‘চেলেঞ্জ এক্সেপটেড’- হাৰিয়ানাৰ মুখ্যমন্ত্ৰীয়ে পান কৰিলে যমুনা নদীৰ পানী
দেশৰ ৰাজধানী দিল্লীত বিধানসভা নিৰ্বাচনৰ বাবে সকলো দলৰ প্ৰস্তুতি তুংগত। তেনে সময়তে আপ আৰু বিজেপিয়ে ইজনে সিজনক আক্ৰমণ কৰিবলৈ এৰা নাই। দিল্লীৰ মুখ্যমন্ত্ৰী আতিশীৰ প্ৰত্যাহ্বানৰ পাছতে হাৰিয়ানাৰ মুখ্যমন্ত্ৰী নায়াব সিং সাইইনীয়ে দিল্লী-হাৰিয়ানা সীমান্তৰ দহিসৰা গাঁৱৰ সমীপৰ যমুনা নদীৰ ঘাট পৰিদৰ্শন কৰে।
কেৱল নদীৰ ঘাট পৰিদৰ্শন কৰাই নহয়, এই সময়ছোৱাত মুখ্যমন্ত্ৰী নায়াব সিং সাইনীয়ে কোনো সংকোচ নকৰাকৈয়ে যমুনা নদীৰ পানী হাতৰ চলুৰে পান কৰে। উল্লেখ্য যে, দহিসৰা গাঁৱৰ সমীপৰ পৰাই দিল্লীত প্ৰৱেশ কৰে যমুনা নদীয়ে।
নদী পৰিদৰ্শনৰ সময়তে মুখ্যমন্ত্ৰী সাইনীয়ে আপৰ ৰাষ্ট্ৰীয় সমন্বয়ক তথা প্ৰাক্তন মুখ্যমন্ত্ৰী কেজৰিৱালক লক্ষ্য কৰি লয়। মিছা কোৱা কেজৰিৱাল চাহাবৰ পুৰণি অভ্যাস বুলি কয় সাইনীয়ে। বিগত ১০ বছৰত তেওঁলোকে কাম কৰাৰ পৰিৱৰ্তে মিছা কথাৰে মানুহক ভয় খুৱাইছে।
প্ৰদূষণ নিয়ন্ত্ৰণ ব’ৰ্ডে লোৱা নমুনাৰ প্ৰতিবেদনো দেখুৱাই মুখ্যমন্ত্ৰী সাইনীয়ে। চাৰিটা নমুনাৰ পৰীক্ষাৰ প্ৰতিবেদন অহা বুলি দাবী কৰে ছাইনীয়ে। লগতে ইয়াকো দাবী কৰে যে, হাৰিয়ানাৰ সীমান্তত যমুনা নদীৰ পানীয়ে পানীৰ উচিত মানদণ্ড পূৰণ কৰিছে, সেয়ে কেজৰিৱালে দিয়া ভুৱা বক্তব্যৰ বাবে দিল্লী আৰু হাৰিয়ানাৰ ৰাইজৰ ওচৰত ক্ষমা খুজিব লাগে।
উল্লেখ্য যে, অৰবিন্দ কেজৰিৱাল আৰু তেওঁৰ দলৰ নেতাসকলে হাৰিয়ানা বিজেপিক লক্ষ্য কৰি কৈছিল যে, হাৰিয়ানা বিজেপিয়ে দিল্লীৰ পানীত বিষাক্ত দ্ৰব্য মিহলাই আছে। আপৰ সেই অভিযোগৰ পাছতে এতিয়া যমুনা পানী খোৱাৰ পিছত সাইনীয়ে নদীৰ পানী পৰিষ্কাৰ বুলি দাবী কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
