অসম লাইভ ২৪ঃ অচিৰেই ৰাজ্যত হ’ব বৃহৎ নিযুক্তি। ২৬ হাজাৰ পদৰ বাবে হোৱা তৃতীয় আৰু চতুৰ্থবৰ্গৰ পৰীক্ষাৰ ৰিজাল্ট সন্দৰ্ভত মন্তব্য কৰিছে মুখ্যমন্ত্ৰী হিমন্ত বিশ্ব শৰ্মাই। গুৱাহাটীৰ শ্ৰীমন্ত শংকৰদেৱ কলাক্ষেত্ৰত অনুষ্ঠিত সভাত ৰাষ্ট্ৰপতি দ্ৰৌপদী মুৰ্মূৰ উপস্থিতিতেই বহুকেইটা গুৰুত্বপূৰ্ণ মন্তব্য প্ৰদান কৰিছে মুখ্যমন্ত্ৰীগৰাকীয়ে।
অনুষ্ঠানত ৰাষ্ট্ৰপতি দ্ৰৌপদী মুৰ্মূৱে ৩ হাজাৰ অংগনবাড়ী কেন্দ্ৰ মুকলি কৰাৰ লগতে বাগিছা অঞ্চলত ১০০খন মডেল ছেকণ্ডাৰী স্কুলৰ আধাৰশীলাও ডিজিটেলী স্থাপন কৰে। অনুষ্ঠানতেই ভাষণ প্ৰসংগত মুখ্যমন্ত্ৰী হিমন্ত বিশ্ব শৰ্মাই কয়, ‘বাগিছা অঞ্চলৰ ৪খন বাগিছাৰ মাজত এখন হাইস্কুল আৰু ১৫খন বাগিছাৰ মাজত এখন কলেজ স্থাপন কৰা হ’ব।’
আনহাতে বিগত এবছৰত অসম চৰকাৰে ৯৭ খন উচ্চ মাধ্যমিক বিদ্যালয় নিৰ্মাণ কৰাৰ লগতে ৭৩৭ গৰাকী শিক্ষকো নিযুক্তি দিয়াৰ কথা ভাষণত উল্লেখ কৰে। ৩০০০টা অংগনবাড়ী কেন্দ্ৰৰ আধাৰশীলা স্থাপন কৰাৰ পিছতেই আগন্তুক বৰ্ষত আৰু ২০০০ টা অংগনবাড়ীকেন্দ্ৰ নিৰ্মাণৰো প্ৰতিশ্ৰুতি দিয়ে মুখ্যমন্ত্ৰীগৰাকীয়ে।
ইপিনে অৰুণোদয় আঁচনি সন্দৰ্ভতো ভাষণত কয় যে, এই আঁচনীত নতুনকৈ ৬ লাখ লোকক অন্তৰ্ভূক্ত কৰা হ’ব। ৰাষ্ট্ৰপতিৰ সন্মুখত অসমৰ চাহ বাগিছাৰ ইতিহাসৰো বৰ্ণনা দাঙি ধৰে মুখ্যমন্ত্ৰীগৰাকীয়ে। ভাষণত কয়, ‘ চাহ জনগোষ্ঠীয় লোকসকলে নিজৰ কলা-সংস্কৃতিক জীয়াই ৰাখি অসমীয়া সংস্কৃতিৰ লগত মিলি গৈছে। অসমৰ চাহ বাগিচাক লৈ ছবিও নিৰ্মাণ হৈছে। ঝুমুৰ অসমীয়া সংস্কৃতিৰ অভিন্ন অংগ। আমি বাগিচাৰ উন্নয়নৰ বাবে কাম কৰি আছো। প্ৰায় ৭০ লাখ চাহ জনগোষ্ঠীয় লোকৰ শিক্ষাৰ বাবে আমি কাম কৰিছো। এতিয়ালৈ ৯৭ খন হাইস্কুল নিৰ্মাণ হৈছে, ২২ খন নিৰ্মীয়মান অৱস্থাত আছে, আৰু ১০০খন আমি নিৰ্মাণ কৰিম। সমগ্ৰ অসমত ১৬ হাজাৰৰো অধিক শিক্ষাৰ্থী এই বিদ্যালয়সমূহলৈ আহিছে। আনহাতে আমি বাগানীয়া শিক্ষাৰ্থীৰ বাবে মেডিকেল কলেজতো ৩খনকৈ আসন সংৰক্ষণৰ ব্যৱস্থা কৰিছো।’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
