অসম লাইভ২৪ঃ গা লৰা নাই! মানস, তেজস্বিতা, আদিত্যৰ পিছত এইবাৰ হলিৰাম শইকীয়া। কাৰণো একেটাই উপযুক্ত চিকিৎসাৰ অভাৱ। প্ৰশ্ননো কি কৰিব? মাজুলীবাসীয়ে নিবিচাৰিলেও মানি ল’বলৈ বাধ্য, এয়াই মাজুলীৰ বাস্তৱ সত্য। মাজুলীবাসীয়ে এই বাস্তৱেৰেই জীয়াই থাকিব লাগিব। আপোচ মাজুলীবাসীয়ে কৰিবই লাগিব!
বাৰে বাৰে উন্মোচিত হৈছে মাজুলীৰ স্বাস্থ্যখণ্ডৰ নগ্ন স্বৰূপ। ১২ খনকৈ ১০৮ জৰুৰী সেৱাৰ বাবে মাজুলীত দিয়া হৈছে বুলি স্বাস্থ্যমন্ত্ৰীয়ে কৈছে। ক’ত আছে ১২ খন এম্বুলেঞ্চ? জৰুৰীকালিন সেৱা মাজুলীবাসীৰ বাবে কাহানিও জৰুৰীসময়ত উপলব্ধ নহয় কিয়? ক্ষোভ কাক লৈ কৰিব? উন্নত জীৱনৰ ভুৱা স্বপ্নই প্ৰতিদিনে উপলুঙা কৰাৰ পিছত ভাগ্যৰেই লিখন বুলি নামানি কি ভাবিম বুলি ক্ষোভেৰেই প্ৰকাশ কৰিছে মাজুলীৰ একাংশ জনতাই।
বৃহস্পতিবাৰে নিশা মাজুলীৰ মাজগাঁৱৰ হলিৰাম শইকীয়া নামৰ লোকজন গুৰুতৰভাৱে অসুস্থ হৈ পৰে। ১০৮ সেৱালৈ ফোন কৰিও সঁহাৰি নাপাই ব্যক্তিগত বাহনেৰেই পৰিয়ালৰ লোকে লোকজনক চিকিৎসালয়লৈ নিয়ে যদিও চিকিৎসালয় নৌপাওঁতেই মৃত্যু ঘটে হলিৰামৰ। তেজস্বিতাৰ মৃত্যুৰ পিছতে মাজুলীলৈ গৈছিল স্বাস্থ্যমন্ত্ৰী কেশৱ মহন্ত। স্বাস্থ্যমন্ত্ৰীক কাষতে পাই মাজুলীবাসীয়ে অভিযোগ আনিছিল ১০৮ সেৱাৰ বিৰুদ্ধে। আশাও কৰিছিল স্বাস্থ্যমন্ত্ৰীয়ে বুজিব। এইবাৰ অভাৱ দুৰ হ’ব! আশ্বাসো দিছিল স্বাস্থ্যমন্ত্ৰীয়ে, এই অভিযোগৰ সুযোগ নাপাব মাজুলীবাসীয়ে। লগতে মন্ত্ৰী কেশৱ মহন্তই কৈছিল, মাজুলীৰ সমান ১০৮ সেৱা অসমৰ আন কোনো স্থানতে নাই। নতুনকৈ ৩ খনকৈ এম্বুলেঞ্চো মাজুলীলৈ আগবঢ়াইছিল স্বাস্থ্যমন্ত্ৰীগৰাকীয়ে।
১২ খন এম্বুলেঞ্চ থকাৰ পিছতো জৰুৰীসময়ত মাজুলীবাসীয়ে কিয় লাভ নকৰে সেৱা? গাফিলতি কোনে কৰিছে? দুদিনপূৰ্বে আদিত্য পায়েঙৰ মৃত্যুটো একেই অভিযোগেই উত্থাপিত হৈছিল। প্ৰশ্ন উত্থাপিত ঠিকেই হয় কিন্তু মাজুলীবাসীৰ প্ৰশ্নৰ উত্তৰ দিওতাহে কোনো নোলায়। হলিৰামৰ মৃত্যুত পৰিয়ালৰ লোকৰ লগতে স্থানীয় ৰাইজে স্বাস্থ্যখণ্ডৰ এই দুৰ্ভোগৰ কথা প্ৰকাশ কৰিবলৈ গৈ এনেদৰেই ক্ষোভ উজাৰিছে মাজুলীৰ জিলা স্বাস্থ্যখণ্ডৰ বিৰুদ্ধে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
