অসম লাইভ ২৪ঃ শুকুৰবাৰে প্ৰধানমন্ত্ৰী নৰেন্দ্ৰ মোদী উত্তৰাখণ্ড ভ্ৰমণলৈ গৈছে। পুৱাই কেদাৰনাথ মন্দিৰ দৰ্শন কৰিছে প্ৰধানমন্ত্ৰী মোদীয়ে। প্ৰধানমন্ত্ৰী মোদীক কেদাৰনাথ ভ্ৰমণৰ সময়ত দেখা গৈছে এযোৰ বিশেষ পোছাকত।
মূৰত পাহাৰী টুপি, পিন্ধনত পাহাৰী পোছাক। কেদাৰনাথ ধামত প্ৰৱেশ কৰাৰ সময়ত প্ৰধানমন্ত্ৰী মোদীয়ে পিন্ধা পোছাকযোৰ ভাৰতৰ কোনটো জনগোষ্ঠীৰ? প্ৰধানমন্ত্ৰী মোদীয়ে পিন্ধা পোছাকযোৰ হিমাচল প্ৰদেশৰ চম্বাৰ সৈতে সম্পৰ্ক আছে। প্ৰধানমন্ত্ৰী মোদীয়ে কেদাৰনাথ দৰ্শনৰ সময়ত হিমাচল প্ৰদেশৰ চম্বাৰ মহিলাসকলে হাতেৰে বনোৱা পোছাক পৰিধান কৰিছে।
মোদীয়ে পিন্ধা পোছাকযোৰ চোল ডোৰা নামেৰে জনা যায়। এই পোছাকযোৰ প্ৰধানমন্ত্ৰী মোদীক হিমাচল প্ৰদেশ ভ্ৰমণৰ সময়ত উপহাৰ হিচাপে দিয়া হৈছিল। শেহতীয়াকৈ যেতিয়া প্ৰধানমন্ত্ৰীয়ে চম্বালৈয়ো গৈছিল। চম্বাৰ মহিলাসকলে এই পোছাক উপহাৰ দিছিল প্ৰধানমন্ত্ৰী মোদীক। প্ৰধানমন্ত্ৰী মোদীয়ে তেতিয়া এই পোছাক প্ৰস্তুত কৰা মহিলাকেইগৰাকীক প্ৰতিশ্ৰুতি দিছিল, শীত প্ৰভাৱিত স্থানলৈ যাওঁতেই এই পোছাক পিন্ধিব।
প্ৰতিশ্ৰুতি ৰক্ষা কৰিয়েই প্ৰধানমন্ত্ৰীয়ে এই পোছাক পৰিধান কৰিছে। পুৱা কেদাৰনাথত উপস্থিত হোৱা মোদীয়ে কেদাৰনাথ দৰ্শনৰ পিছত ৰুদ্ৰাভিষেক অনুষ্ঠান কৰে। তেওঁ আশীৰ্বাদ স্বৰূপে শিৰত চন্দনৰ ত্ৰিপুণ্ড ধাৰণ কৰে। প্ৰধানমন্ত্ৰী হোৱাৰ পিছত মোদীৰ এয়া ষষ্ঠ কেদাৰনাথ ভ্ৰমণ। কেদাৰনাথৰ পিছত প্ৰধানমন্ত্ৰী মোদীয়ে বদ্ৰীনাথলৈও যাব। প্ৰধানমন্ত্ৰীৰ যাত্ৰাক লৈ কটকটীয়া কৰি তোলা হয় নিৰাপত্তা ব্যৱস্থা। কেদাৰনাথ ধামত আঢ়ৈঘণ্টীয়া কাৰ্যসূচীৰ সময়ত প্ৰধানমন্ত্ৰী মোদীয়ে আদিগুৰু শংকৰাচাৰ্যৰ সমাধিস্থলো দৰ্শন কৰিব। ইয়াৰ উপৰি, কেদাৰনাথত মোদীয়ে মন্দাকিনী আস্থা পথ আৰু সৰস্বতী আস্থা পথৰ নিৰীক্ষণ কৰিব তথা তাৰ উন্নয়নমূলক কামৰ সমীক্ষা ল’ব। ইয়াৰ পিছতে প্ৰধানমন্ত্ৰীয়ে বদ্ৰীনাথ ধামত উপস্থিত হ’ব বুলি পূ্ৰ্বেই তৈয়াৰ কৰা সময়সূচীত উল্লেখ আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
