অসম লাইভ ২৪ঃ ‘ডিমা হাছাওত অসমীয়া ভাষাৰ চৰ্চা আৰম্ভ হওক। তেতিয়া ডিমাহাছাওৰ ৩০০০ৰ পৰা ৫০০০ যুৱক-যুৱতীয়ে অসম চৰকাৰৰ অধীনত চাকৰি লাভ কৰিবলৈ সক্ষম হ’ব। হিন্দী ভাষাত পঢ়াশুনা কৰিলেও অসমীয়া বিষয়টো পাঠ্যপুথিৰ অন্তৰ্গত বিষয় হ’লে ডিমাহাছাউবাসীৰ সুবিধা হ’ব। অসম তেতিয়া সম্পূৰ্ণ আপোনালোকৰ হ’ব।’ উমৰাংছুৰ এখন ৰাজহুৱা সভাত এই মন্তব্য কৰিছে মুখ্যমন্ত্ৰী হিমন্ত বিশ্ব শৰ্মাই।
বুধবাৰে উমৰাংছুত ২খনকৈ বিদ্যালয় উদ্বোধন কৰিছে মুখ্যমন্ত্ৰীগৰাকীয়ে। হিন্দীত ভাষণ প্ৰদান কৰি মুখ্যমন্ত্ৰীগৰাকীয়ে অসমীয়া ভাষাৰ চৰ্চা কৰিবলৈ আহ্বান জনাইছে ডিমা-হাছাওবাসী জনতাক। ইপিনে মুখ্যমন্ত্ৰীগৰাকীয়ে সভাত ভাষণ প্ৰদান কৰি কয় যে, হাফলঙৰ পৰা নিউ হাফলঙলৈ ৯০ কিঃমিঃ পকী ৰাস্তা বনোৱাৰো সিদ্ধান্ত লোৱা হৈছে। পৰ্যটন উদ্যোগটোক আগবঢ়াই নিবৰ বাবে ৰাস্তা, কাৰেণ্ট, নেটৱৰ্ক আদি দিশ ঠিক কৰাৰ বাবে সিদ্ধান্ত হৈছে চৰকাৰখনে।
উল্লেখ্য যে, নিযুক্তি প্ৰক্ৰিয়াত ডিমাহাছাওৰ ৫০ গৰাকী যুৱকে আৰক্ষী বিভাগত চাকৰি পাবলৈ সক্ষম হৈছে। ইয়াৰে ৩ গৰাকীয়ে আৰক্ষী অধীক্ষকৰ পদ লাভ কৰিছে। শিক্ষাত আৰু অধিক গুৰুত্ব দিবলৈ আহ্বান জনাই মুখ্যমন্ত্ৰীগৰাকীয়ে কয় যে চাকৰিৰ ৫ শতাংশ কোটা পাহাৰীয়া লোকসকলৰ বাবে ৰিজাৰ্ভ হৈ থাকে। ডিমাহাছাওবাসীয়ে সেয়া ল’বলৈ চেষ্টা কৰক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
