰামত প্ৰচণ্ড বৰষুণৰ পিছত বহু অঞ্চলত পানী জমা হোৱাটো এতিয়া এক ডাঙৰ সমস্যা হৈ পৰিছে। পথত অধিক বাহন থাকিলে যান-জঁট বৃদ্ধি পোৱাৰ লগতে পানী নিষ্কাশনৰ কামতো বাধা আহিব পাৰে। সেয়েহে প্ৰশাসনে পথত যান-বাহনৰ চাপ কমোৱাৰ ওপৰত গুৰুত্ব দিছে। ইয়াৰ লগতে নলা-নৰ্দমা পৰিষ্কাৰ কৰা, পানী নিষ্কাশন কৰা আৰু ক্ষতিগ্ৰস্ত পথ মেৰামতিৰ কামো ক্ষিপ্ৰভাৱে কৰাৰ প্ৰয়োজন হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
