পদ্মসন্মানেৰে ভূষিত হ’ল ভাৰতৰ মহিলা ক্ৰিকেট দলৰ অধিনায়ক হৰমনপ্ৰীত কৌৰ৷ সোমবাৰে দিল্লীৰ ৰাষ্ট্ৰপতি ভৱনৰ পৰা পদ্মশ্ৰী সন্মান গ্ৰহণ কৰিছে হৰমনপ্ৰীতে৷ অৱশ্যে ক্ৰিকেটক্ষেত্ৰৰ পৰা পুৰুষ দলৰ ক্ৰিকেটাৰ ৰোহিত শৰ্মাইয়ো লাভ কৰিছে এই সন্মান৷ চলিত বছৰৰ অৰ্থাৎ ৭৭সংখ্যক গণৰাজ্য দিৱসৰ দিনাই পদ্ম পুৰস্কাৰ প্ৰাপকৰ নামৰ তালিকা প্ৰকাশ কৰিছে কেন্দ্ৰীয় চৰকাৰে৷ তাতেই ৰোহিত শৰ্মা, হৰমনপ্ৰীত কৌৰসহ মুঠ ৯গৰাকী ক্ৰীড়াবিদৰ নাম আছে৷ কিন্তু তালিকাত নাম থকা স্বত্ত্বেও এই সন্মান গ্ৰহণ কৰিবলৈ কিয় উপস্থিত নহ’ল ৰোহিত শৰ্মা?
সোমবাৰে ৰাষ্ট্ৰপতি ভৱনত প্ৰধানমন্ত্ৰী নৰেন্দ্ৰ মোদী, গৃহমন্ত্ৰী অমিত শ্বাহৰ উপস্থিতিত ২জনে পদ্মবিভূষণ, ৬জনে পদ্মভূষণ, ৫৮জনে পদ্মশ্ৰীৰ সন্মান লাভ কৰিছে৷ সকলোৰে হাতে হাতে এই পুৰস্কাৰ তুলি দিছে ৰাষ্ট্ৰপতি দ্ৰৌপদী মুৰ্মুৱে৷ এই অনুষ্ঠানত উপস্থিত থাকি পদ্মশ্ৰী সন্মান হাতত তুলি লৈছে মহিলা ক্ৰিকেট দলৰ অধিনায়ক হৰমনপ্ৰীত কৌৰে৷ পেৰা এথলিট প্ৰবীণ কুমাৰ আৰু হকি কোন বলদেৱ সিঙেও পদ্মশ্ৰী সন্মান গ্ৰহণ কৰিছে৷ এই দিনটোত ভাৰতীয় ক্ৰিকেট দলৰ প্ৰাক্তন অধিনায়ক ৰোহিত শৰ্মাৰ অনুপস্থিতিক লৈ এতিয়া আলোচনা চলিছে৷
২০২৪ চনৰ টি-২০ৰ বিশ্বকাপজয়ী অধিনায়ক ৰোহিত৷ বিগত বছৰ তেওঁৰ নেতৃত্বত ভাৰতে চেম্পিয়ন্স ট্ৰফিও জয় কৰিছে৷ দেওবাৰে মুম্বাইত আইপিএলো খেলিছে ৰোহিতে৷ ৰাষ্ট্ৰীয় সংবাদমাধ্যমৰ খবৰ অনুসৰি আই পিএলৰ সময়সূচীৰ কাৰণেই দিল্লীৰ ৰাষ্ট্ৰপতি ভৱনত উপস্থিত হ’ব নোৱাৰিলে ৰোহিতে৷ আকৌ এদিন অনুষ্ঠান পাতি ভাৰতৰ ৱানডে দলৰ তাৰকা ক্ৰিকেটাৰ ৰোহিতৰ হাতত তুলি দিয়া হ’ব এই পুৰস্কাৰ৷
প্ৰকৃততে পদ্ম সন্মান একাধিক অনুষ্ঠানৰ মাজেৰে দিয়া হয়৷ অৰ্থাৎ সময়ান্তৰত বহুতকে একেলগে মাতি এই সন্মান তেওঁলোকৰ হাতত তুলি দিয়া হয়৷ ৰোহিতকো আকৌ তেনেকৈয়ে দিয়া হ’ব৷ ইয়াৰোপৰি ২০২৬ চনৰ একমাত্ৰ ক্ৰীড়াবিদ হিচাপে দেশৰ তৃতীয় সৰ্বোচ্চ সন্মান পদ্মভূষণ লাভ কৰিছে বিজয় অমৃতৰাজে৷ ১৯৮৩ চনত তেওঁ পদ্মশ্ৰী সন্মান লাভ কৰিছিল৷ তাৰ পূৰ্বে পাইছিল অৰ্জুন পুৰস্কাৰ৷ ভাৰতীয় ক্ৰীড়াৰ অসামান্য অবদানৰ বাবে এইবাৰ পদ্মভূষণ লাভ কৰিছে তেওঁ৷ ইয়াৰ সৈতে ভাৰতীয় মহিলা হকী দলৰ গ’লকিপাৰ সবিতা পুনিয়াই পাইছে পদ্মশ্ৰী সন্মান৷ মৰণোত্তৰ পদ্মশ্ৰী লাভ কৰিছে প্ৰাক্তন কুস্তি কোচ ভ্লাডিমিৰ মেস্তভিৰিশভিয়ে৷ জৰ্জিয়াৰ নাগৰিক হলেও সুশীল কুমাৰ, যোগেশ্বৰ দত্ত আৰু বজৰং পুনিয়াহঁতৰ দৰে অলিম্পিক পদকজয়ীসকলৰ কোচিং কৰিছিল মেস্তভিৰিশভিয়ে৷ ইয়াৰোপৰি পদ্মশ্ৰী পাইছে কে পাজানিভেল, তামিলনাডুৰ ঐতিহ্যবাহী ছিলামবাম মাৰ্ছেল আৰ্টত অনবদ্য অবদান আছে তেওঁৰ৷ বুন্দেলখণ্ডৰ মাৰ্ছেল আৰ্ট বুন্দেলি ৱাৰত অবদানৰ স্বীকৃতিৰূপে পদ্মশ্ৰী পাইছে ভগৱান দাস ৰায়কৰে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
