অসম লাইভ২৪ঃ আজিকালিৰ শিশুৱে খোজ কাঢ়িবলৈ শিকাৰ আগতেই মোবাইল ফোনৰ ব্যৱহাৰ শিকে। ফোনত কাৰ্টুন কেনেকৈ চায়, ভিডিঅ’ কেনেকৈ চলায়, গান কেনেকৈ শুনিব পাৰি, ইউটিউব কেনেকৈ চলাই সকলোবোৰেই আয়ত্ব কৰে। কম বয়সতেই মোবাইলৰ ব্যৱহাৰত আজিৰ শিশু যথেষ্ট পাৰ্গত।
মোবাইলৰ ব্যৱহাৰ শিকি উঠাৰ পিছতেই প্ৰায়সংখ্যক পিতৃ-মাতৃৰেই প্ৰধান সমস্যা হৈ পৰে শিশুটিৰ মোবাইল আসক্তি। সন্তানটোৰ হাতৰ পৰা মোবাইলটো কাঢ়ি লোৱা সহজ হৈ নুঠে। বহু পিতৃ-মাতৃয়ে এই সমস্যাক লৈ চিকিৎসকৰো পৰামৰ্শ গ্ৰহণ কৰিবলগাত পৰে। কেইটামান সহজ উপায় অৱলম্বন কৰি শিশু এটাৰ মোবাইল আসক্তি আঁতৰাব পাৰি। শিশু একোটাৰ মোবাইল আসক্তি দূৰ কৰাৰ বাবে চিকিৎসকে কৰা গৱেষণাৰ অন্তত আগবঢ়াইছে বিশেষ কেইটামান টিপছ।
শিশুটিৰ মোবাইল আসক্তি আঁতৰাবৰ বাবে এটা গুৰুত্বপূৰ্ণ উপায় হৈছে Screen Time সীমিত কৰা। লকডাউনৰ পিছৰে পৰা শিক্ষাখণ্ডতো মোবাইলৰ ব্যৱহাৰ বৃদ্ধি পাইছে। অনলাইন ক্লাছ, অনলাইন পৰীক্ষা আদি বিভিন্ন কামতেই ব্যৱহাৰ হয় মোবাইল ফোন। কিন্তু ২-৫ বছৰ বয়সীয়া শিশুৰ ক্ষেত্ৰত অতিৰিক্ত মোবাইল ফোন ব্যৱহাৰে চকুৰ লগতে হৃদযন্ত্ৰতো প্ৰভাৱ পেলাই। সেয়ে মোবাইলৰ Screen Time সীমিত কৰি দিলে ঘনাই ঘনাই ফোনটো বন্ধ হৈ গ’লে শিশুটিয়ে চাবলৈ মন নকৰা হয়। এই উপায়েৰে শিশুটিৰ মোবাইল আসক্তি বহু পৰিমানে কমাব পাৰি।
ঘৰত ফোন ব্যৱহাৰ কৰোতে আমি প্ৰায়সংখ্যেই কোনো নিৰ্দিষ্ট স্থানত বহি ব্যৱহাৰ নকৰো তাৰ পৰিবৰ্তে খোৱাৰ টেবুলত, শুৱাৰ পৰত, বাথৰুম আদিতো ফোন ব্যৱহাৰ কৰো। এই বদভ্যাস শিশুৱে ডাঙৰৰ পৰাই আয়ত্ব কৰে। সেয়ে ঘৰত শিশু থাকিলে এনেদৰে মোবাইল ব্যৱহাৰৰ পৰা বিৰত থাকিলে শিশুটিয়েও সকলো সময়তে মোবাইল লোৱাৰ পৰা বিৰত থাকে।
শিশুটিৱে কিবা কাৰণত আমনি কৰিলে বা মোবাইল বিচাৰি আমনি কৰিলে শিশুটিৰ হাতত মোবাইল তুলি দিয়াটো ভুল কথা বুলি চিকিৎসকে প্ৰকাশ কৰিছে। এবাৰ কান্দি যদি শিশুটিয়ে মোবাইল পায় তেন্তে সি পুনৰাই একেই কাৰ্যকলাপেই কৰিব। সেয়ে এইক্ষেত্ৰত পিতৃ-মাতৃয়ে সতৰ্ক হৈ শিশুটিক অন্যধৰণেৰে বুুজোৱাৰ চেষ্টা কৰিব লাগে।
পিতৃ-মাতৃয়েও শিশুটিৰ সন্মুখত মোবাইলৰ ব্যৱহাৰ কমাই দিয়া। যদি অত্যন্ত প্ৰয়োজনীয় কাম নাথাকে তেন্তে পিতৃ-মাতৃয়েও মোবাইলৰ ব্যৱহাৰ কমাই দিলে শিশু এটাৰো মোবাইল আসক্তি কমি আহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
