মন্দিৰলৈ বুলি গৈ থকা অৱস্থাতে প্ৰাণ হেৰুৱালে ২ টি শিশুসহ ৭ জনে, ৮ জনৰ অৱস্থা সংকটজনক
হাৰিয়ানাৰ জিন্দত সংঘটিত হৈছে এক অতিকে শোকাৱহ পথ দুৰ্ঘটনা ৷ মাজনিশা সংঘটিত এই দুৰ্ঘটনাত ৭ জন লোকৰ মৃত্যু হোৱাৰ বিপৰীতে ৮ জন লোক আহত হৈছে। ৰাজ্যখনৰ নৰৱানাৰ গাঁও বিধৰানা সমীপৰ হিছাৰ-চণ্ডীগড় ৰাষ্ট্ৰীয় ঘাইপথত এই ঘটনাটো মাজনিশা সংঘটিত হৈছে।
কুৰুক্ষেত্ৰৰ মাৰ্চেদি গাঁৱৰ পৰা ৰাজস্থানৰ গোগামেডি মন্দিৰলৈ বুলি যোৱা টাটা এচক পিছফালৰ পৰা এখন ট্ৰাকে প্ৰচণ্ড জোৰে খুন্দা মৰাৰ ফলত এই দুৰ্ঘটনাটো সংঘটিত হয়। দুৰ্ঘটনাটোত ২টি শিশু আৰু এগৰাকী মহিলাসহ ৭ জন ভক্তৰ মৃত্যু হোৱাৰ বিপৰীতে ৮ জন ভক্ত আহত হয়। আহতসকলক আগ্ৰোহা চিকিৎসা মহাবিদ্যালয়ত ভৰ্তি কৰোৱা হৈছে।
তথ্য অনুসৰি হাৰিয়ানাৰ কুৰুক্ষেত্ৰৰ মাৰ্চেদি গাঁৱৰ লোক ৰাজস্থানৰ গোগামেডিলৈ গৈ আছিল। মুঠ ১৫ জন লোকে টাটা গাড়ীত যাত্ৰা কৰিছিল। সোমবাৰে সন্ধিয়া ঘৰৰ পৰা ওলাই আহিছিল এইসকল লোক। পাছে নৰৱানাৰ বিধাৰানা গাঁৱৰ কাষেৰে পাৰ হৈ যোৱাৰ সময়ত হিছাৰ-চণ্ডীগড় ৰাষ্ট্ৰীয় ঘাইপথৰ বিধাৰানা গাঁও আৰু শিমলাৰ মাজত কাঠ ভৰ্তি ট্ৰাকে পিছফালৰ পৰা খুন্দা মাৰে।
সংঘৰ্ষৰ পিছত টাটা-এছ এখন গাঁতত উলটি যায় আৰু মাজনিশা হুলস্থুলৰ সৃষ্টি হয়। এই সময়ছোৱাত ঘাইপথেৰে পাৰ হৈ যোৱা একাংশ চালকে আহতসকলক সহায় কৰে। পিছত নৰৱানা আৰক্ষীয়ে ৭খন এম্বুলেন্স সেই স্থানলৈ প্ৰেৰণ কৰাৰ পিছতে তেওঁক নৰৱানাৰ চৰকাৰী চিকিৎসালয়লৈ লৈ যায়। ইয়াত ৭ জন লোকক মৃত ঘোষণা কৰা হৈছে। ইফালে গুৰুতৰভাৱে আহতসকলক আগ্ৰোহালৈ প্ৰেৰণ কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
